ތެލުގެ އަގު 105 ޑޮލަރަށް އުފުލިއްޖެ

އީރާނުގެ ހަނގުރާމަ ފެށުނު ފަހުން މުދާ އުފުލާ ބޯޓުފަހަރަށް ދޭ ހަމަލާތައް ވަރަށް ބޮޑަށް އިތުރުވުމާ ގުޅިގެން، ތެޔޮ ސަޕްލައި ކުރުމަށް ބުރޫއަރާފާނެ ކަމުގެ ބިރު އުފެދި، ބައިނަލްއަގުވާމީ މާކެޓުގައި ތެލުގެ އަގު ހަތަރު އިންސައްތަ އުފުލިއްޖެ އެވެ. މިއާއެކު ބްރެންޓް ކްރޫޑް ފީފާއެއްގެ އަގު ވަނީ 105 ޑޮލަރަށް އަރާފަ އެވެ.

ބުރާސްފަތި ދުވަހުގެ ގްރީނިޗް މީން ޓައިމުން 12:15 އާ ހަމައަށް ބްރެންޓް ކްރޫޑް ފިއުޗާސްގެ އަގު 4.05 ޑޮލަރު ނުވަތަ ހަތަރު އިންސައްތަ އިތުރުވެ، ފީފާއެއްގެ އަގު ހުރީ 105.26 ޑޮލަރުގަ އެވެ. މީގެ އިތުރުން، ވެސްޓް ޓެކްސަސް އިންޓަމީޑިއޭޓް (ޑަބްލިއު.ޓީ.އައި) ކްރޫޑް ފިއުޗާސްގެ އަގު 3.99 ޑޮލަރު ނުވަތަ 4.15 އިންސައްތަ އުފުލި، ފީފާއެއްގެ އަގު 100.04 ޑޮލަރަށް ވަނީ އަރާފަ އެވެ. މިއީ މިދިޔަ މޭ މަހަށްފަހު އެމެރިކާގެ ތެލުގެ އަގު 100 ޑޮލަރަށްވުރެ މައްޗަށް ދިޔަ ފުރަތަމަ ފަހަރެވެ.

އޮގަސްޓް މަހުގެ ކުރީކޮޅު ތެލުގެ އަގު ދަށްވި މިންވަރާ އަޅާބަލާއިރު، މިހާރު ބްރެންޓް ކްރޫޑްގެ އަގު ވަނީ 30 އިންސައްތައަށްވުރެ ބޮޑަށް އުފުލިފަ އެވެ. މިއީ ހަމަލާތައް ހުއްޓާލުމަށް އެމެރިކާއާއި އީރާނާ ދެމެދު ދާއިމީ އެއްބަސްވުމަކަށް ނާދެވި، އަލުން ހަނގުރާމަ ފެށުމާ ގުޅިގެން އައި ބަދަލެކެވެ.

އީރާނަށް ތާއީދުކުރާ ހޫޘީން ބުރާސްފަތި ދުވަހު ޔަމަނުގެ މުޚާ ބަނދަރުގެ ކޮންޓްރޯލް އަތުލުމާ ގުޅިގެން ރަތްކަނޑުގެ ދަތުރުފަތުރަށް ވަނީ އިތުރު ނުރައްކަލެއް ކުރިމަތިވެފަ އެވެ. ހަމައެއާއެކު، ފާއިތުވި ދުވަސްތަކުގައި ތެޔޮ ޓޭންކަރުތަކަށް ދޭ ހަމަލާތައް ވަރުގަދަވުމުގެ ސަބަބުން، ހުރްމުޒް ކަނޑުއޮޅި ހިމެނޭ ގަލްފް ސަރަހައްދުގެ ކަނޑުގެ ދަތުރުފަތުރަށް ވަނީ ހުރަސްތަކެއް ކުރިމަތިވެފަ އެވެ.

ޕީ.ވީ.އެމްގެ އެނަލިސްޓް ޖޯން އެވަންސް ވިދާޅުވި ގޮތުގައި، މި ދުވަސްވަރު ތެލުގެ އަގު އުފުލެމުންދާ ދިއުމުން އެނގެނީ، މި ހަނގުރާމަ ކުރިން އުންމީދުކުރި ވަރަށްވުރެ ދިގުލައިގެންދާނެ ކަމަށް މާކެޓުން ގަބޫލުކުރާ ކަމެވެ. އަދި ތެޔޮ ސަޕްލައި ކުރުމާއި އެކްސްޕޯޓް ކުރުން މަދުވެއްޖެނަމަ، ތެލުގެ ބާޒާރުގެ ބެލެންސް ހިފެހެއްޓި، އަގުތައް މަތީގައި ހުންނާނެ ކަމަށްވެސް އޭނާ ފާހަގަކުރެއްވި އެވެ.

އެމެރިކާއިން އީރާނުގެ ފަސް ތެޔޮ ޓޭންކަރަކަށް ހަމަލާދިނުމާ ގުޅިގެން، އީރާނުން ބުދަ ދުވަހު ވަނީ ހުރްމުޒް ކަނޑުއޮޅި ކައިރިން 10 އުޅަނދަކަށް ހަމަލާދީފައިވާ ކަމަށް ބުނެފަ އެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްއިން ބުނެފައިވަނީ، އިތުރު ހަމަލާއެއް ދީފިނަމަ ދޭ ރައްދު ކުރިއަށްވުރެ ވަރުގަދަ ކުރާނެ ކަމަށެވެ.

ގަލްފް ސަރަހައްދުގެ ތެޔޮ ސަޕްލައިއަށް ދިގު މުއްދަތަކަށް ބުރޫއަރާފާނެ ކަމުގެ ބިރު އޮތުމުން ބްރެންޓް ކްރޫޑްގެ އަގު 100 ޑޮލަރަށްވުރެ މައްޗަށް ގޮސްފައިވީ ނަމަވެސް، މި އަގުތައް ހިފެހެއްޓިފައި ހުންނާނީ ޗައިނާގެ މާކެޓަށް އަންނަ ބަދަލުތަކުގެ މައްޗަށް ކަމަށް އެނަލިސްޓުން ބުނެ އެވެ.

ޗައިނާގެ ޑިމާންޑް

ދުނިޔޭގައި އެންމެ ގިނައިން ސާފުނުކުރާ ތެޔޮ އެތެރެކުރާ ޗައިނާއިން، މަސްތަކެއް ވަންދެން ތެޔޮ ގަތުން މަދުކޮށްފައި އޮތުމަށްފަހު ފާއިތުވި ހަފުތާތަކުގައި ވަނީ ތެޔޮ ގަންނަ މިންވަރު އިތުރުކޮށްފަ އެވެ. މިއާއެކު ތެލުގެ މާކެޓަށް ބޮޑު ދިރުމެއް އައިސްފައިވާ ކަމަށް އައި.އެން.ޖީގެ އެނަލިސްޓުން ފާހަގަކުރެ އެވެ.

އައި.އެން.ޖީން ބުނާ ގޮތުގައި، ޗައިނާއިން ތެޔޮ ގަންނަ މިންވަރު އިތުރުވަމުންދާނަމަ، ސަޕްލައިއަށް އަންނަ ކޮންމެ ބުރޫއެއްގެ ސަބަބުން ތެލުގެ އަގު އިތުރަށް އުފުލިގެންދާނެ އެވެ. ނަމަވެސް ޗައިނާއިން ތެޔޮ އެތެރެކުރާ މިންވަރު މަދުކޮށްފިނަމަ، މާކެޓުގެ އަގުތައް ދަށްވުމަކީ އެކަށީގެންވާ ކަމެކެވެ.

ކޮމޯޑިޓީޒް އިންފޮމޭޝަން ފޯރުކޮށްދޭ އައި.ސީ.އައި.އެސްގެ ގްލޯބަލް އޮއިލް މާކެޓް ލީޑް ޑޭވިޑް ޖޯބެނާޒޭ ވިދާޅުވީ، ފާއިތުވި މަސްތަކުގައި ތެލުގެ އަގު ދަށްވާނެ ކަމަށް ބެލެވުނު މައިގަނޑު ސަބަބަކީ ޗައިނާގެ ޑިމާންޑް ދަށްވުން ކަމަށެވެ.

ތެލުގެ އަގު އުފުލުމާއެކު އިންފްލޭޝަން ނުވަތަ ތަކެތީގެ އަގު ބޮޑުވުމުގެ ބިރު އިތުރުވެ، ބޮންޑް މާކެޓަށް ވަނީ ބޮޑު ޕްރެޝަރެއް ކުރިމަތިވެފަ އެވެ. މީގެ ސަބަބުން ވޯލް ސްޓްރީޓްގެ ހިއްސާގެ ބާޒާރުގައި އަގުތައް ވަނީ އަނެއްކާވެސް ދަށަށް ގޮސްފަ އެވެ.

އެމެރިކަން އޮޓޯމޮބައިލް އެސޯސިއޭޝަނުން ބުނާ ގޮތުގައި، ތެލުގެ އަގު ބޮޑުވުމާ ގުޅިގެން އެމެރިކާގައި އާންމުކޮށް ބޭނުންކުރާ ޕެޓްރޯލް ގެލަނެއްގެ އަގު މިހާރު ވަނީ އެވްރެޖްކޮށް 4.28 ޑޮލަރަށް އުފުލިފަ އެވެ. މީގެ ސަބަބުން ހަމައެކަނި ތެލުގެ އަގު ބޮޑުވީއެއް ނޫނެވެ. ލޮރީ ފަދަ އުޅަނދުފަހަރުގައި ފިހާރަތަކަށް އުފުލާ ހުރިހާ ބާވަތެއްގެ މުދަލުގެ އަގުވެސް މިހާރު ވަނީ އުފުލިފަ އެވެ.

ބުރާސްފަތި ދުވަހުގެ ރިޕޯޓްތަކަށްފަހު، އަންނަ ހަފުތާގައި ބާއްވާ ފެޑަރަލް ރިޒާވްގެ ބައްދަލުވުމުގައި އިންޓްރެސްޓް ރޭޓް ބޮޑުކުރާނެ ކަމަށް 70 އިންސައްތަ ވިޔަފާރިވެރިން މިހާރު ގަބޫލުކުރެ އެވެ. ސީ.އެމް.އީ ގްރޫޕްގެ ތަފާސްހިސާބުތަކުން ދައްކާ ގޮތުގައި، މިއީ އޭގެ ކުރީ ދުވަހު މި ފުރުސަތު އޮތް ކަމަށް ބެލެވުނު 61 އިންސައްތައަށްވުރެ އިތުރު އަދަދެކެވެ. އިންޓްރެސްޓް ރޭޓް ބޮޑުކުރުމުގެ ބަދަލުގައި ދަށްކުރުމަށް ރައީސް ޑޮނަލްޑް ޓްރަމްޕް މެދުނުކެނޑި ބާރުއަޅުއްވަމުން ގެންދެވި ނަމަވެސް، މާކެޓުގެ ހާލަތު މިހާރު ހުރީ އިންޓްރެސްޓް ރޭޓް ބޮޑުވާނެ ފަދަ ގޮތަކަށެވެ.