ރާއްޖޭގައި ހޭދަކުރި އުފާވެރި ޗުއްޓީ އެއް، ފަޅު ތެރެއިން އައި މަސްތަކެއްގެ އާދަޔާޚިލާފު "ހަމަލާ އަކާ" ގުޅިގެން ބިރުވެރި ތަޖުރިބާއަކަށް ބަދަލުވެއްޖެ

ރާއްޖޭގައި ހޭދަކުރި އުފާވެރި ޗުއްޓީއެއް، ފަޅު ތެރެއިން އައި މަސްތަކެއްގެ އާދަޔާޚިލާފު "ހަމަލާއަކާ" ގުޅިގެން ބިރުވެރި ތަޖުރިބާއަކަށް ބަދަލުވެއްޖެ ކަމަށް ފަތުރުވެރިޔަކު ބުނެފި އެވެ.

ޓިކްޓޮކްގައި lili_ilheme@ ގެ ނަމުން މަޝްހޫރުވެފައިވާ އަންހެނަކު ވަނީ، ރާއްޖޭގެ ގޮނޑުދޮށެއްގައި ހުއްޓާ ކުއްލިއަކަށް ބިރުވެރި ގޮތަކަށް މަސްތަކެއް އޭނާ އާ ދިމާލަށް ގްރޫޕަކަށް ފުމެމުން އަންނަ މަންޒަރު ފެންނަ ވީޑިއޯ އެއް ހިއްސާކޮށްފަ އެވެ.

މި އަހަރުގެ ޖެނުއަރީ މަހުގެ 13 ވަނަ ދުވަހު އާންމުކުރި މި ވީޑިއޯ އަށް މިހާތަނަށް 80.9 މިލިއަނަށް ވުރެ ގިނަ ވިއުސް ލިބިފައިވާއިރު، 14.5 މިލިއަން މީހުން ވަނީ މި ވީޑިއޯ އަށް ލައިކް ދީފަ އެވެ. އަދި 60،000 އަށް ވުރެ ގިނަ މީހުން ވަނީ މި ހާދިސާ އާ މެދު ހައިރާންކަމާއި މަޖާ މާނައިގައި ކޮމެންޓް ކޮށްފަ އެވެ.

ވީޑިއޯ ވައިރަލް ވުމާ އެކު ދުނިޔޭގެ ނަން މަޝްހޫރު ނޫސްތަކަށް މި ޚަބަރު ވަނީ އަރާފައެވެ. އެ ގޮތުން މަޝްހޫރު ނިއުސްވީކް ގައި މި ސްޓޯރީ ކަވަރު ކޮށްފައިވެ އެވެ.

ވީޑިއޯ އިން ފެންނަނީ ރާއްޖޭގެ ހިތްގައިމު ސާފު މޫދެކެވެ. ނަމަވެސް އެ ހަމަހިމޭންކަން ގެއްލިގެން ދިޔައީ، ކޮން ބާވަތެއްގެ މަސްތަކެއްކަން ނޭނގޭ މަސް އައިނެއް، ކެމެރާ ހިފަހައްޓައިގެން ހުރި އަންހެން މީހާ އާ ދިމާލަށް ބާރުމިނުގައި ފުމެމުން އަންނަން ފެށުމުންނެވެ. އެ ވަގުތު އޭނާ ބިރުން ހަޅޭއްލަވައިގަނެ، އެތަނުން ސަލާމަތްވާން ދުއްވައިގަންނަ އަޑު އިވެ އެވެ. ނަމަވެސް، އެ މަސްތައް އޭނާގެ ގައިގައި ނުޖެހި، ކައިރިން އަޅާފައި ދިޔުމުން އޭނާ ވަނީ ހިނިގަނޑެއް ޖަހާލާފަ އެވެ.

ވީޑިއޯ ގައި އޭނާ ލިޔެފައި ވަނީ، "ދިރިއުޅުމުގެ ބުރަކަމުން ދުރުވެލުމަށް ރާއްޖެ އަށް އައުމުން ދިމާވި ކަމެއް" ގެ ގޮތުގަ އެވެ.

މި ވީޑިއޯ ނަގާފައިވަނީ އދ. ދިގުރަށުގައި ކަމަށް ވެސް ބުނެފައިވެ އެވެ.

މި ވީޑިއޯ ބެލި ގިނަ ބަޔަކު ވަނީ ކޮމެންޓް ސެކްޝަންގައި ތަފާތު ޝުއޫރުތައް ފާޅުކޮށްފަ އެވެ. ބައެއް މީހުން ބުނެފައި ވަނީ މަސްތައް އެހާ ބާރަށް ދުވަނީ ނުރައްކާތެރި އެއްޗެއް އޭގެ ފަހަތުން އަންނާތީ ކަމަށް ލަފާކުރެވޭ ކަމަށެވެ.

ވީޑިއޯ ބެލި މީހުން ކުރި ބައެއް މަޖާ ކޮމެންޓްތަކުގެ ތެރޭގައި:"މަސްތައް އެ ދުވަނީ ކޮން އެއްޗެއް ފެނިގެންބާ؟ އަހަރެންވެސް ތިހެން ދުވާނަން،" އެކަކު ލިޔެފައިވެ އެވެ. އެހެން މީހަކު ބުނެފައިވަނީ، އެއީ "މަސްތައް ގަސްދުގައި ކުރި ކަމެއް،" ކަމަށެވެ. އެހެން މީހަކު ބުނެފައިވަނީ، "މިއީ ކޮން ބާވަތެއްގެ މަހުގެ އަސްކަރީ ތަމްރީނެއް ހެއްޔެވެ؟"

ނިއުސްވީކް އިން ވަނީ މިކަމާ ގުޅޭ އިތުރު މައުލޫމާތު ހޯދުމަށް ޓިކްޓޮކް މެދުވެރިކޮށް އެ އަންހެން މީހާއާ ގުޅަން މަސައްކަތް ކޮށްފައިވާ ކަމަށް ބުނެފައިވެ އެވެ.