ބްރިޖުގެ އޮނިގަނޑަށް އެއްވެސް ގެއްލުމެއް ލިބިފައެއް ނުވޭ، ނަމަވެސް ބްރިޖުގެ ބޭރު ފަށަލައަށް ކުދިކުދި ގެއްލުންތަކެއް ލިބުނު: މިނިސްޓަރު މުއްތަލިބު
11 ސެޕްޓެމްބަރު 2026 | ހުކުރު 11:59ސިނަމާލެ ބްރިޖަށް ކުރިމަތިވެދާނެ ނުރައްކާތަކުން ރައްކާތެރިވުމަށްޓަކައި، އޮޔާދާ އުޅަނދުފަހަރު ހިފެހެއްޓޭނެ ފަދަ ބާރުގަދަ ދެ ޓަގު ބޯޓު ހޯދުމުގެ މަސައްކަތް އެމްޕީއެލް އިން ދަނީ ކުރަމުންކަމުގައި މިނިސްޓަރު ވިދާޅުވި. މީގެ އިތުރުން، އުޅަނދުފަހަރު އަޅާފައި ބެހެއްޓުމުގެ އުސޫލުތައް މުރާޖައާކޮށް، ކުއްލި ހާލަތްތަކުގައި ކަމާބެހޭ އިދާރާތަކުން އަމަލުކުރާނެ ހަރުދަނާ ނިޒާމެއް ސަރުކާރުން އެކުލަވާލާނެކަމަށް ވެސް ވިދާޅުވި
ބްރިޖުގެ އޮނިގަނޑަށް އެއްވެސް ގެއްލުމެއް ލިބިފައެއް ނުވޭ، ނަމަވެސް ބްރިޖުގެ ބޭރު ފަށަލައަށް ކުދިކުދި ގެއްލުންތަކެއް ލިބުނު: މިނިސްޓަރު މުއްތަލިބު | ރާއްޖެ އެމްވީ
ޓަގު ބޯޓެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހުނު ހާދިސާގައި ބްރިޖުގެ އޮނިގަނޑަށް އެއްވެސް ގެއްލުމެއް ލިބިފައެއް ނުވާ ކަމަށާއި، ނަމަވެސް ބްރިޖުގެ ބޭރު ފަށަލައަށް ކުދިކުދި ގެއްލުންތަކެއް ލިބިފައިވާ ކަމަށް ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ހުކުރު ދުވަހު "އެކްސް" ގައި ކުރެއްވި ޕޯސްޓެއްގައި މިނިސްޓަރު މުއްތަލިބު ވިދާޅުވީ، ބްރިޖު އިމާރާތްކުރި ޗައިނާގެ ސެކަންޑް ހާބަރ އިންޖިނިއަރިންގ ކޮމްޕެނީ (އެސްއެޗްއީސީ) ގެ އިންޖިނިއަރުން ވަނީ ބުރާސްފަތި ދުވަހުގެރޭގެ ވަގުތެއްގަ އާއި ހުކުރު ދުވަހު ހެނދުނު ބްރިޖުގެ އިންސްޕެކްޝަންތަކެއް ކުރިއަށް ގެންގޮސްފައި ކަމަށެވެ.
ޗައިނާ ސަރުކާރުގެ ހިލޭ އެހީގެ ދަށުން އެސްއެޗްއީސީ އާއެކު ގާއިމުކޮށްފައިވާ ބްރިޖު ބެލެހެއްޓުމާއި މަރާމާތުކުރުމުގެ އެއްބަސްވުމުގެ ދަށުން، އެ ކުންފުނިން ކަނޑައެޅިފައިވާ މިންގަނޑުތަކާ އެއްގޮތަށް އެ ތަންތަން މަރާމާތު ކުރާނެ ކަމަށް މިނިސްޓަރު މުއްތަލިބު ވިދާޅުވި އެވެ.
މިނިސްޓަރު މުއްތަލިބު ވިދާޅުވީ، މާލެ ސަރަހައްދުގައި ކޮންޓްރޯލުން ނެއްޓިގެންދާ އުޅަނދެއްގެ ސަބަބުން، ސިނަމާލެ ބްރިޖާއި، ހުޅުލެ-ހުޅުމާލެ ގުޅުވައިދޭ ބްރިޖާއި ވެލާނާ އިންޓަރނޭޝަނަލް އެއާޕޯޓުގެ އިތުރުން މުހިންމު އެހެނިހެން ވަސީލަތްތަކަށް ގެއްލުންވުމުގެ ފުރުސަތު އެބައޮތް ކަމަށާއި، މިއީ މުޅި މާލެ ސަރަހައްދުގެ ދިރިއުޅުމަށް ބޮޑު އަސަރެއް ކުރާނެ ފަދަ ކާރިސާއެއް ކަމަށެވެ.
އެހެންކަމުން، މިފަދަ ހާދިސާއެއް ހިނގުމުގެ ކުރިން ރައްކާތެރިކަމުގެ ފިޔަވަޅުތައް އެޅުމަކީ ކޮންމެހެން މުހިންމު ކަމެއް ކަމަށް އަދި ސަރުކާރުން މިހާރު ވެސް ދަނީ މިފަދަ ކަންކަމަށް ތައްޔާރުވުމުގެ ގޮތުން އިސްނަގައިގެން މަސައްކަތްތަކެއް ކުރަމުން ކަމަށް މިނިސްޓަރު މުއްތަލިބު ވިދާޅުވި އެވެ.
އެގޮތުން، އޮޔާދާ އުޅަނދުފަހަރު ބްރިޖާ ހަމައަށް ފޯރުމުގެ ކުރިން ހިފެހެއްޓުމުގެ ގާބިލުކަން ހުރި ބާރުގަދަ ދެ ޓަގް ބޯޓު ހޯދުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިހާރު ދަނީ ކުރަމުން ކަމަށް މިނިސްޓަރު މުއްތަލިބު ވިދާޅުވި އެވެ. އަދި ކުރިއަށް އޮތް ދެ މަސްދުވަހުގެ ތެރޭގައި މި ޓަގު ބޯޓުތައް ލިބޭނެ ކަމަށް ބެލެވޭ ކަމަށް ވެސް ވިދާޅުވި އެވެ.
މީގެ އިތުރުން، ބަނދަރުގައި އުޅަނދުފަހަރު އަޅާފައި ބެހެއްޓުމުގެ އިންތިޒާމުތައް އަލުން މުރާޖައާކޮށް، ކޯސްޓްގާޑާއި ކަމާބެހޭ އެހެނިހެން އިދާރާތަކާ ގުޅިގެން ކުއްލި ހާލަތްތަކުގައި މުއާމަލާތް ކުރާނެ ގޮތާއި އަމަލުކުރާނެ ހަރުދަނާ އުސޫލުތަކެއް ސަރުކާރުން އެކުލަވާލާނެ ކަމަށް ވެސް މިނިސްޓަރު މުއްތަލިބު ވިދާޅުވި އެވެ.
މި ހާދިސާއަކީ ބުރާސްފަތި ދުވަހުގެރޭ މާލެއަށް ކުރި ގަދަ ވިއްސާރައިގައި ކަސްޓަމްސްގެ ބެލުމުގެ ދަށުގައި އޮތް ތެޔޮ އުފުލާ ބާޖަކާއި ޓަގު ބޯޓެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހިގެން ހިނގި ހާދިސާއެކެވެ. މި ދެ އުޅަނދު އޮޔާދިޔައީ މާލެ ސަރަހައްދަށް ކުރި ވިއްސާރައިގައި އައި ބާރުގަދަ ކޮޅިގަނޑެއްގައި ނަގިލި ކަނޑައިގެން ދިއުމުގެ ސަބަބުން ކަމަށް މައުލޫމާތު ލިބެ އެވެ.
