ކައިވެންޏަށް އެދި ހުށަހެޅުމަށް އެމްޕަޔަރ ސްޓޭޓް ބިލްޑިންގުގެ އެންޓަނާ މައްޗަށް އެރި ދެ މީހަކު ހައްޔަރުކޮށްފި

އެމްޕަޔަރ ސްޓޭޓް ބިލްޑިންގުގެ އެންމެ މަތީގައި ކައިވެންޏަށް އެދި ހުށަހެޅުމުގެ ގޮތުން ނުރައްކާތެރި ހަރަކާތެއް ހިންގި ދެ މީހަކު ނިއުޔޯކް ސިޓީން ހައްޔަރުކޮށްފި އެވެ.

އެމެރިކާގެ ނިއުސް ހެލިކޮޕްޓަރަކުން ބުދަ ދުވަހު ނަގާފައިވާ ވީޑިއޯއަކުން ފެންނަ ގޮތުގައި، ކަޅު ކުލައިގެ ހެދުން އަޅައިގެން ތިބި ދެ މީހަކު އެ ސިޓީގެ އެންމެ މަޝްހޫރު އެއް ބިނާ ކަމަށްވާ އެމްޕަޔަރ ސްޓޭޓް ބިލްޑިންގުގެ އެންޓަނާ މަތީގައި ތިއްބާ ފެނިފައިވެ އެވެ. ބިމުން ފެށިގެން ގާތްގަނޑަކަށް 443 މީޓަރު (1,454 ފޫޓު) އުސްމިނުގައި ތިބެ، އެ މީހުން ވަނީ އެމީހުންގެ އަތުގައި އޮތް ބެނާއެއް ދަމާލާފަ އެވެ.

102 ފަންގިފިލާގެ އެ އިމާރާތުގައި އާންމުންނަށް ވަދެވޭ ސަރަހައްދުތަކަށްވުރެ މާ މަތީގައި ހުންނަ އެ އެންޓަނާއަށް އެ ދެ މީހުން އެރި ގޮތެއް އަދި ސާފެއް ނުވެ އެވެ. ނަމަވެސް، އެ ދުވަހުގެ ފަހުގެ ވަގުތެއްގައި ފުލުހުން އާންމުކުރި ބޮޑީ ކެމެރާ ފުޓޭޖުން ފެންނަ ގޮތުގައި، އެ ނުރައްކާތެރި ހަރަކާތް ހިންގި ދެ މީހުން ބޭލުމަށް ފުލުހަކު ވަނީ އެ ސަރަހައްދަށް ގޮސްފަ އެވެ.

އެ ސަރަހައްދަށް އެރުމަށް ހަރުގަނޑަކުން މައްޗަށް އަރަމުން، ވަރަށް ބާރަށް ނޭވާލަމުން އެ ފުލުސް މީހާ އެ ދެ މީހުންގެ ގާތުގައި "ހާލު ކިހިނެއްތޯ" ސުވާލުކުރި އެވެ. ގަދަ ވަޔާއެކު އެ މީހުން ދިން ޖަވާބު ސާފު ނުވި ނަމަވެސް، އެ ތަނުގައި އެ މީހުންނަށް ނުތިބެވޭނެ ކަމަށް ފުލުސް މީހާ ބުނާ އަޑު އިވެ އެވެ.

ހައްޔަރުކުރި ދެ މީހުންނަކީ ރަޝިޔާގެ ދެ ރައްޔިތުން ކަން މިހާރު ވަނީ ކަށަވަރުވެފަ އެވެ. މި ދެ މީހުންނަކީ 2024 ވަނަ އަހަރު ނެޓްފްލިކްސް އިން ނެރުނު "ސްކައިވޯކާސް: އޭ ލަވް ސްޓޯރީ" ކިޔާ ޑޮކިއުމެންޓްރީއަކުން ފެނިގެންދިޔަ ދެ މީހުންނެވެ. މި ޑޮކިއުމެންޓްރީގައި ކިޔައިދެނީ އުސް އިމާރާތްތަކަށް އެރުމުގެ ކުޅިވަރެއް ކަމަށްވާ "ރޫފްޓޮޕިންގ" އަށް އެ ދެ މީހުންގެ ހުންނަ ޝައުގުވެރިކަމުގެ ވާހަކަ އެވެ.

މި ހާދިސާއާ ގުޅޭގޮތުން އެންޖެލާގެ ބައްޕަ، ޑިމިޓްރީ ނިކޮލާއު ރޮއިޓާސް ނިއުސް އެޖެންސީއަށް ބުނީ، އޭނާ އަމިއްލައަށް ވެސް އިމާރާތްތަކުގެ ފުރާޅު މައްޗަށް އަރާ ކަމަށާއި، އެހެންކަމުން އެކަމާ ކަންބޮޑުވާންޖެހޭ ސަބަބެއް ނެތް ކަމަށެވެ.

ރަޝިޔާގެ ސާކަސް އާޓިސްޓެއްގެ ގޮތުގައި ރޮއިޓާސްއިން ސިފަކޮށްފައިވާ ޑިމިޓްރީއަށް، އޭނާގެ ދަރިފުޅު އެ އިމާރާތަށް އަރަން އުޅޭކަން ކުރިންވެސް އެނގޭ ކަމަށް ރިޕޯޓުތައް ބުނެ އެވެ. އޭނާ ބުނި ގޮތުގައި، އެމެރިކާ ހިމެނޭހެން ކޮންމެ ގައުމެއްގައި ގާނޫނުއަސާސީއެއް އޮތް ނަމަވެސް، އިމާރާތެއްގެ ފުރާޅު މައްޗަށް އެރުމަކީ އާދައިގެ ކަމެކެވެ.

އެމްޕަޔަރ ސްޓޭޓް ބިލްޑިންގުގެ ތަރުޖަމާނަކު ނެރުނު ބަޔާނެއްގައި ބުދަ ދުވަހުގެ މި ހާދިސާއަކީ "ހުއްދަނެތި ހިންގި އަމަލެއް" ކަމަށް ވަނީ ސިފަކޮށްފަ އެވެ. އަދި އެ ދެ މީހުން ކައިވެންޏަށް އެދުމުގެ ހަރަކާތް ހިންގަންވީ އެ އިމާރާތުން ވިއްކާ 1,000 ޑޮލަރުގެ "ހެޕިލީ އެވަރ އެމްޕަޔަރ ޕްރޮޕޯސަލް ޕެކޭޖް" ގަނެގެން ކަމަށްވެސް އެ ބަޔާނުގައި ބުނެފައިވެ އެވެ.

ފަހުން ހާމަވެފައިވާ ފުޓޭޖުތަކުން ނިއުޔޯކް ފުލުހުން އެދެމީހުން ފަހަތައް ބިޑި އަޅުވައިގެން އިމާރާތުން ނެރެގެން ގެންދާ މަންޒަރު ފެނެ އެވެ.