ފުޓްސަލް އަށް ހާއްސަ "އޭ10" ފިހާރަ ހުޅުވައިފި

ރާއްޖޭގެ މަޝްހޫރު ފުޓްސަލް ކުޅުންތެރިޔާ އަޔާޒް އަހުމަދު (އަޔާ) އިސްވެހުރެ، ފުޓްސަލް ކުޅުންތެރިންނާއި އެ ކުޅިވަރަށް ލޯބިކުރާ ފަރާތްތަކަށް ހާއްސަކޮށްގެން "އޭ10" (A10) ގެ ނަމުގައި އާ ފިހާރައެއް ހުޅުވައިފި އެވެ.

ގަލޮޅު ނިރޮޅު މަގުގައި ގާއިމުކޮށްފައިވާ މި ފިހާރަ ރަސްމީކޮށް ހުޅުވާފައިވަނީ އަންގާރަ ދުވަހުގެ ރޭ ބޭއްވި ހާއްސަ ރަސްމިއްޔާތެއްގަ އެވެ.

"އޭ10" ފިހާރަ އަކީ ފެންވަރު ރަނގަޅު ކުޅިވަރު ސާމާނު ފޯރުކޮށްދިނުމަށް އަމާޒު ހިފާފައިވާ ތަނެކެވެ. އެގޮތުން، ތަފާތު އެކި ބްރޭންޑްތަކުގެ ކޮލިޓީ ރަނގަޅު ފުޓްސަލް ބޫޓުތަކާއި، ކުޅިވަރު ކުޅޭއިރު ބޭނުންވާނެ އިތުރު ސާމާނު މި ފިހާރަ އިން ލިބެން ހުންނާނެއެވެ. މީގެ އިތުރުން، ޓީމުތަކަށް ބޭނުންވާ ޖާރޒީ ޕްރިންޓްކޮށްދިނުމުގެ ހިދުމަތް ވެސް މި ފިހާރައިން ލިބިގެންދާނެ އެވެ.

މި ފިހާރަ ހުޅުވުމާ ގުޅޭގޮތުން މައުލޫމާތު ދެއްވަމުން ފިހާރައިގެ ވެރިޔާ އަޔާޒް އަހުމަދު ބުނީ، މިއީ ރާއްޖޭގެ ފުޓްސަލް އާއިލާއަށް ހާއްސަކޮށްގެން ހުޅުވި ފިހާރައެއް ކަމަށެވެ. އަދި އޭނާއަކީ އަމަލީ ގޮތުން ފުޓްސަލް ކުޅޭ ކުޅުންތެރިޔަކަށް ވުމާއެކު، މި ވިޔަފާރީގެ ތެރެއަށް ވަނީ ރާއްޖޭގެ ކުޅުންތެރިންނަށް އެއް ފުރާޅެއްގެ ދަށުން ފެންވަރު ރަނގަޅު ތަކެތި ފަސޭހަކަމާއެކު ލިބޭނެ މަގުފަހިކޮށްދިނުމުގެ މަގްސަދުގައި ކަމަށް އޭނާ ފާހަގަކުރި އެވެ.

މި މަސައްކަތް ކާމިޔާބުކަމާއެކު ފެށުމުގައި އާއިލާ އާއި ގާތް ރަހުމަތްތެރިންގެ ފަރާތުން ލިބުނު ބޮޑު އެއްބާރުލުމަށްޓަކައި އަޔާ ވަނީ އެ ފަރާތްތަކަށް ހާއްސަ ޝުކުރެއް އަދާކޮށްފަ އެވެ. "އޭ10" ފިހާރަ ހުޅުވުމާއެކު، ރާއްޖޭގެ ފުޓްސަލް ކުޅުންތެރިންނަށް ބޭނުންވާ ފެންވަރު ރަނގަޅު ބޫޓާއި އެހެނިހެން ސާމާނު ހޯދުމުގައި ބޮޑު ލުޔެއް ލިބިގެންދާނެ ކަމަށް ބެލެވެ އެވެ.