ތާވަލާ އެއްގޮތަށް އާރަށާއި ފުއްގިރި މައްސަލަ އަވަހަށް ނިންމައިދިނުމަށް ރައީސް ޔާމީން ގޮވާލައްވައިފި
18 ސެޕްޓެމްބަރު 2026 | ހުކުރު 12:31އެމްއެމްޕީއާރުސީގެ ޚިޔާނާތުގެ މައްސަލާގައި ހިމެނޭ އަދީބާއި ޒިޔަތަކީ ކުށް ސާބިތުވެފައިވާ "ވަގުން" ކަމަށް ސިފަކުރައްވައި، އެ މީހުންގެ ހެކިބަހަށް ބިނާކޮށް ޝަރީއަތްތައް ދިގުދަންމާތީ ކުރީގެ ރައީސް ޔާމީން ވަނީ ކަންބޮޑުވުން ފާޅުކުރައްވާފައި. މި ވައްކަމުގެ މަންފާ ލިބުނު މީހުން މިހާރުގެ ސަރުކާރުގައި ތިބިކަމަށް ތުހުމަތުކުރައްވަމުން، ޔާމީން ގޮވާލެއްވީ ކޯޓުގައި ހުރި އެ މަނިކުފާނުގެ މައްސަލަތައް އަވަހަށް ނިންމައިދިނުމަށް
ކުރީގެ ރައީސް އަބްދުﷲ ޔާމީން | ސޯޝަލް މީޑިއާ
ކްރިމިނަލް ކޯޓުގައި ތާވަލުކުރެވިފައިވާ ގޮތަށް ވ. އާރަށާއި ރ. ފުއްގިރި މައްސަލައިގެ ޝަރީއަތްތައް އަވަހަށް ނިންމައިދިނުމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ގޮވާލައްވައިފި އެވެ.
ޕީޕަލްސް ނެޝަނަލް ފްރަންޓް (ޕީއެންއެފް) ގެ ފްރޮންޓް އޮފީހުގައި ބުރާސްފަތި ދުވަހު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އެ މަނިކުފާނު ބޭނުންފުޅުވަނީ މި މައްސަލަތަކަކީ މާޒީއަށް ވެގެން ދިއުން ކަމަށާއި މައްސަލަތައް ދަންމަމުން ގެންދިއުމުގެ ބޭނުމެއް ނެތް ކަމަށެވެ. އަދި ޝަރީއަތްތައް ދިގުލައިގެން ގޮސް، ދެންވެސް ވެރިކަން ކުރަން އުޅެނީ ޖަލުގައި އޮވެގެންތޯ ސުޕްރީމް ކޯޓުގެ ފަނޑިޔާރަކު އެ މަނިކުފާނާ ސުވާލުކުރަން ބޭނުންފުޅު ނުވާ ކަމަށް ވެސް ވިދާޅުވި އެވެ.
ރައީސް ޔާމީން އިތުރަށް ވިދާޅުވީ، އެ މަނިކުފާނާ ދެކޮޅަށް ހެކިބަސް ދޭން ތިބީ އެމްއެމްޕީއާރުސީގެ އެންމެ ބޮޑު ވައްކަން ކުރި ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު ކަމަށެވެ. މި ދެ މީހުންނަކީ ކޯޓުގައި އިއުތިރާފުވެ، ކުށް ސާބިތުވެފައިވާ ދެ މީހުން ކަމަށާއި ނަމަވެސް މިއަދު އެ ދެ މީހުންނަކީ މިނިވަނުން ކަމަށެވެ. އެ މަނިކުފާނާ ދެކޮޅަށް ހެކިބަސް ދޭން ތިބީ މި ދެ "ވަގުން" ކަން ނޭނގޭ ފަނޑިޔާރަކު ވެސް ނުހުންނަވާނެ ކަމަށް ޔާމީން ވިދާޅުވި އެވެ.
އެންމެ ބޮޑެތި ވައްކަން ކޮށްފަ ތިބި ދެ ވަގުންނަކީ އަދީބުއާ ޒިޔަތު. ދެ ވަގުންގެ ހެކިބަސް މިއޮތީ އަޅުގަނޑާ ދެކޮޅަށް. ޝަފައީ ހެކިންނަށް މިއޮތީ އަދީބާ އެބުނާ ޒިޔަތަކާ. މިއީ ގުޅިގެން އެމްއެމްޕީއާރުސީ ވައްކަން ކުރި ދެ މީހުންނަކީ. ކޯޓުގަ އިއުތިރާފްވެ މަތިމައްޗަށް ކުށް ސާބިތުވި. އަދީބަކީ މިއަދު މިނިވަނެއް. ޒިޔަތަކީ މިނިވަނެއް. މި ދެ ވަގުންގެ ހެކިބަހަށް މި ދެވަގުން ބުނާ އެއްޗަކަށް ބިނާކޮށް އަޅުގަނޑު މިދަމަނީ. މިކަން ނޭނގޭ ފަނޑިޔާރަކު ނުހުންނާނެރައީސް ޔާމީން
މީގެއިތުރުން، އަދީބުގެ އަރިހުގައި އުޅުނު ސިޔާސީ ބޭފުޅުންނާއި ރައްޔިތުންގެ މަޖިލީހުގެ މެންބަރުން އަދި އެ ވައްކަމުގެ މަންފާ ލިބުނު މީހުންގެ ނަންތަކާއި ފޮޓޯތައް ހުރި ނަމަވެސް، އެއިން އެއްވެސް މީހަކު ތަނަކަށް ހާޒިރުކޮށް ސުވާލުވެސް ކޮށްނުލާ ކަމަށް ރައީސް ޔާމީން ވިދާޅުވި އެވެ. އަދި އެ ބޭފުޅުން ގޭގައި އަރާމުގައި ތިއްބެވިއިރު، އެ މަނިކުފާނު ކޯޓުތަކަށް ދަމަނީ މި ދެ މީހުންގެ ޝަފަޢީ ހެކިބަހުގެ މައްޗަށް ކަމަށް ވިދާޅުވެ ކަންބޮޑުވުން ފާޅުކުރެއްވި އެވެ.
ރައީސް ޔާމީން ވިދާޅުވި ގޮތުގައި އެ މަނިކުފާނުގެ މައްސަލަ ކުރިއަށް ގެންދިއުމަކީ މައްސަލައެއް ނޫނެވެ. ނަމަވެސް، މަނީ ލޯންޑަރ ކޮށްފައިވާ މީހުންނާއި އެމްއެމްޕީއާރުސީގެ ފައިސާ ލިބުނު ބޮޑުން މިހާރު ތިބީ ރައީސް ޑރ. މުހައްމަދު މުއިއްޒާ އެކުގައި ކަމަށް އެ މަނިކުފާނު ތުހުމަތު ކުރެއްވި އެވެ. އަދި އެމްއެމްޕީއާރުސީގެ މައްސަލަ ބަލަން ކެރޭނެ ކަމަށް ރައީސް މުއިއްޒު ދެ ފަހަރަށް ވިދާޅުވި ނަމަވެސް، އެ މައްސަލަ ބަލާތަން ފެނިވަޑައިނުގަންނަވާ ކަމަށްވެސް ރައީސް ޔާމީން ވިދާޅުވި އެވެ.
