ޑެވިލްއެކްސް ބަލިކޮށް ޓީއެފްޓީ ޗެމްޕިއަންކަން ހޯދައިފި

ވިލިމާލޭ ޒުވާނުންނަށް އަމާޒުކޮށްގެން ބޭއްވި ނަހުލާ އަލީ އީދު ފުޓްސަލް ޓޯނަމެންޓްގެ ޗެމްޕިއަންކަން ދަ ފުޓްސަލް ޓައުން (ޓީއެފްޓީ) ން ކާމިޔާބުކޮށްފިއެވެ.

ޓީއެފްޓީން މުބާރާތުގެ ތަށި އުފުލާލީ ފައިނަލް މެޗުގައި 1-0ން ޑެވިލްއެކްސް ބަލިކޮށްގެންނެވެ. މުބާރާތުގެ ރަނާއަޕްކަން ޑެވިލްއެކްސްއިން ހޯދިއިރު، ފެއާ ޕްލޭ ޓީމަކަށް ހޮވުނީ އެލްކިއު ސްޕޯޓްސް ކްލަބެވެ. ފައިނަލް މެޗުގެ މޮޅު ކުޅުންތެރިއަކީ ޓީއެފްޓީގެ އަބްދުﷲ މުއާޒްއެވެ.

މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ޓީއެފްޓީގެ އިސްމާއިލް ވިފާގްއެވެ. އެންމެ މޮޅު މެނޭޖަރަކަށް ޓީއެފްޓީގެ އަހުމަދު ހުޝާމް ހޮވުނުއިރު، މުބާރާތުގެ އެންމެ މޮޅު ގޯލްކީޕަރަކީ އެޓީމުގެ އިބްރާހިމް ނާޖިހުއެވެ. މުބާރާތުގެ އެންމެ އުންމީދީ ކުޅުންތެރިއަކީ ޑެވިލްއެކްސްގެ މުހައްމަދު އަނޫފްއެވެ. އެންމެ ގިނަ ލަނޑު ޖެހީ އައްޔާނީ އެފްސީގެ 15 ލަނޑު ޖެހި ޔަފާއުއެވެ.

މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ ޑެވިލްއެކްސްގެ އަބްދުލް އަޒީޒް އާއި އަންސަރުގެ އިތުރުން އައްޔާނީ އެފްސީގެ ޔަފާއު އަދި އެލްކިއު ސްޕޯޓްސް ކްލަބުގެ އަހްމަދު ނާޒިމް އާއި ޓީއެފްޓީގެ އަބްދުﷲ މުއާޒްއެވެ.

މިއީ ވިލިމާލޭގެ ޒުވާނުންނަށް އަމާޒުކޮށްގެން މާލޭ ސިޓީ ވިލިމާލޭ ދާއިރާގެ ކައުންސިލް މެމްބަރު ނަހުލާ އަލީގެ އިސްނެގުމާއެކު ކުރިއަށްގެންދިޔަ މުބާރާތެކެވެ. އީދާއި ގުޅުވައިގެން ބޭއްވި މި މުބާރާތް ކުރިއަށް ގެންދިޔައީ ތިން ދުވަހުގެ މުއްދަކަށެވެ. މި މުބާރާތުގައި ޖުމްލަ 32 ޓީމު ބައިވެރިވިއެވެ. މެޗުތައް ކުޅުނީ ނޮކްއައުޓް އުސޫލަށެވެ.

މުބާރާތުގެ ޗެމްޕިއަން ޓީމަށް ބައި ލައްކަ ރުފިޔާ އަދި ރަނާއަޕް ޓީމަށް 25،000 ރުފިޔާގެ އިތުރުން މެޑައްޔާއި ޓްރޮފީ ހަވާލުކުރިއެވެ. މީގެ އިތުރުން ފެއާ ޕްލޭ ޓީމަށް 10،000 ރުފިޔާގެ ފައިސާގެ އިނާމާއި ޓްރޮފީ ހަވާލުކޮށްފައިވެއެވެ.