އައްޑޫ ލިންކް ރޯޑް: 1 އަހަރު ފާއިތުވިއިރު އާރްޑީސީ އަށް ކުރެވުނު ހަމައެކަނި ކަމަކީ މަގު ސާފުކުރުން
3 އޯގަސްޓު 2026 | ހޯމަ 06:38އައްޑޫ ލިންކް ރޯޑް ތަރައްގީކުރުމުގެ މަސައްކަތް އާރްޑީސީއާ ހަވާލުކުރިތާ ގިނަ ދުވަސްތަކެއް ވީއިރުވެސް އަމަލީ މަސައްކަތް ކުރިއަށް ނުދާތީ، އެ މަޝްރޫއު އަވަސްކުރުމަށްޓަކައި ތާރުއެޅުމުގެ ބައި އެހެން ބަޔަކާ ހަވާލުކުރަން ނިންމަވާފައިވާ ކަމަށް ހައުސިން މިނިސްޓަރު ވިދާޅުވެއްޖެ. މިނިސްޓަރު މިހެން ވިދާޅުވީ މަޝްރޫއު ލަސްވާތީ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން
އައްޑޫ ސިޓީ ލިންކު ރޯޑް ހެދުމުގެ މަޝްރޫޢުގެ ދަށުން މަގު ފުޅާކޮށް އިތުރު ލޭންތައް ހެދުމަށް އެ މަގުގައި ހުރި ގަސްތައް އެހެން ސަރަހައްދުތަކަށް ބަދަލުކޮށް ސާފު ކުރުމުގެ މަސައްކަތް ފަށާފައިވާ ކަމަށް އާރްޑީސީ އިން ބުނީ މިދިޔަ މެއި މަހުގައި | އާރްޑީސީ
ނިމިދިޔަ 2025 ވަނަ އަހަރުގެ އެޕްރީލް 8 ވަނަ ދުވަހު ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއި ހަވާލުކުރި އައްޑޫ ލިންކް ރޯޑު ޒަމާނީ ފެންވަރަށް ތަރައްގީ ކުރުމުގެ މަސައްކަތް އެހެން ބަޔަކާ ހަވާލު ކުރުމަށް ނިންމަވާފައިވާ ކަމަށް ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ހޯމަ ދުވަހުގައި ބޭއްވި ރައްޔިތުންގެ މަޖިލީހުގެ ޖަލްސާ އަށް މިނިސްޓަރު ހާޒިރުވެވަޑައިގެންފައިވާއިރު ސުވާލު ކުރުމުގެ ވަގުތުގައި މަރަދޫ ދާއިރާގެ މެންބަރު އަހްމަދު ދީދީ ވަނީ އައްޑޫ ލިންކް ރޯޑްގެ މަސައްކަތް އާރްޑީސީއާ ހަވާލުކުރިތާ 1 އަހަރު ވީއިރު ވެސް އެއްވެސް މަސައްކަތެއް ކުރިއަށް ނުދާތީ، ކަމުގެ ގާބިލުކަން ނެތް ކުންފުންޏަކާ އެފަދަ މުހިއްމު މަޝްރޫއުއެއް ހަވާލު ކޮށްފައިވަނީ ކީއްވެގެންތޯ ސުވާލު ކުރައްވާފަ އެވެ. އަދި އެ މަސައްކަތް ނިމޭނެ ތާރީޚާ ގުޅޭ ގޮތުން ވެސް މެންބަރު ސުވާލު ކުރެއްވި އެވެ.
އެ ސުވާލަށް ޖަވާބުދެއްވަމުން މިނިސްޓަރު މުއްތަލިބު ވަނީ އައްޑޫ ލިންކް ރޯޑަކީ ވަރަށް ހާލުގައި އޮތް މަގެއް ކަމަށާއި އެ މަގު ހެދުމަށް ގިނަ އަދަދެއްގެ ފައިސާ ޚަރަދު ވާނެ ކަމަށް ވިދާޅުވެފަ އެވެ. އެހެންކަމުން ޚަރަދު ކުޑަކޮށް ކުރިއަށް ގެންދިއުމަށްޓަކައި އެ މަސައްކަތް އާރްޑީސީއާ ހަވާލު ކުރެއްވީ ކަމަށް މިނިސްޓަރު ވިދާޅުވި އެވެ.
އެ މަސައްކަތް ވީހާވެސް ޚަރަދުކުޑަކޮށް ކުރުމަށްޓަކައި ސީދާ ކޮސްޓް ޕްރައިސްގައި ކުރިއަށް ގެންދިއުމަށް އާރްޑީސީ އަށް މެޝީނަރީޒްތަކާއި އެއްޗެހި ހޯދައިގެން ހަވާލު ކުރީ. އެބޭފުޅުން މަގު ސާފު ކުރުމުގެ މަސައްކަތް ކުރިއަށް އެބަގެންދޭ. އެހެން ނަމަވެސް ތި ވިދާޅުވި ގޮތަށް ރައްޔިތުން ބޭނުންވަނީ ތާރު އަޅާފަ ރައްޔިތުންނަށް ފަސޭހަ ވާނެ ގޮތެއް ހެދުން. އެހެންވީމާ މިހާރު އަޅުގަނޑުމެން އެބަ މަސައްކަތް ކުރަން އެ މަސައްކަތް އަވަސް ކުރެވޭނެ ގޮތެއް ހޯދުމަށް އެހެން ބަޔަކާ، ސީދާ ލިންކް ރޯޑްގެ މަސައްކަތް އެކަނި، ތާރު އެޅުމުގެ މަސައްކަތް އެކަނިޑރ. އަބްދުﷲ މުއްތަލިބު
އެ މަސައްކަތް އާރްޑީސީއާ ހަވާލުކުރިތާ 7 މަސް ފަހުން މިދިޔަ ނޮވެމްބަރުގައި މަސައްކަތް ފަށާފައިވާ ކަމަށް ސަރުކާރުން އިއުލާނު ކުރި އެވެ. އަދި އިތުރު 6 މަސް ފަހުން މަޝްރޫއުގެ ބޭނުމަށް އެ މަގުގައި ހުރި ގަސްތައް އެހެން ސަރަހައްދުތަކަށް ބަދަލުކޮށް ސާފު ކުރުމުގެ މަސައްކަތް ފަށާފައިވާ ކަމަށް އާރްޑީސީ އިން ބުނީ މިދިޔަ މެއި މަހުގަ އެވެ.
އައްޑޫ ލިންކް ރޯޑުގެ އަމަލީ މަސައްކަތް 2024 ވަނަ އަހަރުގެ ތެރޭގައި ފަށާނެކަމުގެ ޔަގީންކަން ހައުސިން މިނިސްޓަރު ޑރ. އަބްދުﷲ މުއްތަލިބު ދެއްވާފައިވާއިރު 2 އަހަރު ފާއިތުވެގެން ދިޔައިރު ވެސް މަގުގެ އަމަލީ އެއްވެސް މަސައްކަތެއް ކޮށްފައެއް ނުވެ އެވެ.
މިކަމާ ގުޅިގެން ރައްޔިތުންގެ މަޖިލީހުގައި އެތައް ފަހަރެއްގެ މަތިން މިނިސްޓަރު މުއްތަލިބާ އެ ސުވާލު ކުރެވުނު ނަމަވެސް މިނިސްޓަރު އެ ސުވާލަށް ސީދާ ޖަވާބެއް ދެއްވާފައެއް ނުވެ އެވެ. އެކިފަހަރުމަތިން ތަކުރާރުކޮށް އެ ސުވާލު މެންބަރުން ކުރެއްވި އިރު މިނިސްޓަރު ވިދާޅުވީ ވަރަށް އަވަހަށް އެކަމުގެ އަމަލީ މަސައްކަތް ފެށޭނެ ކަމަށެވެ.
