އޯޕެކް ޕްލަސްގެ ހަތް ގައުމުން ތެޔޮ އުފައްދުން އިތުރުކުރަން ނިންމައިފި

އޯޕެކް ޕްލަސްގެ ހަތް މެންބަރު ގައުމު ކަމަށްވާ ސައުދީ އަރަބިއްޔާ، ރަޝިއާ، އިރާގު، ކުވެއިތު، ކަޒަކިސްތާން، އަލްޖީރިއާ އަދި އޮމާނުން އާދީއްތަ ދުވަހު ވީޑިއޯ ކޮންފަރެންސް މެދުވެރިކޮށް ބައްދަލުވުމެއް ބާއްވައިފި އެވެ. މި ބައްދަލުވުމުގައި ތެލުގެ ބާޒާރުގެ މިހާރުގެ ހާލަތާއި ކުރިމަގުގައި ބާޒާރަށް އަތުވެދާނެ ބަދަލުތަކާ ގުޅޭގޮތުން މަޝްވަރާކޮށްފައިވާ ކަމަށް އެ ގައުމުތަކުން ނެރުނު ބަޔާނެއްގައި ބުނެފައިވެ އެވެ.

މީގެ ކުރިން 2023 ވަނަ އަހަރުގެ އެޕްރީލް އަދި ނޮވެމްބަރު މަހު ތެޔޮ އުފައްދާ މިންވަރު އިތުރަށް މަދުކުރުމަށް އަމިއްލައަށް އިސްނަގައިގެން ނިންމި ނިންމުމަށް ބަދަލު ގެނައުމަށް މި ގައުމުތަކުން މިހާރު ވަނީ އެއްބަސްވެފަ އެވެ. އެގޮތުން 2026 ވަނަ އަހަރުގެ ސެޕްޓެމްބަރު މަހުން ފެށިގެން ދުވާލަކު 188،000 ފީފާ ތެޔޮ އިތުރަށް އުފެއްދުމަށް ވަނީ ނިންމާފަ އެވެ. މިއީ 2023 ވަނަ އަހަރުގެ އެޕްރީލް މަހު އަމިއްލައަށް އިސްނަގައިގެން ތެޔޮ އުފެއްދުން މަދުކުރަން ތަންފީޒުކުރި ސިޔާސަތު މަޑުމަޑުން އުވާލުމަށް ނިންމި ނިންމުމުގެ ބައެކެވެ.

އޯޕެކް ޕްލަސްއިން ހާމަކުރި ގޮތުގައި ތެޔޮ އުފައްދާ މިންވަރަށް މި ގެނައި ބަދަލުގެ ސަބަބުން، މީގެ ކުރިން ކަނޑައެޅިފައިވާ މިންވަރަށްވުރެ އިތުރަށް ތެޔޮ އުފައްދާފައިވާ ގައުމުތަކަށް، އެ މިންވަރު ހަމަޖެއްސުމަށް (ކޮމްޕެންސޭޓް ކުރުމަށް) ފުރުސަތު ލިބިގެންދާނެ އެވެ.

މި ހަތް ގައުމުން ވަނީ އޯޕެކް ޕްލަސްގެ "ޑެކްލަރޭޝަން އޮފް ކޯޕަރޭޝަން" އަށް ފުރިހަމައަށް އަމަލުކުރާނެ ކަމުގެ ޔަގީންކަން އަލުން ދީފަ އެވެ. މީގެ ތެރޭގައި ޖޮއިންޓް މިނިސްޓީރިއަލް މޮނިޓަރިން ކޮމިޓީ (ޖޭ.އެމް.އެމް.ސީ) އިން ބަލަހައްޓަމުންދާ، އަމިއްލައަށް އިސްނަގައިގެން ތެޔޮ އުފެއްދުމަށް ގެނެސްފައިވާ ބަދަލުތައް ހިމެނެ އެވެ. މީގެ އިތުރުން 2024 ވަނަ އަހަރުގެ ޖެނުއަރީ މަހުން ފެށިގެން ކަނޑައެޅިފައިވާ މިންވަރަށްވުރެ އިތުރަށް ތެޔޮ އުފައްދާފައިވާ މިންވަރު ފޫބެއްދުމަށް ވެފައިވާ އިގުރާރަށް އިހުތިރާމްކުރާނެ ކަމަށްވެސް އެ ގައުމުތަކުން ބުނެފައިވެ އެވެ.

ބާޒާރަށް އަންނަ ބަދަލުތައް ދެނެގަތުމަށްޓަކައި މި ގައުމުތަކުން ކޮންމެ މަހަކުވެސް ބައްދަލުވުންތައް ބާއްވަމުން ގެންދާނެ އެވެ. އެގޮތުން ދެން އެންމެ އަވަހަށް ބާއްވާ ބައްދަލުވުން ތާވަލުކޮށްފައިވަނީ 2026 ވަނަ އަހަރުގެ ސެޕްޓެމްބަރު މަހުގެ 6 ވަނަ ދުވަހަށެވެ.

ހަކަތައިގެ ރައްކާތެރިކަމާ މެދު ޖޭ.އެމް.އެމް.ސީ އިން ކަންބޮޑުވުން ފާޅުކުރުން

ވަކިން ނެރުނު ބަޔާނެއްގައި ޖޮއިންޓް މިނިސްޓީރިއަލް މޮނިޓަރިން ކޮމިޓީ (ޖޭ.އެމް.އެމް.ސީ) އިން ބުނީ، އެ ކޮމިޓީގެ 67 ވަނަ ބައްދަލުވުން ވީޑިއޯ ކޮންފަރެންސް މެދުވެރިކޮށް ބާއްވާފައިވާ ކަމަށެވެ. މި ބައްދަލުވުމުގައި ތެލުގެ ބާޒާރުގެ މިހާރުގެ ހާލަތު މުރާޖައާކޮށް، ދުނިޔޭގެ ހަކަތައިގެ ބާޒާރު ހަމަޖެހުމެއްގައި ބޭއްވުމަށް އޯޕެކް ޕްލަސްގެ "ޑެކްލަރޭޝަން އޮފް ކޯޕަރޭޝަން" އަދާކުރާ މުހިންމު ދައުރު ފާހަގަކޮށްފައިވެ އެވެ.

ދުނިޔޭގެ ހަކަތައިގެ ސަޕްލައި މެދުނުކެނޑި ކުރިއަށް ގެންދިއުމަށްޓަކައި، ބައިނަލްއަގުވާމީ ކަނޑުދަތުރުފަތުރުގެ މަގުތަކުގެ ރައްކާތެރިކަން ކަށަވަރުކުރުމަކީ ނުހަނު މުހިންމު ކަމެއްކަމަށް ކޮމިޓީން ބާރުއަޅާފައިވެ އެވެ.

ހަކަތަ އުފައްދާ ވަސީލަތްތަކަށް އަމާޒުކޮށްދޭ ހަމަލާތަކާ މެދުވެސް ކޮމިޓީން ވަނީ ކަންބޮޑުވުން ފާޅުކޮށްފަ އެވެ. މިފަދަ ހަމަލާތަކުގެ ސަބަބުން ގެއްލުންވާ ތަންތަން މަރާމާތުކޮށް އަލުން އޮޕަރޭޝަނަށް ގެނައުމަށް ބޮޑު ހޭދައެއް ހިނގާ ކަމަށާއި، އެކަމަށް ގިނަ ވަގުތު ނަގާ ކަމަށް ކޮމިޓީން އިންޒާރު ދީފައިވެ އެވެ. މީގެ ސަބަބުން ބާޒާރަށް ތެޔޮ ފޯރުކޮށްދެވޭ މިންވަރު މަދުވެގެންދާނެ އެވެ.

ކޮމިޓީން ބުނި ގޮތުގައި، ހަކަތަ އުފައްދާ ވަސީލަތްތަކަށް ހަމަލާދިނުމާއި ބައިނަލްއަގުވާމީ ކަނޑުދަތުރުފަތުރުގެ މަގުތަކަށް ހުރަސްއެޅުމަކީ ހަކަތައިގެ ރައްކާތެރިކަން ގެއްލި، ބާޒާރުގެ އަގުތަކަށް ބޮޑެތި ލޮޅުންތަކެއް އަރާނެ ކަމެކެވެ. އަދި މިއީ ތެޔޮ އުފައްދާ ގައުމުތަކާއި، ބޭނުންކުރާ ގައުމުތަކުގެ އިތުރުން ދުނިޔޭގެ އިގްތިސާދަށް ފައިދާވާނެހެން ބާޒާރު ހަމައަކަށް އެޅުވުމަށް އޯޕެކް ޕްލަސްއިން ކުރަމުންދާ މަސައްކަތްތަކަށް އެޅޭ ހުރަހެއް ކަމަށްވެސް ބަޔާންކޮށްފައިވެ އެވެ.

މީގެ އިތުރުން 2026 ވަނަ އަހަރުގެ މެއި އަދި ޖޫން މަހުގެ ތެޔޮ އުފެއްދި މިންވަރުގެ ތަފާސްހިސާބުތައް ޖޭ.އެމް.އެމް.ސީ އިން ވަނީ މުރާޖައާކޮށްފަ އެވެ. އަދި އޯޕެކްގެ މެންބަރުންނާއި އޯޕެކްގައި ނުހިމެނޭ ގައުމުތަކުން "ޑެކްލަރޭޝަން އޮފް ކޯޕަރޭޝަން" އަށް ފުރިހަމައަށް އަމަލުކުރަމުންދާތީ އެކަން ފާހަގަކޮށް ތައުރީފުކޮށްފައިވެ އެވެ.

ކޮމިޓީން ބުނީ 2024 ވަނަ އަހަރުގެ ޑިސެމްބަރު 5 ގައި ބޭއްވި 38 ވަނަ އޯޕެކް އަދި ނޮން-އޯޕެކް މިނިސްޓީރިއަލް ބައްދަލުވުމުގައި އެއްބަސްވި ބަދަލުތަކާއި، 2024 ފެބްރުއަރީ 1 ގައި ބޭއްވި 52 ވަނަ ޖޭ.އެމް.އެމް.ސީ ބައްދަލުވުމުގެ ދަށުން އަމިއްލައަށް އިސްނަގައިގެން ގެނައި ބަދަލުތައް ތަންފީޒުވަމުންދާ މިންވަރު މޮނިޓަރު ކުރަމުންދާނެ ކަމަށެވެ.

ބާޒާރަށް އަންނަ ބަދަލުތައް ޖޭ.އެމް.އެމް.ސީ އިން ވަރަށް ގާތުން ބަލަމުންދާނެ ކަމަށާއި، ބޭނުންވެއްޖެ ހާލަތެއްގައި އިތުރު ބައްދަލުވުންތައް ބޭއްވުމުގެ ނުވަތަ އޯޕެކް ޕްލަސްގެ މިނިސްޓީރިއަލް ބައްދަލުވުމެއް ބޭއްވުމަށް ލަފާދިނުމުގެ ބާރު އެ ކޮމިޓީއަށް އޮންނާނެ އެވެ.

ކޮމިޓީގެ ދެން އެންމެ އަވަހަށް ބާއްވާ 68 ވަނަ ބައްދަލުވުން ތާވަލުކޮށްފައިވަނީ 2026 ވަނަ އަހަރުގެ އޮކްޓޫބަރު މަހުގެ 4 ވަނަ ދުވަހަށެވެ.