ސަރުކާރުން ލޮޖިސްޓިކްސް ވިޔަފާރިއަށް ނުކުތުމުން އަމިއްލަ ވިޔަފާރިތަކުގެ ދުވަސްދާނެ: އަމީރު

މޯލްޑިވްސް ޕޯޓްސް ލިމިޓެޑު (އެމްޕީއެލް) އިން، މޯލްޑިވްސް ނޭޝަނަލް ލޮޖިސްޓިކްސްގެ ނަމުގައި ސަބްސިޑަރީ ކުންފުންޏެއް އުފައްދައިގެން ލޮޖިސްޓިކްސް ވިޔަފާރިއަށް ނުކުތުމުން އަމިއްލަ ވިޔަފާރިތަކުގެ ދުވަސް ދާނެ ކަމަށް އެމްޑީޕީ ސަރުކާރުގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ހޮނިހިރު ދުވަހު އެކްސް ގައި ކުރެއްވި ޕޯސްޓެއް ގައި އަމީރު ވިދާޅުވީ، ލޮޖިސްޓިކްސް ވިޔަފާރިއަކީ ރާއްޖޭގެ އަމިއްލަ ކުންފުނިތައް ވަރަށް ރަނގަޅަށް ކުރަމުން އަންނަ ކަމެއް ކަމަށާއި، އެތައް އަމިއްލަ ކުންފުނިތަކެއް ހަރަކާތްތެރިވާ ސިނާއަތެއް ކަމަށެވެ. އަދި ސަރުކާރުން މި ސިނާއަތަށް ވަނުމާއެކު މި އަމިއްލަ ވިޔަފާރިތަކުގެ ވެސް ދުވަސް ދިޔައީ ކަމަށް އޭނާ ވިދާޅުވި އެވެ.

އަމީރު މިހެން ވިދާޅުވިއިރު، މި ދާއިރާގައި ހަރަކާތްތެރިވާ އަމިއްލަ ވިޔަފާރިތަކުން ވެސް ދަނީ ކަންބޮޑުވުން ފާޅުކުރަމުންނެވެ. އަދި ސަރުކާރު އެހެން ކުންފުނިތައް މެދުވެރިކޮށް އަމިއްލަ ވިޔަފާރިތަކަށް ވަންނަ މައްސަލައި ގައި ވިޔަފާރިވެރިން މީގެކުރިން ވެސް ވަނީ ކަންބޮޑުވުން ފާޅުކޮށްފައިވެ އެވެ. 

މި ވިޔަފާރިއާ ގުޅޭގޮތުން އެމްޕީއެލުން ބުނީ، މޯލްޑިވްސް ނޭޝަނަލް ލޮޖިސްޓިކްސް އުފެއްދުމުގެ މައިގަނޑު މަގުސަދަކީ ރައްޔިތުންނަށް ބޭނުންވާ އަސާސީ މުދަލާއި ކާޑުގެ ބާވަތްތައް، ރާއްޖޭގެ އެކި ސަރަހައްދުތަކުގައި ގާއިމުކޮށްފައިވާ ގުދަންތަކެއް ދަތިކަމެއް ނެތި ފޯރުކޮށްދިނުން ކަމަށެވެ. ނޭޝަނަލް ލޮޖިސްޓިސްޓިކްސްގެ ދަށަށް ބަދަލުކުރި ޚިދުމަތްތަކުގެ ތެރޭގައި އެ ކުންފުނިން ފަށައިގެން އުޅޭ ޑޮމެސްޓިކް ޓްރާންސްޝިޕްމަންޓް ހިމެނެ އެވެ. މިއީ މާލޭ ވިޔަފާރި ބަނދަރަށް އަންނަ ޓްރާންސްޝިޕްމަންޓް ކޮންޓޭނަރުތައް، އެމްޕީއެލްގެ އުޅަނދުތަކުގައި ހިތަދޫ ޕޯޓާއި ކުޅުދުއްފުށީ ޕޯޓަށް ފޮނުވަން ފެށި ޚިދުމަތެއް ކަމަށް ވެސް އެމްޕީއެލުން ބުނެ އެވެ. 

މީގެ އިތުރުން ލޮޖިސްޓިކްސް ސާވިސްގެ ތެރެއިން ބޭރުން އަންނަ އުޅަނދުފަހަރަށް ފޯރުކޮށްދޭ، "ސްޓީވަޑޯރިން" ޚިދުމަތާއި ބޮންޑަޑް ވެއާހައުސް އަދި ސީ-ޓު-އެއާ ކާގޯގެ ޚިދުމަތްތައް ފޯރުކޮށްދޭނެ ކަމަށް އެމްޕީއެލް އިން ބުނެފައިވެ އެވެ.