"މޯލްޑިވްސް މޮނިން ކަޕް 2026"ގައި ބައިވެރިވުމަށް ފުރުސަތު ހުޅުވާލައިފި
ފަތުރުވެރިކަމުގެ ދާއިރާގައި މަސައްކަތްކުރާ 27 އަހަރުން ދަށުގެ ޒުވާން ބާޓެންޑަރުންނަށް އަމާޒުކޮށްގެން ބާއްވާ މި މުބާރާތުގައި ބައިވެރިވުމުގެ ފުރުސަތު 2026 އޭޕްރިލް 1 އިން ފެށިގެން ސިމްޑީން ވަނީ ހުޅުވާލާފަ.
"މޯލްޑިވްސް މޮނިން ކަޕް 2026"ގައި ބައިވެރިވުމަށް ފުރުސަތު ހުޅުވާލުން | ސިމްޑީ
ސިމްޑީ ގްރޫޕްގެ ސިމްޑީ ބެވްގެ ފަރާތުން ބާއްވާ "މޯލްޑިވްސް މޮނިން ކަޕް 2026" ރަސްމީކޮށް އިއުލާނުކޮށް، މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
މި މުބާރާތުގައި ބައިވެރިވުމުގެ ފުރުސަތު 2026 އޭޕްރިލް 1 ވަނަ ދުވަހު ހުޅުވާލާއިރު، ރެސިޕީތައް ހުށަހެޅުމުގެ އެންމެ ފަހު ތާރީޚަކީ 2026 އޭޕްރިލް 18 އެވެ. ބައިވެރިވާން ބޭނުންވާ ފަރާތްތަކަށް ސިމްޑީގެ ރަސްމީ ޕޯޓަލް މެދުވެރިކޮށް ރެސިޕީ ހުށަހެޅޭނެއެވެ. މި މުބާރާތުގައި ބައިވެރިވުމަށް އެއްވެސް ފީއެއް ދައްކާކަށް ނުޖެހޭނެއެވެ.
މިއީ ބުއިންތައް ތައްޔާރުކުރުމުގެ ދާއިރާއިން ބައިނަލްއަގުވާމީ ފެންވަރުގައި ފާހަގަކޮށްލެވޭ، އުފެއްދުންތެރިކަމާއި ހުނަރުވެރިކަން ދައްކާލުމަށް ބާއްވާ މޮނިން ކަޕްގެ ރާއްޖޭގެ އެޑިޝަނެވެ. 2024 ވަނަ އަހަރު ބޭއްވި ފުރަތަމަ މުބާރާތުގެ ކާމިޔާބީ އަށް ފަހު، މިއަހަރުގެ މުބާރާތް ބޭއްވުމަށް ހަމަޖެހިފައިވަނީ ކުރުނބާ މޯލްޑިވްސްގައެވެ.
މި މުބާރާތުގެ މައިގަނޑު މަގްސަދަކީ ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ޒުވާން ހުނަރުވެރިންނަށް ބައިނަލްއަގުވާމީ މައިދާނެއްގައި ފުރުސަތުތައް ހޯދައިދީ، އެމީހުންގެ ފަންނީ ގާބިލުކަން އިތުރުކުރުމެވެ. މޮނިން ކަޕަކީ 2014 ވަނަ އަހަރުން ފެށިގެން ދުނިޔޭގެ އެކި ކަންކޮޅުތަކުގައި ބާއްވަމުން އަންނަ، ބާޓެންޑިންގް ދާއިރާގެ އައު ޖީލެއް ބިނާކުރުމަށް ފަރުމާކޮށްފައިވާ މުބާރާތެކެވެ.
މުބާރާތް ކުރިއަށްދާ ގޮތަށް ބަލާއިރު، ހުށަހަޅާ ރެސިޕީތަކުގެ ތެރެއިން އެންމެ ރަނގަޅު 7 ރެސިޕީ ހޮވައި، އެ ފަރާތްތަކުގެ މެދުގައި ބާއްވާ ގައުމީ ފެންވަރުގެ މުބާރާތް އޮންނާނީ 2026 މޭ 18 ވަނަ ދުވަހު ކުރުނބާ މޯލްޑިވްސްގައެވެ. މި މުބާރާތުން އެއްވަނައަށްދާ ފަރާތަކަށް ރީޖަނަލް މޮނިން ކަޕްގައި ރާއްޖެ ތަމްސީލުކުރުމުގެ ފުރުސަތު ލިބޭނެއެވެ. އަދި ސަރަހައްދީ މުބާރާތުން ކާމިޔާބު ހޯދައިފިނަމަ، ފްރާންސްގައި ބާއްވާ މޮނިން ކަޕް އިންޓަނޭޝަނަލް ފައިނަލްގައި ދުނިޔޭގެ އެންމެ މޮޅު ބާޓެންޑަރުންނާ ވާދަކުރުމުގެ ފުރުސަތު ލިބިގެންދާނެއެވެ.
ސިމްޑީ ބެވްއިން ހާމަކޮށްފައިވާ ގޮތުގައި، ރާއްޖޭގެ މުބާރާތުން އެއްވަނަ ހޯދާ ފަރާތް ސަރަހައްދީ މުބާރާތުގައި ބައިވެރިވުމަށް ކުރަންޖެހޭ ހުރިހާ ހަރަދެއް އެ ކުންފުނިން ބަލަހައްޓާނެއެވެ. ކުރުނބާ މޯލްޑިވްސްގައި ބާއްވާ ފައިނަލް އިވެންޓުގައި ބައިވެރިންގެ ހުނަރުވެރިކަމާއި، ޓެކްނިކަލް ގާބިލުކަމުގެ އިތުރުން ހުށަހަޅައިދޭ ގޮތްތައް ވަޒަންކުރާނީ މޮނިން އިންޓަނޭޝަނަލް ޓީމުގެ މަންދޫބުންނާއި ދާއިރާގެ ތަޖުރިބާކާރުން ހިމެނޭ ފަނޑިޔާރުންގެ ޕެނަލަކުންނެވެ.
