ވީއޭއެމް އެސޯސިއޭޝަން ކަޕް: ސިފައިންނާއި ސީލައިފް ވެސް މޮޅުވެއްޖެ

ވޮލީބޯލް އެސޯސިއޭޝަން ކަޕްގައި ދިވެހި ސިފައިންގެ ކްލަބާއި ސީލައިފް ސްޕޯޓްސް ކްލަބް ކުޅުނު މެޗުތަކުން އެ ދެ ޓީމު ވެސް މޮޅުވެއްޖެއެވެ.

ބުދަ ދުވަހުގެ ހަވީރު ގުޑީސް ސްޕޯޓްސް ކްލަބާ ދެކޮޅަށް ކުޅުނު މެޗު ދިވެހި ސިފައިންގެ ކްލަބުން ކާމިޔާބު ކޮށްފައިވަނީ ސީދާ ތިން ސެޓުންނެވެ. މި މެޗުގެ ސެޓުތައް ސިފައިންގެ ކްލަބުން ގެންގޮސްފައި ވަނީ 25-13، 25-14 އަދި 25-11 އިންނެވެ. މި ދެ ޓީމު ވާދަ ކުރި މެޗުގެ މޮޅު ކުޅުންތެރިޔަކަށް ހޮވިފައި ވަނީ ދިވެހި ސިފައިންގެ ކްލަބްގެ ޖާޒީ ނަމްބަރު 14، އާދަމް ނަސީމްއެވެ.

ބުދަ ދުވަހުގެ ރޭ ވަން އެންޑް އޮންލީ ރީތި ރަށާ ދެކޮޅަށް ކުޅުނު މެޗުން ސީލައިފް ސްޕޯޓްސް ކްލަބް ކާމިޔާބުކޮށްފައި ވަނީ ސީދާ ތިން ސެޓުންނެވެ. މި މެޗުގެ ސެޓުތައް އެ ޓީމުން ގެންގޮސްފައި ވަނީ 25-18، 25-22 އަދި 25-12 އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ސީލައިފް ސްޕޯޓްސް ކްލަބްގެ ޖާޒީ ނަމްބަރު 7 މުބާޝިރް ރަޒާއެވެ.

މި މުބާރާތުގައި މި ދެ ޓީމުން ކުޅުނު ފުރަތަމަ މެޗު ވެސް ވަނީ ކާމިޔާބު ކޮށްފައެވެ. އެގޮތުން ސިފައިންގެ ކްލަބުން ވަނީ ފުރަތަމަ މެޗުގައި ވަން އެންޑް އޮންލީ ރީތި ރަށް ސީދާ ތިން ސެޓުން ބަލިކޮށްފައެވެ. އަދި ސީލައިފް ސްޕޯޓްސް ކްލަބްއިން ވަނީ ފުރަތަމަ މެޗުގައި ގުޑީސް ސްޕޯޓްސް ކްލަބް ސީދާ ތިން ސެޓުން ބަލިކޮށްފައެވެ.

މި މުބާރަތުގެ ކުޅުން މި މަހުގެ 28 ވަނަ ދުވަހާ ހަމަޔަށް ސޯޝަލް ސެންޓަރުގެ އިންޑޯ ކޯޓުގައި ކުރިޔަށް ދާނެއެވެ.