ފަލަސްތީނުގެ މައްސަލަ ފެށުނީ ޒަޔަނިސްޓުންނަށް ބިން ދީގެން، ޣައިރު މުސްލިމުންނަށް ދިވެހީންގެ ބިން ދާއިމަށް ދިނުމަކީ މިފަދަ ބިރުވެރިކަމެއް: ފައްޔާޒު
4 އޮކްޓޯބަރު 2026 | އާދީއްތަ 06:51ރަސްމާލެ މަޝްރޫއުގެ ދަށުން ބޭރުގެ ކުންފުންޏަކަށް ދިގު މުއްދަތަށް ބިން ދޫކޮށް، އެތަންތަން ބޭރު މީހުންނަށް މިލްކުކުރެވޭ ގޮތަށް ވިއްކުމަކީ ރާއްޖޭގެ މިނިވަންކަމާއި ދީނީ ވަހުދަތަށް އޮތް ބިރެއް ކަމަށް ކުރީގެ މިނިސްޓަރު ފައްޔާޒު އިސްމާއިލް ވިދާޅުވެއްޖެ. މިފަދަ ބޮޑެތި ނިންމުންތައް ނިންމަންވާނީ ރައްޔިތުންގެ ރުހުމާއެކު ކަމަށާއި، މިކަމުގެ ސަބަބުން މުސްތަގުބަލުގައި ރާއްޖޭގެ ގާނޫނުތަކާއި އުސޫލުތަކަށް ބޭރުގެ ނުފޫޒު ފޯރުވުމުގެ ފުރުސަތު އޮތް ކަމަށް އޭނާ ފާހަގަކުރެއްވި
ފައްޔާޒު ވިދާޅުވީ ފަލަސްތީނުގެ މައްސަލަ ފެށިގެން އައީ ޒަޔަނިސްޓުންނަށް ބިންތަކެއް ދާއިމަށް ދީގެން ކަމަށާއި، ޣައިރު މުސްލިމުންނަށް ރާއްޖޭގެ ބިންތައް އެފަދަ ގޮތަކަށް ދާއިމަށް ދީފިނަމަ އެއީ ނުރައްކާތެރި ކަމެއް ކަމަށް | ރާއްޖެއެމްވީ
ފަލަސްތީނުގެ މައްސަލަ ފެށިގެން އައީ ޒަޔަނިސްޓުންނަށް ބިންތަކެއް ދާއިމަށް ދީގެން ކަމަށާ، ޣައިރު މުސްލިމުންނަށް ރާއްޖޭގެ ބިންތައް އެފަދަ ގޮތަކަށް ދާއިމަށް ދީފިނަމަ އެއީ ނުރައްކާތެރި ކަމެއް ކަމަށް، ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެ އެވެ.
އާދިއްތަ ދުވަހުގެ 'ފަށާއިރު' ޕްރޮގްރާމްގައި ވާހަކަ ދައްކަވަމުން ފައްޔާޒު ވަނީ އީގަލް ހިލްސް ކުންފުންޏަށް ރަސްމާލެ މަޝްރޫއުގެ ދަށުން 99 އަހަރަށް ބިން ދޫކުރުމާއި، އެތަން ބައިބައިކޮށް އެޕާޓްމަންޓު ހަދައިގެން އެތައް ހާސް ބޭރު މީހުންނަށް ވަކިވަކިން އެތަން ވިއްކަމުންދާ މައްސަލައިގައި ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. ފައްޔާޒު ވިދާޅުވީ ކޮންމެ ފަހަރަކު އެގްރީމަންޓު ބަދަލުވަމުންދާއިރު މިއީ ނުސީދާގޮތުން ދާއިމަށް ބިން މިލްކުކޮށްދިނުން ފަދަ ކަމަކަށް ވެގެންދާ ކަމަށާއި، މިފަދަ ބޮޑެތި މަޝްރޫއުތަކުގައި ސަރުކާރުން ރައްޔިތުންނަށް ދޭ ޖަވާބުތައް ސާފުނުވާ ކަމަށެވެ. އަދި އީގަލް ހިލްސްގެ ވެބްސައިޓުގައިވާ ގޮތުން ދާއިމަށް ބިން ލިބެނީތޯ އުފެދޭ ސުވާލުތަކަށް ސަރުކާރުން ސާފު ޖަވާބެއް ނުދޭ ކަމަށް ފާހަގަކުރެއްވި އެވެ.
މީގެކުރިން ޖީއެމްއާރަށް 25 އަހަރަށް އަމިއްލަ ޚަރަދުގައި އެއާޕޯޓެއް ހަދައި ޖައްސަން ދިނުމުން "ގައުމު ވިއްކާލީ" ކަމަށް ބުނެ، ދީނާއި ގައުމިއްޔަތުގެ ނަމުގައި އަޑުއުފުލި ފަރާތްތަކުން، މިއަދު މިފަދަ ކަންކަން ކުރާއިރު ދީނާއި ގައުމިއްޔަތާ ޚިލާފުވަމުންދާ ކަމަށް ފައްޔާޒު ވިދާޅުވި އެވެ. އެންމެ ބޮޑު ކަންބޮޑުވުމަކީ ދާއިމަށް ބޭރު ބަޔަކަށް ދިވެހިރާއްޖޭގެ ބިން ދެނީތޯ ކަމަށާއި، ދިވެހި ރައްޔިތުން މިކަމާ މެދު ހިތްހަމަނުޖެހޭ ކަމަށް ފައްޔާޒު ވިދާޅުވި އެވެ.
ކުރީގެ އިކޮނޮމިކް މިނިސްޓަރ ފައްޔަޒް އިސްމާއިލް
ސަރުކާރުން މިފަދަ ބޮޑު ކަމެއް ބޭނުންވާ ކަމަށްވާނަމަ ރައްޔިތުންނާ ހަމައަށް އޭގެ ވަކާލާތު ގެންގޮސް، ރައްޔިތުންނަށް އެނގިގެން، އަދި ރައްޔިތުންގެ ރުހުން ލިބިގެން ނޫނީ ކޮށްގެންނުވާނެ ކަމަށް ވެސް ފައްޔާޒު ވިދާޅުވި އެވެ. ޤާނޫނުއަސާސީއަށް ބަދަލު ގެނެސް، މަޖިލީހުގެ ސުޕަމެޖޯރިޓީ އޮވެގެން 5 މިނެޓު ތެރޭގައި އެކަން ނުކޮށް، ރައްޔިތުންނާ ހިސާބަށް މި ވާހަކަ ދައްކަން މަސް ދުވަހުގެ މުއްދަތެއްދީ، ސަރުކާރަށާއި އިދިކޮޅު ފަރާތްތަކަށް ވާހަކަ ދެއްކުމުގެ ފުރުސަތު ދީގެން ރައްޔިތުން ނިންމާ ގޮތަކަށް އަމަލުކުރަންޖެހޭނެ ކަމަށް ވެސް ފައްޔާޒު ވިދާޅުވި އެވެ.
އެންމެ ބޮޑު ކަންބޮޑުވުމަކީ ދާއިމަށް ބޭރު ބަޔަކަށް ދިވެހިރާއްޖޭގެ ބިން ދެނީތޯ. އެކަމުވެސް އަޅުގަނޑު ދެކޭގޮތުގައި އަޅުގަނޑަށް އެހާ ގަބޫލު ކަމެއް ނޫން. އަޅުގަނޑަށް ފެނުނު ތަނުގަ ދިވެހި ރައްޔިތުން އެކަމަށް ގަބޫލެއް ނޫން. އެހެންވީމާ ސަރުކާރުން އެކަން ބޭނުންވާ ކަމަށް ވަންޏާމުން، ދިވެހި ރައްޔިތުންނާ ހަމައަށް އޭގެ ވަކާލާތު ގެންގޮސްގެން، ދިވެހި ރައްޔިތުންނަށް ކޮންވިންސް ކޮށްދީގެން، ދިވެހި ރައްޔިތުންނަށް އެނގިގެން، ދިވެހި ރައްޔިތުންގެ ރުހުން ލިބިގެން އެކަން ކުރަން ވާނީފައްޔާޒު އިސްމާއީލް
ދިވެހި ރައްޔިތެއް ނޫން މީހަކަށް ދިވެހިރާއްޖޭގެ ބިމެއް ދާއިމަށް ލިބުމަކަށް ގަބޫލުނުވާކަން ފާހަގަކުރައްވާ ތާރީޚަށް އަލިއޅުއްވާލައްވަމުން ފައްޔާޒު ވިދާޅުވީ މީގެ ދެތިން ސަތޭކަ އަހަރު ކުރިން އޮޓޮމަން އެމްޕަޔަރުގެ ދަށުގައި ފަލަސްތީނު އޮތް އިރު ޒަޔަނިސްޓު އޯގަނައިޒޭޝަންތަކުން ބިންތައް ގަންނަން ފަށައި، މަޑުމަޑުން 200 އަހަރުވިއިރު މިއަދު އެކަން ބޮޑު މައްސަލައަކަށްވެ އެމީހުންނަށް އެ ބިމަށް ހައްގުތަކެއް ލިބިފައިވާ ފަދައިން ކަންކަން ހިނގައިދާނެ ކަމަށެވެ.
އެހެންވީމާ ސިޓީޒަންޝިޕް ނެތް ބަޔަކަށް މިގޮތަށް ދާއިމަށް މިތަން ދެވިއްޖެ ކަމަށް ވާނަމަ، އޭގެ ތެރޭގަ މުސްލިމް ނޫން މީހުންނާ މިހުރިހާ އެންމެން އުޅޭނެތާ. އެހެން ކަމަށް ވެއްޖެޔާ ވަރަށް ނުބައި އެއްޗެއް އެ އުފެދެނީ. ދުނިޔޭގެ ކަންކަން އޮންނަ ގޮތް އެނގޭ. ދުނިޔޭގެ ބާރުގަދަ ގައުމުތަކުން އެހިސާބުން ޔޫއެން ގަ ބުނެފާނެ މިހާރު މިތާނގަ މިތިބަ 1000 މީހުންނަކީ މިސާލަކަށް ކްރިސްޓިއަނުންނާ ޔަހޫދީންނާ، ދެން މުސްލިމް ނޫން މީހުން، އެހެން ގައުމުތަކުގެ ރައްޔިތުންތަކެއްގެ ހައްގުތަކެއް ވެއޭ. ތިހެނެއް ނުހެދޭނެ އޭ. ތި ގާނޫނުތައް ބަދަލުކުރާށޭ އެމީހުންގެ ދީން މިސާލަކަށް މިތަނުގަ ޕްރެކްޓިސް ކުރެވެން ޖެހޭނެ އޭ. އެއީކީ މާދަމާ އަކު ވާނެ ކަމެއް ނޫން. މަޑުމަޑުން މަޑުމަޑުން ގޮސް، އަހަރުތަކަކުން ގޮސް، ގަރުނު ތަކަކުން ގޮސް، އެކަމާ ދިމާލަށް ދާނީ. އެއީ ވަރަށް ބިރުވެރި ކަމެއްފައްޔާޒު އިސްމާއީލް
ސިޓިޒަންޝިޕް ނެތް ބަޔަކަށް މިގޮތަށް ދާއިމަށް މިތަން ދެވިއްޖެނަމަ، އެމީހުންގެ ތެރޭގައި މުސްލިމް ނޫން މީހުންނާއި އެކި ގައުމުތަކުގެ މީހުން ހިމެނޭނެ ކަމަށާއި، މުސްތަގުބަލުގައި ދުނިޔޭގެ ބާރުގަދަ ގައުމުތަކުންނާއި ޔޫއެން މެދުވެރިކޮށް އެތާ ތިބި މީހުންނަށް ދީނީ އަދި އެހެނިހެން ހައްގިތަކާއި ގާނޫނީ ބަދަލުތައް ގެންނަންޖެހޭނެ ކަމަށް ބުނެ ބާރުއަޅާނެ ކަމަށް ވެސް ފައްޔާޒު ވިދާޅުވި އެވެ. މިއީ މާދަމާ ވާނެ ކަމެއް ނޫން ނަމަވެސް، އަހަރުތަކާއި ގަރުނުތައް ފާއިތުވަމުންދާ ވަރަކަށް މިކަން ބިރުވެރި މިސްރާބަކަށް ގޮސްދާނެ ކަމަށް ވިދާޅުވެ ފައްޔާޒު ވަނީ ނުރައްކަލުގެ އިންޒާރު ދެއްވާފަ އެވެ.
