ޓީއެފްޓީ އާއި ޑެވިލްއެކްސް ފައިނަލަށް

މިހާރު ކުރިއަށްދާ ނަހުލާ އަލީ އީދު ފުޓްސަލް ޓޯނަމެންޓްގެ ފައިނަލުގެ ޖާގަ ޓީއެފްޓީ އާއި ޑެވިލްއެކްސް ހޯދައިފިއެވެ.

ވިލިމާލޭ އެފްއޭއެމް ޓާފް ދަނޑުގައި ކުރިއަށް ގެންދާ މި މުބާރާތުގެ ފައިނަލުގެ ޖާގަ ޓީއެފްޓީން ހޯދީ ސެމީ ފައިނަލުގައި 7-0ން އެލްޓީ ސްޕޯޓްސް ކްލަބް ބަލިކޮށްގެންނެވެ. ދެވަނަ ސެމީގައި އައްޔާނީއާއި ވާދަކޮށް ޑެވިލްއެކްސް ކުރިހޯދީ 7-3ންނެވެ. ފައިނަލް މެޗު އޮންނާނީ މިރޭ 21:30 ގައެވެ.

މިއީ ވިލިމާލޭގެ ޒުވާނުންނަށް އަމާޒުކޮށްގެން މާލޭ ސިޓީ ވިލިމާލޭ ދާއިރާގެ ކައުންސިލް މެމްބަރު ނަހުލާ އަލީގެ އިސްނެގުމާއެކު ކުރިއަށްގެންދާ މުބާރާތެކެވެ. އީދާއި ގުޅުވައިގެން ބާއްވާ މި މުބާރާތް ކުރިއަށް ދާނީ ތިން ދުވަހުގެ މުއްދަކަށެވެ. މި މުބާރާތުގައި ޖުމްލަ 32 ޓީމު ބައިވެރިވިއެވެ. މެޗުތައް ކުޅުނީ ނޮކްއައުޓް އުސޫލަށެވެ.

މުބާރާތުގެ ޗެމްޕިއަންކަން ހޯދާ ޓީމަކަށް ބައި ލައްކަ ރުފިޔާ އަދި ރަނާއަޕް ޓީމަށް 25،000 ރުފިޔާ ދިނުމަށް ހަމަޖެހިފައިވެއެވެ. މީގެ އިތުރުން ފެއާ ޕްލޭ ޓީމަށް 10،000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ.