ކަރަންޓާ ފެނުގެ މައްސަލައާ ގުޅިގެން ސަރުކާރުގެ މުއައްސަސާތައް މަޖިލީހަށް ހާޒިރު ކުރަން ނިންމައިފި
1 އޮކްޓޯބަރު 2017 | އާދީއްތަ 18:08ކޮމިޓީއަށް އިދިކޮޅު ފަރާތްތަކަށް ނިސްބަތްވާ 5 މެންބަރުން ހާޒިރުވެފައިވޭ
އާދިއްތަ ދުވަހު ކުރިއަށް ދިޔަ މަޖިލީސް ބައްދަލުވުން
އެންވަޔަރމެންޓް މިނިސްޓްރީއާއި ސްޓެލްކޯ އާއި ފެނަކަ ކޯޕަރޭޝަންގެ އިސްވެރިން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ހާޒިރު ކުރުމަށް އެ ކޮމިޓީގެ އަޣުލަބިއްޔަތުން ފާސްކޮށްފި އެވެ.
އާދިއްތަ ދުވަހުގެ ރޭ 08:30 ގައި ބޭއްވި ސަރުކާރުގެ މަސްއޫލިއްޔަތުއަދާކުރާ މިންވަރު ބަލާ ކޮމިޓީ ބައްދަލުުވުމަށް 10 މެންބަރުން ހާޒިރުވެފައިވެ އެވެ. މަޖިލީހުގެ ގަވައިދުގެ 123 ވަނަ މާއްދާގެ ދަށުން ހުށަހަޅާފައިވާ މާލެއާ ރަށްރަށުގައި ފެނަކައިން ފޯރުކޮށްދޭ ފެނާއި ކަރަންޓާއި ފެނުގެ އަގު ބޮޑުވުމާ ގުޅޭ މައްސަލަ ކޮމިޓީގައި ދިރާސާ ކޮށްފައިވެ އެވެ.
މި މައްސަލަ ކޮމިޓީއަށް ހުށަހަޅާފައިވަނީ މީދޫ ދާއިރާގެ މެންބަރު ރޮޒައިނާ އާދަމް އާއި މާފަންނު ހުޅަނގު ދާއިރާގެ މެންބަރު މުހައްމަދު ފަލާހާއި މަރަދޫ ދާއިރާގެެ މެންބަރު އިބްރާހިމް ޝަރީފު އެވެ.
މައްސަލަ ހުށަހެޅުމަށް މަޖިލީހުގެ އަމީންއާމް އަހުމަދު މުހައްމަދަށް އެޑްރެސް ކުރައްވާ ފޮނުވާފައިވާ ސިޓީގައި ބުނެފައިވަނީ އައްޑޫ ސިޓީގެ ރައްޔިތުން ފެނާ ނަރުދަމާއަށް އިންތިޒާރުކުރާތާ އެތަށް އަހަރެއް ފަހުން ނަރުދަމާގެ ހިދުމަތް އަދިވެސް ފުރިހަމައަށް ނުދެވޭ އިރު ފެނުގެ ހިދުމަތްދޭން ފެށުމަށް މީޓަރުތައް ބެހެއްޓުމަށްފަހު ފެންޓަނަކަށް 65ރ. ރޭޓުން އެންމެ ދަށް ބޭންޑްގައިވެސް ޗާޖު ކުރުމަށް ނިންމާފައިވާކަން އަންގާފައިވާ ކަމަށެވެ. މި އަގަކީ މާލޭގައި ފެނުގެ ހިދުމަތް ފޯރުކޮށްދޭ އަގަށްވުރެ ތިން ގުނަ ބޮޑު އަދަދެއް ކަަމަށް ސިޓީގައި ބަޔާންކޮށްފައިވެ އެވެ.
ފެނަކީ އަސާސީ ހިދުމަތަކަށް ވެފައި ރާއްޖޭގެ ހުރިހާ ރައްޔިތުންވެސް ސަރުކާރަށް ދައްކާ ޓެކްސްތައް ދައްކަމުންދަނީ އެއް މިންގަނޑެއްގައި ކަމަށްވާއިރު މާލެ ފިޔަވައި އެހެން ރަށްރަށުގައި މާލެއަށް ވުރެ މުދަލާ ހިދުމަތުގެ އަގުބޮޑުވުމުގެ ސަބަބުން މިކަމަކީ ބަލައިގަނެވޭނެ ކަމެއް ނޫން ކަމަށް ސިޓީގައި ވަނީ ފާހަގަކޮށްފަ އެވެ. އަދި މިއީ ގާނޫނު އަސާސީ އިން ރައްޔިތުންނަށް ކަށަވަރުކޮށްދޭ ހަމަހަމަކަން ގެއްލިގެންދާ ކަމެއް ކަމަށް ސިޓީގައި ބުނެފައިވެ އެވެ.
ފެނަކަ ކޯޕަރޭޝަނަކީ ކޮރަޕްޝަނުގެ ހާއްޔެއް ކަމަށާއި ރައްޔިތުންގެ ފައިސާ ނަހަމަ ގޮތުގައި ބޭނުން ކުރަމުންދާ ކުންފުންޏެއް ކަން ސާފުކޮށް އެނގެން އޮތް ހިނދު މިފަދަ ކަންކަމަށް ފައިސާ ހޯދުމަށް ބޭނުން ކުރާ ވަސީލަތަކީ ރައްޔިތުންއަތުން އަސާސީ ހިދުމަތް ދިނުމުގެ ނަމުގައި ފެނާއި ކަރަންޓަށް ބޮޑު އަގުތަކެއް ނެގުން ކަމަށްވާ ނަމަ މިކަން އެއްވެސް ހާލެއްގައި ބަލައިނުގަނެވޭނެ ކަމަށް ސިޓީގައި ބަޔާންކޮށްފައިވެ އެވެ. އަދި މިހާރުން މިހާރަށް ފެނަކައިން ދޭ ކަރަންޓާއި ފެނުގެ ހިދުމަތުގެ އަގު މާލެއާއި އެއްވަރަށް އެހެން ރަށްރަށުގައިވެސް ކުޑަކޮށްދިނުމުގައި ކޮންމެހެންވެސް ކުރަންޖެހޭ ކަމެއްކަމުގައި ދެކޭ ކަމަށް ސިޓީގައި ބުނެފައިވެ އެވެ.
އާދިއްތަ ދުވަހު ބޭއްވި ކޮމިޓީ ބައްދަލުވުމުން ވަނީ އަންގާރަ ދުވަހުގެ މެންދުރު 01:30 ހަށް އެންވަޔަރމެންޓް މިނިސްޓްރީ އާއި ސްޓެލްކޯ އާއި ފެނަކަ ހާޒިރު ކުރުމަށް ނިންމާފަ އެވެ. ކޮމިޓީގެ ބައްދަލުުވުމުގައި ހުރިހާ މެންބަރުންވެސް ވަނީ އަސާސީ ހިދުމަތްތަކަކީ އަތޮޅު ތެރޭގައާއި މާލޭގައި އަގުގެ ގޮތުން ތަފާތު ކުރުމެއް ހުންނަންޖެހޭނެ ހިދުމަތްތަކެއް ނޫން ކަން ފާހަގަކޮށްފަ އެވެ. އެގޮތުން އައްޑޫ ސިޓީ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ، ހިދުމަތްތަކުގެ އަގަށް ބަލާ އިރު އަތޮޅުތެރޭގައި ކޮންމެ ރަށެއްގައި ޖެނެރޭޓަރެއް ނުވަތަ ނަރުދަމާގެ ހިދުމަތް ގާއިމް ކުރުމުގެ ހަރަދު ބޮޑުވެދާނެ ކަަމަށާއި އެހެން ނަމަވެސް މި ހިދުމަތްތަކަކީ އަސާސީ ހިދުމަތްތަކަށްވާތީ ސަބްސިޑައިޒް ކޮށްގެން ނަމަވެސް ހިދުމަތްތައް ފުރިހަމަ ގޮތުގައި އަގު ހެޔޮކޮށް ދޭން ޖެހޭ ކަމަށެެވެ.
މަރަދޫ ދާއިރާގެ މެންބަރު އިބްރާހިމް ޝަރީފު ވިދާޅުވީ، މިއަދު މި ފެނިގެންދަނީ އަސާސީ ހިދުމަތްދޭ ކުންފުނިތައްވެސް ބަނގުރޫޓުވުމާ ގާތްވެފައިވާ މަންޒަރު ކަމަށެވެ. ސްޓެލްކޯ އިން ވެސް ލޯންތައް ނަގައިގެން ޖަނަރޭޓަރުތައް ގެނެސް ދަރަނިވެރިވެފައިވާކަން ފާހަގަކޮށް ޝަރީފު ވިދާޅުވީ، މިފަދަ އަސާސީ ހިދުމަތްތަކަކީ މިއަށްވުރެ ރަގަޅަށް މެނޭޖު ކުރެވެން ޖެހޭނެ ހިދުމަތްތަކެއް ކަމަށެެވެ.
ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވީ، އަސާސީ ހިދުމަތްތަކަކީ ރައްޔިތުންނަށް އެއް ހަމައެއްގައި އެެއް އުސޫލެއްގައި ލިބެންޖެހޭނެ ހިދުމަތްތަކެއް ކަަމަށް ގަބޫލު ކުރާ ކަމަށެވެ. މި ސަރުކާރުން އެހެން ސަރުކާރުތަކާ ހިލާފަށް އަސާސީ ހިދުމަތް ފޯރުކޮށްދިނުމަށް ގިނަ މަސައްކަތްތަކެއް ކޮށްފައިވާ ކަމަށް އޭނާ ވިދާޅުވި އެވެ. އަދި އަލަށް މަސައްކަތް ފަށައިގެން ކުރިއަށްދާ ރަށްރަށުގައި އަގުގެ މައްސަލަތަކެއް އުޅުނު ކަމުގައިވީ ނަމަވެސް ނަރުދަމާ އާއި ފެނާއި ކަރަންޓްގެ ހިދުމަތްތައް ވަރަށް ފުރިހަމައަށް ފޯރުކޮށްދިނުމަށް މަސައްކަތްކޮށްފައިވާ ކަމަށް އޭނާ ވިދާޅުވި އެވެ.
މިމައްސަލައިގެ އިތުރުން ވެސް ފްލެޓްތަކާއި ގުޅޭ މައްސަލައެއްވެސް ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީއަށް ހުށަހެޅި ދަނީ ބަލަމުންނެވެ.
