މިއީ ދިވެހީންނަށް މުސީބާތެއް ކަހަލަ ސަރުކާރެއް، ޤައުމުގެ ހާލަތާ މެދު ވަރިހަމަ ކޮށްލައިގެން ތިބެވޭކަށް ނެތް: ޝާހިދު
25 އޯގަސްޓު 2026 | އަންގާރަ 03:33ޝާހިދު ވިދާޅުވީ ރައީސް މުއިއްޒުގެ މި ސަރުކާރު ފެނިގެން ދަނީ އެއްވެސް މިސްރާބެއް ނެތް، އެއްވެސް ކަހަލަ ސިޔާސަތުތަކެއް ނެތް، ރައްޔިތުންނަށް ގިނަ ގުނަ ދުއްތުރާތައް ކުރަމުން އަންނަ މުސީބާތެއް ކަހަލަ ސަރުކާރެއް ކަމަށް. މިއީ ވަރިހަމަ ކޮށްލައިގެން ތިބެވޭނެ ހާލަތެއް ނޫން ކަމަށް ފާހަގަކުރައްވާ ޝާހިދު ވިދާޅުވީ، އެ މީހަކަށް ލިބިފައި ހުރި ތަޖުރިބާ ބޭނުންކޮށްގެން ރާއްޖެ ހަމަ މަގަށް އެޅުވުމުގެ މަސައްކަތް ކުރަން ޖެހޭ ކަމަށް
ރާއްޖެ ޓީވީގެ ފަށާއިރު ޕްރޮގްރާމްގައި އެމްޑީޕީގެ ކުރީގެ ރައީސް އަބްދުﷲ ޝާހިދު ބައިވެރިވެ ވަޑައިގަންނަވަނީ | ރާއްޖެ އެމްވީ
އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ރިޔާސީ ޕްރައިމަރީގައި ވާދަކުރައްވަން ނިންމެވީ ވަރަށް ގިނަ ބައެއްގެ އެދުމުގެ މަތިން ކަމަަށާއި، ދިވެހި ރާއްޖެ މިހާރު މި އޮތް ހާލަތުގެ ސަބަބުން ވަރިހަމަ ކޮށްލައިގެން ތިބެވެން ނެތް ކަމަށް އެމްޑީޕީގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
އަންގާރަ ދުވަހު ރާއްޖެ ޓީވީގެ ފަށާއިރު ޕްރޮގްރާމްގައި ބައިވެރިވެ ވަޑައިގެން ވާހަކަފުޅު ދައްކަވަމުން ޝާހިދު ވިދާޅުވީ، 2023 ވަނަ އަހަރުގެ ރިޔާސީ އިންތިޚާބު އެމްޑީޕީ އަށް ގެއްލުނު ފަހުން، ދެން 2028 ގައި އޮންނަ ރިޔާސީ އިންތިޚާބުގައި ވާދަކުރެއްވުމަށް އެމްޑީޕީގެ ވަރަށް ގިނަ މެންބަރުން އެދިވަޑައިގެންނެވި ކަމަށެވެ.
ޝާހިދު ވިދާޅުވީ ރައީސް ޑރ. މުހައްމަދު މުއިއްޒުގެ މި ސަރުކާރު ފެނިގެން ދަނީ އެއްވެސް މިސްރާބެއް ނެތް، އެއްވެސް ކަހަލަ ސިޔާސަތުތަކެއް ނެތް، ރައްޔިތުންނަށް ގިނަ ގުނަ ދުއްތުރާތައް ކުރަމުން އަންނަ މުސީބާތެއް ކަހަލަ ސަރުކާރެއް ކަމަށެވެ. މިއީ ވަރިހަމަ ކޮށްލައިގެން ތިބެވޭނެ ހާލަތެއް ނޫން ކަމަށް ފާހަގަ ކުރައްވައި ޝާހިދު ވިދާޅުވީ، އެ މީހަކަށް ލިބިފައި ހުރި ތަޖުރިބާ ބޭނުންކޮށްގެން ރާއްޖެ ހަމަ މަގަށް އެޅުވުމުގެ މަސައްކަތް ކުރަން ޖެހޭ ކަމަށެވެ.
މި ސަރުކާރަކީ އެއްވެސް ކަހަލަ މިސްރާބެއް ނެތް، އެއްވެސް ކަހަލަ ސިޔާސަތުތަކެއް ނެތް، ރައްޔިތުންނަށް ގިނަ ގުނަ ދުއްތުރާތައް ކުރަމުންދާ، ދިވެހި ރާއްޖެ އަށް މުސީބާތެއްގެ ގޮތުގައި އޮތް ސަރުކާރެއްގެ ގޮތުގައި. އަޅުގަނޑުމެންނަކަށް ނެތް ވަރިހަލަ ކޮށްލައިގެން ތިބެވޭކަށްއަބްދުﷲ ޝާހިދު
މީގެ އިތުރުން ޝާހިދު ވިދާޅުވެފައި ވަނީ، އެމްޑީޕީގެ ރިޔާސީ ޕްރައިމަރީގައި ވާދަ ކުރައްވަން ނިންމެވީ މިހާރު ފާލުން ނެއްޓިފައިވާ ސަރުކާރު ނިމުމަކަށް ގެނެސް، ދިވެހި ރައްޔިތުން ބޭނުންވާ ފަދަ ވެރިކަމެއް ކޮށްދެއްވުމުގެ މަޤުސަދުގައި ކަަމަށެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ޝާހިދު އިއުލާނުކުރައްވާފައި ވަނީ، މި ހިނގާ އޮގަސްޓު މަހުގެ 14 ވަނަ ދުވަހުގެރޭ އައްޑޫ ސިޓީގައި ބޭއްވި ޖަލްސާގައި އެވެ. އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް އިއުލާނުކުރެއްވުމާ އެކު، އެ ރޭ ޝާހިދު ވަނީ އެމްޑީޕީގެ ރައީސްކަމުގެ މަޤާމުން އިސްތިއުފާ ދެއްވައިފަ އެވެ.
މީގެ ކުރިން ޝާހިދު ވަނީ ރައްޔިތުންގެ މަޖިލީހުގެ ރައީސްގެ މަޤާމު އަދާކުރައްވައިފަ އެވެ. އޭގެ ފަހުން ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ޝާހިދު ވަނީ ފޮރިން މިނިސްޓަރުގެ މަޤާމު އަދާކުރައްވައިފަ އެވެ. އަދި އެ ދައުރުގެ ތެރޭގައި ޝާހިދު ވަނީ އދ.ގެ ޖެނަރަލް އެސެމްބްލީގެ ރައީސްކަން ވެސް ކުރައްވައިފަ އެވެ.
