އޭޝިއަން ގޭމްސްގައި ވާދަކުރުމަށް ރާއްޖޭގެ ސާފިން ޓީމު ޖަޕާން އަށް ފުރައިފި
12 ސެޕްޓެމްބަރު 2026 | ހޮނިހިރު 09:06އޭޝިއަން ގޭމްސްގައި ވާދަކުރާ ރާއްޖޭގެ ޤައުމީ ސާފިން ޓީމުގައި ހިމެނެނީ ހަތަރު އެތުލީޓުން. އެއީ ޔަސީން އަޙުމަދު ނާޝިދު، ކަޔާން ޢަބްދުﷲ އަރީފް، އާމިނަތު ތާނީސް ޝިރަން އަދި މަރިޔަމް ރާހިލް ނަސީމް
އޭޝިއަން ގޭމްސްގައި ވާދަކުރާ ރާއްޖޭގެ ޤައުމީ ސާފިން ޓީމު | ސޯޝަލް މީޑިއާ
މި މަހު އޮންނަ އޭޝިއަން ގޭމްސްގައި ވާދަކުރުމަށް ރާއްޖޭގެ ޤައުމީ ސާފިން ޓީމު ޖަޕާން އަށް ފުރައިފި އެވެ.
ސާފިން އެސޯސިއޭޝަން އޮފް މޯލްޑިވްސް އިން ހާމަކޮށްފައިވާ ގޮތުގައި ޤައުމީ ސާފިން ޓީމު ޖަޕާން އަށް ފުރާފައި ވަނީ ހޮނިހިރު ދުވަހު އެވެ. މި ދަތުރުގައި އޭޝިއަން ގޭމްސް އަށް ތައްޔާރުވުމުގެ ގޮތުން ޤައުމީ ސާފިން ޓީމުން ޓްރެއިނިން ތަކެއް ކުރިއަށް ގެންދިޔުމަށް ވެސް ވަނީ ހަމަޖެހިފަ އެވެ.
އޭޝިއަން ގޭމްސްގައި ވާދަކުރާ ރާއްޖޭގެ ޤައުމީ ސާފިން ޓީމުގައި ހިމެނެނީ ހަތަރު އެތުލީޓުންނެވެ. އެއީ ޔަސީން އަޙުމަދު ނާޝިދު، ކަޔާން ޢަބްދުﷲ އަރީފް، އާމިނަތު ތާނީސް ޝިރަން އަދި މަރިޔަމް ރާހިލް ނަސީމް އެވެ. ސާފިންގެ މެންސް އޯޕަން އަދި ވިމެންސް އޯޕަންގައި ރާއްޖެ އިން ވާދަކުރާނެ އެވެ.
އޭޝިއަން ގޭމްސްގައި ރާއްޖެ އިން ހަތް ކުޅިވަރެއްގައި ވާދަކުރާނެ އެވެ. އެއީ ބެޑްމިންޓަން، އެތުލެޓިކްސް، ބީޗު ވޮލީ ބޯޅަ، ޓީޓީ، ޝޫޓިން، ސްވިމިން އަދި ސާފިން އެވެ. މިއަހަރުގެ އޭޝިއަން ގޭމްސް އޮތީ މި ހިނގާ ސެޕްޓެމްބަރު މަހުގެ 19 ވަނަ ދުވަހުން ފެށިގެން، އަންނަ އޮކްޓޫބަރު މަހުގެ ހަތަރު ވަނަ ދުވަހުގެ ނިޔަލަށް، ޖަޕާންގެ އައިޗީ އަދި ނަގޯޔާގަ އެވެ.
