ޖައްވުމުގައި އަށް މަސް ދުވަހު މަސައްކަތް ކުރުމަށްފަހު، އެމެރިކާ އާއި ރަޝިޔާގެ އެސްޓްރޮނޯޓުންގެ ޓީމު ބިމަށް އަތުވެއްޖެ
26 ޖުލައި 2026 | އާދީއްތަ 15:13އިންޓަނޭޝަނަލް ސްޕޭސް ސްޓޭޝަނުގައި އަށް މަސްދުވަހު މަސައްކަތްކުރި އެމެރިކާ އާއި ރަޝިޔާގެ އެސްޓްރޮނޯޓުން ކަޒަކިސްތާނަށް އެނބުރި އައިސްފައިވާއިރު، އާ މިޝަނެއްގެ ދަށުން އިތުރު ތިން އެސްޓްރޮނޯޓަކު މިހާރު ވަނީ ޖައްވީ މަރުކަޒަށް ގޮސްފައި. ޔޫކްރެއިން ހަނގުރާމައާ ގުޅިގެން ދެ ގައުމުގެ ސިޔާސީ ގުޅުން ގޯސްވި ނަމަވެސް، ޖައްވީ ދިރާސާތަކުގައި ނާސާ އާއި ރޮސްކޮސްމޮސް އިން އަންނަނީ ގުޅިގެން މަސައްކަތް ކުރަމުން
ކަޒަކިސްތާނުގެ ޒެޒްކަޒްގަން ކައިރީގައި އޮންނަ އެކަހެރި ސަރަހައްދަކަށް އާދީއްތަ ދުވަހު ޖެއްސި ސޮޔޫޒް އެމް.އެސް-28 އުޅަނދުގެ ތެރޭގައި (ވައަތުން ކަނާތަށް) ނާސާގެ އެސްޓްރޮނޯޓް ކްރިސް ވިލިއަމްސް އާއި، ރޮސްކޮސްމޮސްގެ ކޮސްމޮނޯޓް ސަރްގޭ ކުޑް-ސްވަރްޗްކޯވްގެ އިތުރުން ރޮސްކޮސްމޮސްގެ ކޮސްމޮނޯޓް ސަރްގޭ މިކައޭވް | ނާސާ
އިންޓަނޭޝަނަލް ސްޕޭސް ސްޓޭޝަން (އައިއެސްއެސް) ގައި އަށް މަސް ދުވަހު މަސައްކަތް ކުރުމަށްފަހު، އެމެރިކާ އާއި ރަޝިޔާގެ އެސްޓްރޮނޯޓުން ހިމެނޭ ޓީމު އާދީއްތަ ދުވަހު ކަޒަކިސްތާނުގެ ހުސްބިމަކަށް ރައްކާތެރިކަމާއެކު ޖައްސައިފި އެވެ.
ނާސާގެ އެސްޓްރޮނޯޓް ކްރިސް ވިލިއަމްސް އާއި ރަޝިޔާގެ ސާގޭ ކުޑް-ސްވަރްޗްކޯވް އަދި ސާގޭ މިކައޭވް ދަތުރުކުރި "ސޮޔޫޒް އެމްއެސް-28" އުޅަނދު ޖައްސާފައިވަނީ ޒެޒްކަޒްގަންގެ އިރުދެކުނުން ކަނޑައެޅިފައިވާ ސަރަހައްދަކަށް ވައިކުޑައިގެ އެހީގަ އެވެ.
"ސޮޔޫޒް އެމްއެސް-28" އުޅަނދު ޖައްސާފައިވަނީ ޒެޒްކަޒްގަންގެ އިރުދެކުނުން ކަނޑައެޅިފައިވާ ސަރަހައްދަކަށް ވައިކުޑައިގެ އެހީގައި
ޖައްވީ މަރުކަޒުގައި 241 ދުވަސް ހޭދަކުރި މި މިޝަނަކީ ވިލިއަމްސް އާއި މިކައޭވް ޖައްވަށް ކުރި ފުރަތަމަ ދަތުރެވެ. ނަމަވެސް މިއީ ކުޑް-ސްވަރްޗްކޯވް ޖައްވަށް ކުރި ދެވަނަ ދަތުރެވެ.
ފިނި ހަނގުރާމައިގެ ދުވަސްވަރު ޖައްވީ ރޭހުގައި ބޮޑެތި ވާދަވެރިންގެ ގޮތުގައި ތިބި ނަމަވެސް، ރަޝިޔާ އާއި އެމެރިކާއިން މިހާރު އަންނަނީ ޖައްވީ މަރުކަޒާއި އެހެނިހެން މަޝްރޫއުތަކުގައި ގުޅިގެން މަސައްކަތް ކުރަމުންނެވެ. 2022 ވަނަ އަހަރު ރަޝިޔާ ސިފައިން ޔޫކްރެއިނަށް އެރުމާ ގުޅިގެން ދެ ގައުމުގެ ގުޅުމަށް ބުރޫއެރި ނަމަވެސް، ވޮޝިންޓަނާއި މޮސްކޯއިން އަންނަނީ އެއް ގައުމު އަނެއް ގައުމުގެ އުޅަނދުތަކުގައި އެސްޓްރޮނޯޓުން ޖައްވީ މަރުކަޒަށް ފޮނުވައިގެން މަސައްކަތްތައް ކުރިއަށް ގެންދަމުންނެވެ.
ޖުލައި މަހުގެ 14 ވަނަ ދުވަހު، ނާސާގެ އެސްޓްރޮނޯޓް އަނިލް މެނަން އާއި ރޮސްކޮސްމޮސްގެ ކޮސްމޮނޯޓުން ކަމަށްވާ ޕިޔޮޓްރް ޑުބްރޯވް އަދި އެނާ ކިކީނާ ވަނީ އަށް މަސް ދުވަހުގެ މިޝަނަކަށް އިންޓަނޭޝަނަލް ސްޕޭސް ސްޓޭޝަނަށް ގޮސްފަ އެވެ. މި ޓީމު ފުރާފައިވަނީ ރަޝިޔާއިން ކުއްޔަށް ހިފައިގެން އުޅޭ ކަޒަކިސްތާނުގެ ބައިކަނޫރު ކޮސްމޮޑްރޯމުންނެވެ.
މި އުޅަނދު ފުރުވައިލުމުގެ ރަސްމިއްޔާތުގައި ނާސާގެ އެޑްމިނިސްޓްރޭޓަރު ޖެރެޑް އައިޒަކްމަން ބައިވެރިވެވަޑައިގެންފައިވާއިރު، މިއީ ފާއިތުވި އަށް އަހަރު ދުވަހުގެ ތެރޭގައި ނާސާގެ އިސްވެރިއަކު ބައިކަނޫރަށް ކުރެއްވި ފުރަތަމަ ޒިޔާރަތެވެ.
އަލަށް ދިޔަ ތިން އެސްޓްރޮނޯޓުން މިހާރު ވަނީ "އެކްސްޕެޑިޝަން 75" ގެ ބައިވެރިންގެ ގޮތުގައި، ނާސާގެ އެސްޓްރޮނޯޓުން ކަމަށްވާ ޖެސިކާ މިއާ އާއި ޖެކް ހެތަވޭ، ޔޫރަޕިއަން ސްޕޭސް އެޖެންސީގެ އެސްޓްރޮނޯޓް ސޯފީ އަޑެނޯޓް އަދި ރޮސްކޮސްމޮސްގެ ކޮސްމޮނޯޓް އެންޑްރޫ ފެޑްޔައޭވްއާ ގުޅިފަ އެވެ.
