މިސްކިތާ ގުޅޭގޮތުން މިނިސްޓަރު ޝަހީމް ހައްދަވަނީ ކަނޑައެޅިގެން ދޮގު: ދިގުރަށު ކައުންސިލް
4 ސެޕްޓެމްބަރު 2025 | ބުރާސްފަތި 08:322022 ވަނަ އަހަރަު ތަރައްގީކުރަން ފެށި މިސްކިތް ސަރުކާރު ބަދަލުވެގެން ދިޔައިރު ބޮޑު ބައެއްގެ މަސައްކަތް ވަނީ ނިމިފައި
ދިގުރަށުގެ މިސްކިތް 16 ނޮވެންބަރު 2023 ގައި ޕޯސްޓުކޮށްފައިވާ ވީޑިއޯގެ ސްކްރީން ޝޮޓެއް.
އދ. ދިގުރަށުގެ މިސްކިތާ ގުޅޭގޮތުން އިސްލާމިކް މިނިސްޓަރު ޑރ.ޝަހީމް އަލީ ސައީދު ހައްދަވަނީ ކަނޑައެޅިގެން ދޮގު ކަމަށް އެރަށުގެ ކައުންސިލުން ބުނެފިއެވެ.
ރާއްޖެއެމްވީއަށް އެރަށުގެ ކައުންސިލް މެންބަރު ވިދާޅުވީ، ދިގުރަށުގެ މިސްކިތް ބިނާކުރުމުގެ މަސައްކަތް ކުރިއަށް ދިޔައީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ކަމަށާއި، ސަރުކާރު ބަދަލުވެގެންދިޔަ ފަހުން މަސައްކަތް ކުރިއަށް ނުދާ ކަމަށެވެ.
މިސްކިތުގެ ބޮޑުބައެއް ނިންމާފައިވަނީ މިސަރުކާރުން ކަމަށް މިނިސްޓަރު ޝަހީމް ވިދާޅުވިއިރު، އެއީ ކަނޑައެޅިގެން ދޮގެއް ކަމަށާއި، އިސްލާމިކް މިނިސްޓަރަކަށް ހުންނަވައިގެން އެހާ ވަރަށް ދޮގު ނުހެއްދެވުމަށް ކައުންސިލް މެންބަރު އެދިވަޑައިގެންނެވިއެވެ. އަދި ވިދާޅުވީ ސަރުކާރު ދިފާއު ކުރުމަކީ މިނިސްޓަރުންގެ ޒިންމާއެއް ނަމަވެސް ހަގީގަތާ އެއްގޮތަށް މައުލޫމާތު ހާމަ ކުރަންޖެހޭ ކަމަށެވެ. މިއަދު ސަރުކާރު ދިފާއު ކުރެއްވުމަށް ހައްދަވާ ދޮގުތަކުން މިނިސްޓަރު ޝަހީމަށް ރައްޔިތުން ކުރަމުންދާ ގަދަރާއި، އިހުތިރާމް އަދި ލޯބި ގެއްލިގެންދާ ކަމަށް ކައުންސިލް މެންބަރު ވިދާޅުވިއެވެ.
2022 ވަނަ އަހަރަު ތަރައްގީކުރަން ފެށި މިސްކިތް ސަރުކާރު ބަދަލުވެގެން ދިޔައިރު ބޮޑު ބައެއްގެ މަސައްކަތް ވަނީ ނިމިފައެވެ. ނަމަވެސް މިސަރުކާރުގައި މިހާތަނަށް މިސްކިތުގައި ކުރަން ހުރި މަދު މަސައްކަތްތައް ވެސް އެއްވެސް ވަރަކަށް ކުރިއަށް ނުދާކަން ކައުންސިލުން ހާމަ ކުރުމާއެކު، މިނިސްޓަރު ޝަހީމް ވިދާޅުވީ މި ސަރުކާރު އައި ފަހުން މިހާތަނަށް ދެ މިލިއަން ރުފިޔާ ހަރަދުކޮށްގެން މިސްކިތް ގާތްގަނޑަކަށް ނިންމާފައިވާ ކަމަށެވެ. އަދި މިސްކިތް ފެށިއިރު، މުންނާރު ނެތް ކަމަށާއި، ހަމައެކަނި ވަނީ މުންނާރު ތެރޭގައި ހުންނަ ހަރުގަނޑު ކަމަށެވެ.
މިނިސްޓަރު ޝަހީމް ވިދާޅުވީ މިހާރު ފިނޭންސް މިނިސްޓްރީން މުންނާރަށް އެޕްރޫވަލް ދީފައިވާ ކަމަށާއި، އަމާޒަކީ ވީ އެންމެ އަވަހަށް މިސްކިތް ހުޅުވުން ކަމަށެވެ.
މީގެ އިތުރުން މިނިސްޓަރު ޝަހީމް ވަނީ މިސްކިތް ނުފެންނަ ގޮތަށް ހުރި ފޮޓޯތަކެއް ވެސް އެކްސްގައި ޕޯސްޓް ކުރައްވާފައެވެ. މިފޮޓޯތަކަށް އިޝާރާތް ކުރައްވައި ކައުންސިލް މެންބަރު ވިދާޅުވީ އެއީ ވެސް ހަގީގީ މަންޒަރު އޮޅުވާލުމަށް މިނިސްޓަރު ޝަހީމް ކުރެއްވި ކަމެއް ކަމަށެވެ. އަދި 16 ނޮވެންބަރު 2023 ގައި މިސްކިތުގެ ބޮޑު ބައެއް ނިމިފައިވާ ވީޑިއޯއެއް ސޯޝަލް މީޑިއާގައި ދައުރުވަމުންދާއިރު، ހަގީގަތް ރައްޔިތުންނަށް އޮޅުވާނުލެވޭނެ ކަމަށް އޭނާ ވިދާޅުވިއެވެ.
ދިގުރަށުގެ މިސްކިތް
01 ސެޕްޓެންބަރު 2025 ގައި އެރަށު ކައުންސިލްގެ ރައީސް އިބުރާހީމް އުސްމާންއާ ހަވާލާދެއްވައި، ''ސަރުކާރު ބަދަލުވި ގޮތަށް ދިގުރަށުގައި ތަރައްގީކުރަން ފެށި މިސްކިތުގެ މަސައްކަތް ހުއްޓިފައި'' މިސުރުޚީގެ ދަށުން ޚަބަރު ޝާއިއު ކުރުމާ ގުޅިގެން 3 ސެޕްޓެންބަރު 2025 ގައި މިނިސްޓަރު ޝަހީމް އެކްސްގައި ވަނީ މިސްކިތާ ބެހޭ ގޮތުން ޝާއިއު ކުރި ޚަބަރަށް ކޮމެންޓެއް ކުރެއްވުމަށް ވަގުތީ ގޮތުން ނަމަވެސް ބްލޮކް ފިލުވާލައި ދެއްވުމަށް ވެސް އެދިވަޑައިގެންފައެވެ.
މިނިސްޓަރު ޝަހީމް މިމޭރުމުން ވާހަކަ ދެއްކެވި ނަމަވެސް އިސްލާމިކް މިނިސްޓްރީގެ ގިނަ ކަންކަމާ ގުޅޭގޮތުން ރާއްޖެޓީވީގެ ނޫސްވެރިން ސުވާލު ކުރި ނަމަވެސް ޖަވާބެއް ދެއްވާފައިނުވެއެވެ. އަދި މިނިސްޓްރީގެ މައުލޫމާތު ހޯދުމަށް ހުށަހަޅާފައިވާ އާރްޓީއައިތަކުގެ ޖަވާބުގައި ވެސް މައުލޫމާތު ހިއްސާ ކޮށްފައެއް ނުވެއެވެ. ސެކްޝަނުން މައުލޫމާތު ލިބުނުހާ އަވަހަކަށް ފޯރުކޮށްދޭނަމޭ ބުނެ ދީފައިވަނީ ޖެނެރަލް ޖަވާބުތަކެވެ. އެއްވެސް ތަފްސީލީ މައުލޫމާތެއް ފޯރުކޮށްދީފައެއް ނުވެއެވެ.
