އޭޝިއަން ގޭމްސްގައި ރާއްޖޭގެ ދިދަ އުފުލާނީ މުންސިފް އާއި އީޝަލް، އަދި ޔޫތު އޮލިމްޕިކްސްގައި ރާއްޖޭގެ ދިދަ އުފުލާނީ ލޫތު އާއި ތަޒްކިޔާ
10 ސެޕްޓެމްބަރު 2026 | ބުރާސްފަތި 07:48އޭޝިއަން ގޭމްސްގައި ރާއްޖެ އިން ހަތް ކުޅިވަރެއްގައި ވާދަކުރާނެ. އެއީ ބެޑްމިންޓަން، އެތުލެޓިކްސް، ބީޗު ވޮލީ ބޯޅަ، ޓީޓީ، ޝޫޓިން، ސްވިމިން އަދި ސާފިން. ޔޫތު އޮލިމްޕިކް ގޭމްސްގައި ރާއްޖެ އިން ވާދަކުރާނީ ސްވިމިންގައި އެކަނި
ރާއްޖޭގެ ކުޅުންތެރިންނަށް ދިދަ ހަވާލު ކުރުމަށް ބޭއްވި ރަސްމިއްޔާތުގެ ތެރެއިން | މިނިސްޓްރީ އޮފް ޔޫތު އެމްޕަވަމަންޓް، ސްޕޯޓްސް އެންޑް ފިޓްނަސް
މި މަހު އޮންނަ އޭޝިއަން ގޭމްސްގައި ރާއްޖޭގެ ދިދަ އުފުލުމުގެ ޝަރަފު ޓޭބަލް ޓެނިސް (ޓީޓީ) ކުޅުންތެރިޔާާ މޫސާ މުންސިފް އަހުމަދު އާއި ޝޫޓިންގެ މަރިޔަމް އީޝަލް އައްބާސް އަށް ލިބިއްޖެ އެވެ.
މިއަހަރުގެ އޭޝިއަން ގޭމްސް އޮތީ މި ހިނގާ ސެޕްޓެމްބަރު މަހުގެ 19 ވަނަ ދުވަހުން ފެށިގެން، އަންނަ އޮކްޓޫބަރު މަހުގެ ހަތަރު ވަނަ ދުވަހުގެ ނިޔަލަށް، ޖަޕާންގެ އައިޗީ އަދި ނަގޯޔާގަ އެވެ. އޭޝިއަން ގޭމްސްގައި ރާއްޖޭގެ ދިދަ އުފުލާ މުންސިފް އާއި އީޝަލް އަށް ދިދަ ހަވާލު ކޮށްދެއްވީ ކުޅިވަރު ވަޒީރު ޢަބްދުﷲ ރާފިއު އެވެ.
ޔޫތު އޮލިމްޕިކް ގޭމްސް އޮތީ އަންނަ އޮކްޓޫބަރު މަހުގެ 31 ވަނަ ދުވަހުން ފެށިގެން، ނޮވެމްބަރު މަހުގެ 13 ވަނަ ދުވަހުގެ ނިޔަލަށް، ސެނެގާލްގެ ޑަކާރުގައި އެވެ. ޔޫތު އޮލިމްޕިކް ގޭމްސްގައި ރާއްޖޭގެ ދިދަ އުފުލުމުގެ ޝަރަފު ދީފައި ވަނީ ލޫތު މުހައްމަދު ހުސެއިން އާއި އަމްނާ ތަޒްކިޔާ މިރުސާދު އަށެވެ.
އޭޝިއަން ގޭމްސްގައި ރާއްޖެ އިން ހަތް ކުޅިވަރެއްގައި ވާދަކުރާނެ އެވެ. އެއީ ބެޑްމިންޓަން، އެތުލެޓިކްސް، ބީޗު ވޮލީ ބޯޅަ، ޓީޓީ، ޝޫޓިން، ސްވިމިން އަދި ސާފިން އެވެ. ޔޫތު އޮލިމްޕިކް ގޭމްސްގައި ރާއްޖެ އިން ވާދަކުރާނީ ސްވިމިންގައި އެކަނި އެވެ.
ދެ ގޭމްސްގައި ދިދަ އުފުލާ ދިވެހި އެތުލީޓުންނަށް ދިދަ ހަވާލު ކޮށްދެއްވުމަށް ފަހު ވަޒީރު ރާފިއު ވަނީ ދިވެހި ޓީމަށް ކާމިޔާބަށް އެދިވަޑައިގެންފަ އެވެ.
