ކުރިން ވިދާޅުވި ގޮތަށް، ބަންކަރިން އިން އަހަރަކު 400 މިލިއަން ޑޮލަރު ނުލިބުނު ސަބަބެއް މިނިސްޓަރަށް ވިދާޅެއް ނުވެވުނު
މިނިސްޓަރު ސައީދު ވިދާޅުވީ، އަދި ވެސް އުންމީދު ކުރައްވަނީ އަހަރަކު 400 މިލިއަން ޑޮަލަރުގެ އާމްދަނީއެއް ވަންދަން ކަމަށް. ނަމަވެސް މިނިސްޓަރު ކުރިން ވިދާޅުވެފައި އޮތީ ބަންކަރިންގެ ޚިދުމަތް ފަށާތާ ފުރަތަމަ އަހަރުގެ ތެރޭގައި 400 މިލިއަން ޑޮލަރުގެ އާމްދަނީއެއް ލިބޭނެ ކަމަށް އަންދާޒާ ކުރެވޭ ވާހަކަ ކަމަށް ފާހަގަ ކުރުމުން، މިނިސްޓަރު ވިދާޅުވީ އެ ސުވާލު ރާއްޖެ ޓީވީ އަށް ފޮނުވީ އިދިކޮޅު އެމްޑީޕީ އިން ކަމަށް ވަންޏާ އެމްޑީޕީއާ ސުވާލު ތަކެއް ކުރުމަށް އެދޭ ކަމަށް.
އިކޮނޮމިކް މިނިސްޓަރު މުޙައްމަދު ސައީދު. | ރައީސް އޮފީސް
މި ސަރުކާރުން އުތުރުގައި ފެށި ބަންކަރިންގެ ޚިދުމަތުން އަހަރަކު 400 މިލިއަން އެމެރިކާ ޑޮލަރުގެ އާމްދަނީއެއް ލިބޭނެ ކަމަށް އަންދާޒާ ކުރެވޭ ކަމަށް ކުރިން ވިދާޅުވެފައި އޮތް ނަމަވެސް، އެ މުއްދަތުގެ ތެރޭގައި އެ އަދަދުގެ އާމްދަނީއެއް ނުލިބުނު ސަބަބެއް އިކޮނޮމިކް މިނިސްޓަރު މުޙައްމަދު ސައީދު އަށް އެނގިވަޑައި ނުގެންނެވި އެވެ.
2024 ވަނަ އަހަރުގެ ޖުލައި މަހުގެ ހަތް ވަނަ ދުވަހުގެ ރޭ، ވެރިކަން ކުރާ ޕީއެންސީ އިން ބޭއްވި ޖަލްސާއެއްގައި ވާހަކަ ދައްކަވަމުން މިނިސްޓަރު ސައީދު ވިދާޅުވީ، އެ އަހަރުގެ ޖުލައި މަހު ބަންކަރިންގެ ޚިދުމަތް ފެށިގެން، 2025 ވަނަ އަހަރުގެ ޖުލައި މަހާ ހަމައަށް ރާއްޖޭގެ ޖީޑީޕީ އަށް މުޅިން އަލަށް 400 މިލިއަން އެމެރިކާ ޑޮލަރު ވަންނާނެ ކަމަށެވެ.
ނަމަވެސް ރަސްމީކޮށް ސަރުކާރުން ބަންކަރިންގެ ޚިދުމަތް ފަށާފައި ވަނީ 2024 ވަނަ އަހަރުގެ ސެޕްޓެމްބަރު މަހުގެ 19 ވަނަ ދުވަހު އެވެ. އެހެންކަމުން 2025 ވަނަ އަހަރުގެ ސެޕްޓެމްބަރު މަހުގެ 19 ވަނަ ދުވަހަށް އެއް އަހަރުވީއިރު، ކުރިން މިނިސްޓަރު ސައީދު ވިދާޅުވި ވަރުގެ އާމްދަނީއެއް ނުލިބެ އެވެ.
ބުރާސްފަތި ދުވަހު އޮތް ނޫސްވެެރިންގެ ބައްދަލުވުމުގައި ރާއްޖެ ޓީވީ އިން އެ ސުވާލު ކުރުމުން، މިނިސްޓަރު ސައީދު އެކަމަށް ޖަވާބެއް ދެއްވާފައި ނުވެ އެވެ.
މިނިސްޓަރު ސައީދު ވިދާޅުވީ، އަދި ވެސް އުންމީދު ކުރައްވަނީ އަހަރަކު 400 މިލިއަން ޑޮަލަރުގެ އާމްދަނީއެއް ވަންދަން ކަމަށެވެ. ނަމަވެސް މިނިސްޓަރު ކުރިން ވިދާޅުވެފައި އޮތީ ބަންކަރިންގެ ޚިދުމަތް ފަށާތާ ފުރަތަމަ އަހަރުގެ ތެރޭގައި 400 މިލިއަން ޑޮލަރުގެ އާމްދަނީއެއް ލިބޭނެ ކަމަށް އަންދާޒާ ކުރެވޭ ވާހަކަ ކަމަށް ފާހަގަ ކުރުމުން، މިނިސްޓަރު ވިދާޅުވީ އެ ސުވާލު ރާއްޖެ ޓީވީ އަށް ފޮނުވީ އިދިކޮޅު އެމްޑީޕީ އިން ކަމަށް ވަންޏާ އެމްޑީޕީއާ ސުވާލު ތަކެއް ކުރުމަށް އެދޭ ކަމަށެވެ.
މީގެ އިތުރުން މިނިސްޓަރު ސައީދު ވިދާޅުވީ ބަންކަރިންގެ ޚިދުމަތް އެ ދުވަހު ފެށުމުން، މިއަދު ރާއްޖެ އަށް ގާތް ގަނޑަކަށް އެއް ބިލިއަން ރުފިޔާގެ އާމްދަނީއެއް ލިބިފައިވާ ކަމަށެވެ. ހަމަ އެހެންމެ ސަރުކާރާއި އެމަނިކުފާނުގެ އަދިވެސް އުންމީދަކީ 400 މިލިއަން ޑޮލަރު ނުވަތަ ވީހާ ބޮޑު ނަފާއެއް އެކަމުން ހޯދުން ކަމަށެވެ. ނަމަވެސް، ކުރިން ވިދާޅުވެފައި އޮތް ގޮތަށް، އަހަރަކު 400 މިލިއަން އެމެރިކާ ޑޮލަރުގެ އާމްދަނީއެއް ނުލިބުނު ސަބަބެއް މިނިސްޓަރު ވިދާޅުވެފައި ނުވެ އެވެ.
ހަތަރު ސަތޭކަ މިލިއަން ޑޮލަރުގެ އާމްދަނީ ވަންނާނެ ކަމަށް އަޅުގަނޑު ބުނީ، އާދެ. އަޅުގަނޑު އަދިވެސް އުންމީދު ކުރަނީ ހަތަރު ސަތޭކަ މިލިއަން ޑޮަލަރަށް ވުރެ ވެސް ގިނައިން އާމްދަނީ ވައްދަން. އަހަރަކު، އާދެ، އަހަރަކު ވެސް. ޝައިޙާން، ތިޔަ ސުވާލު ޝައިޙާން އަށް ފޮނުވީ އެމްޑީޕީ އިން ކަމަށް ވަންޏާ، އައްސަވާ ބައްލަވާ އެ ބޭފުޅުން ކަނދު ފޮތި އަޅަން އުންމީދު ކުރިޔޭ ރާއްޖެ އިން ބޭރުގައި ކަނދު ފޮތި އަޅައިގެން އޭގައި ސްޕާ އާއި، އޭޓީއެމް އާއި އޭގައި މަސްވެރިންނަށް އައިސް ރޭކޮށްލެވޭ ގޮތަށް ކޮޓަރައި އަޅައިގެން އެ ޚިދުމަތް ދިނުމަށް. އެ ބޭފުޅުންގެ އިންޓެންޝަން އޮވެދާނެ އެކަން ކުރުމަށް.އިކޮނޮމިކް މިނިސްޓަރު މުޙައްމަދު ސައީދު
މީގެ އިތުރުން ވާހަކަ ދައްކަވަމުން މިނިސްޓަރު ސައީދު ވިދާޅުވީ އިކޮނޮމިކް މިނިސްޓަރުގެ ހައިސިއްޔަތުން، ރައީސް ޑޮކްޓަރު މުޙައްމަދު މުޢިއްޒު ފުޅާ ވިސްނުން، އެމަނިކުފާނު އަމިއްލަ އަށް ހަނި ކޮށްލައިގެން ނުވާނެ ކަމަށެވެ. އެއާ އެކު މިނިސްޓަރު ސައީދު ވިދާޅުވީ ކޮންމެ ކަމެއްގައި ވެސް ދުރަށް ވިސްނަން ޖެހޭނެ ކަމަށެވެ.
