ލަންކާގައި އޮތް މުބާރާތަކުން އުމުރުން ނުވަ އަހަރުގެ އާލިޔާ ރަން މެޑަލް ހޯދައިފި
15 ސެޕްޓެމްބަރު 2026 | އަންގާރަ 04:36ސަރފިން ފެޑެރޭޝަން އޮފް ސްރީ ލަންކާ އިން އިންތިޒާމުކޮށްގެން ބޭއްވި މި މުބާރާތުގައި ވާދަކޮށް އަލްޔާ ރަން މެޑަލް ހޯދާފައި ވަނީ އަންހެން އޯޕަން ކެޓަގަރީ އިން
ލަންކާގައި ކުރިއަށް ދިޔަ މުބާރާތެއްގައި ވާދަކޮށް ރަން މެޑަލް ހޯދި ރާއްޖޭގެ އާލިޔާ | ސޯޝަލް މީޑިއާ
ސްރީ ލަންކާގައި ކުރިއަށް ދިޔަ ސަރފިން ޗެމްޕިއަންޝިޕެއްގައި ވާދަކޮށް ރާއްޖޭގެ އުމުރުން ނުވަ އަހަރުގެ އާލިޔާ ލަތީފް ރަން މެޑަލް ހޯދައިފި އެވެ.
ސަރފިން ފެޑެރޭޝަން އޮފް ސްރީ ލަންކާ އިން އިންތިޒާމުކޮށްގެން ބޭއްވި މި މުބާރާތުގައި ވާދަކޮށް އަލްޔާ ރަން މެޑަލް ހޯދާފައި ވަނީ އަންހެން އޯޕަން ކެޓަގަރީ އިންނެވެ. މި ކެޓަގަރީގެ ފައިނަލްގައި އާލިޔާ ވާދަކޮށްފައި ވަނީ ލަންކާގެ އެންމެ ފަހުގެ ޖޫނިއާ ޗެމްޕިއަން ކަމަށްވާ ސަޔުނީ އަންޖަނާއާ އެވެ.
މިއީ އުމުރުން އެންމެ ނުވަ އަހަރުގެ އާލިޔާގެ ސަރފިން ކެރިއަރުގައި ހޯދި ބޮޑު ކާމިޔާބެކެވެ. އަދި ބައިނަލްއަޤުވާމީ މުބާރާތެއްގައި ވާދަކޮށް ވެސް ހޯދި ފުރަތަމަ ކާމިޔާބެވެ. މީގެ ކުރިން އާލިޔާ ވަނީ ރާއްޖޭގައި އޮތް ބައެއް މުބާރާތްތަކުގައި ވާދަކޮށް ވެސް ކާމިޔާބީ ހޯދައިފަ އެވެ. އެގޮތުން 2025 ވަނަ އަހަރު އޮތް ޤައުމީ ޖޫނިއާ ސާފިން ޗެމްޕިއަންޝިޕްގައި ވެސް އާލިޔާ ވާދަކޮށްފައިވެ އެވެ.
ފުރަތަމަ ފަހަރަށް ބޭއްވި ޤައުމީ ޖޫނިއާ މުބާރާތުގެ 18 އަހަރުން ދަށުގެ އަންހެން ކެޓަގަރީގައި އާލިޔާ ވާދަކުރިއިރު، އާލިޔާ ވަނީ އެ ކެޓަގަރީގެ ރަން މެޑަލް ހޯދައިފަ އެވެ.
