ސިނަމާލެ ބްރިޖުގެ ތަނބުގައި ޖެހުނު 2 ބޯޓު ވެސް އަޑިއަށް ގޮސްފި
11 ސެޕްޓެމްބަރު 2026 | ހުކުރު 18:20މާލެއަށް ކުރި ވިއްސާރައިގައި ކަސްޓަމްސްގެ ބެލުމުގެ ދަށުގައި އޮތް ދެ އުޅަނދެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހުނު ނަމަވެސް، ބްރިޖުގެ އޮނިގަނޑަށް ބޮޑު ގެއްލުމެއް ލިބިފައިނުވާކަމަށް ސަރުކާރުން ވަނީ ހާމަކޮށްފައި. މި ހާދިސާގައި ބްރިޖުގެ ބޭރު ފަށަލައަށް ލިބުނު ކުދި ގެއްލުންތައް މަރާމާތުކުރުމުގެ މަސައްކަތް ކުރަމުންދާއިރު، އޮޔާދިޔަ ދެ އުޅަނދު މިހާރު ވަނީ ކަނޑުގެ އަޑިއަށް ގޮސްފައި
ބްރިޖުގެ ތަނބަށް އުރުނީ ކަސްޓަމްސްގެ ބެލުމުގެ ދަށުގައި އޮތް 2 ބޯޓު، އެ 2 ބޯޓު ވެސް މިހާރު ވަނީ އަޑިއަށް ގޮސްފައި | ރާއްޖެ ޓީވީ
ޓަގު ބޯޓުތަކެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހުނު ހާދިސާގައި ބްރިޖުގައި ޖެހުނު 2 ބޯޓު ވެސް ދިޔަވެ، އަޑިއަށް ގޮސްފައިވާ ކަމަށް އެމްއެންޑީއެފް އިން ބުނެފި އެވެ.
ބުރާސްފަތި ދުވަހުގެރޭ މާލެއަށް ކުރި ގަދަ ވިއްސާރައިގައި ކަސްޓަމްސްގެ ބެލުމުގެ ދަށުގައި އޮތް ތެޔޮ އުފުލާ ބާޖަކާއި ޓަގު ބޯޓެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހިފައިވާއިރު، އެމްއެންޑީއެފް އިން ރާއްޖެއެމްވީ އަށް މައުލޫމާތު ދެމުން ބުނެފައި ވަނީ، ބްރިޖުގައި ޖެހިފައި ވަނީ ކަސްޓަމްސްގެ ބެލުމުގެ ދަށުގައި އޮތް 2 އުޅަނދެއް ކަމަށެވެ.
މި ދެ އުޅަނދު އޮޔާދިޔައީ މާލެ ސަރަހައްދަށް ކުރި ވިއްސާރައިގައި އައި ބާރުގަދަ ކޮޅިގަނޑެއްގައި ނަގިލި ކަނޑައިގެން ދިއުމުގެ ސަބަބުން ކަމަށް މައުލޫމާތު ލިބެ އެވެ.
މިކަމުގެ އެންމެ ފަހުގެ މައުލޫމާތު ހިއްސާކޮށް އެމްއެންޑީއެފް އިން ބުނީ ތެޔޮއުފުލާ މި 2 ބޯޓަކީ ވަރަށް ބައުވެފައިވާ 2 ބޯޓަށް ވުމާއިއެކު، މި 2 ބޯޓުވަނީ ދިޔަވެ، މާލެ އަތޮޅުގެ އިރުން، ރާއްޖޭގެ ސަރަހައްދުން 30 ނޯޓިކަލްމޭލު ބޭރަށް އަޑިއަށް، ހުކުރު ދުވަހުގެ ރޭގެ ވަގުތެއްގައި ގޮސްފައިވާ ކަމަށެވެ.
އެމްއެންޑީއެފް އިން ބުނީ މާލޭ ބަނދަރުގައި އޮތް 2 ބޯޓު، ސެޕްޓެމްބަރު 10 ވަނަ ދުވަހުގެރޭ ބުރިޖުގެ ދަށުން އޮޔާގޮސް މާލެއަތޮޅުން ބޭރަށްދާތީ، ބޯޓުގައި ތިބި 9 ފަޅުވެރިން ސަލާމަތް ކޮށްފައިވާ ކަމަށެވެ.
މި ހާދިސާ އާ ގުޅިގެން ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވީ ޓަގު ބޯޓެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހުނު ހާދިސާގައި ބްރިޖުގެ އޮނިގަނޑަށް އެއްވެސް ގެއްލުމެއް ލިބިފައެއް ނުވާ ކަމަށާއި، ނަމަވެސް ބްރިޖުގެ ބޭރު ފަށަލައަށް ކުދިކުދި ގެއްލުންތަކެއް ލިބިފައިވާ ކަމަށެވެ.
"އެކްސް" ގައި ކުރެއްވި ޕޯސްޓެއްގައި މިނިސްޓަރު މުއްތަލިބު ވިދާޅުވީ، ބްރިޖު އިމާރާތްކުރި ޗައިނާގެ ސެކަންޑް ހާބަރ އިންޖިނިއަރިންގ ކޮމްޕެނީ (އެސްއެޗްއީސީ) ގެ އިންޖިނިއަރުން ވަނީ ބުރާސްފަތި ދުވަހުގެރޭގެ ވަގުތެއްގަ އާއި ހުކުރު ދުވަހު ހެނދުނު ބްރިޖުގެ އިންސްޕެކްޝަންތަކެއް ކުރިއަށް ގެންގޮސްފައި ކަމަށެވެ.
ޗައިނާ ސަރުކާރުގެ ހިލޭ އެހީގެ ދަށުން އެސްއެޗްއީސީ އާއެކު ގާއިމުކޮށްފައިވާ ބްރިޖު ބެލެހެއްޓުމާއި މަރާމާތުކުރުމުގެ އެއްބަސްވުމުގެ ދަށުން، އެ ކުންފުނިން ކަނޑައެޅިފައިވާ މިންގަނޑުތަކާ އެއްގޮތަށް އެ ތަންތަން މަރާމާތު ކުރާނެ ކަމަށް މިނިސްޓަރު މުއްތަލިބު ވިދާޅުވި އެވެ.
މިނިސްޓަރު މުއްތަލިބު ވިދާޅުވީ، މާލެ ސަރަހައްދުގައި ކޮންޓްރޯލުން ނެއްޓިގެންދާ އުޅަނދެއްގެ ސަބަބުން، ސިނަމާލެ ބްރިޖާއި، ހުޅުލެ-ހުޅުމާލެ ގުޅުވައިދޭ ބްރިޖާއި ވެލާނާ އިންޓަރނޭޝަނަލް އެއާޕޯޓުގެ އިތުރުން މުހިންމު އެހެނިހެން ވަސީލަތްތަކަށް ގެއްލުންވުމުގެ ފުރުސަތު އެބައޮތް ކަމަށާއި، މިއީ މުޅި މާލެ ސަރަހައްދުގެ ދިރިއުޅުމަށް ބޮޑު އަސަރެއް ކުރާނެ ފަދަ ކާރިސާއެއް ކަމަށެވެ.
