ބުޅަލުގެ ނަޖިސް ނުނަގާ މައްސަލަ ތާވަލު ކުރުމުން ސަރުކާރުގެ ކައުންސިލަރުން ހާޒިރެއް ނުވި، މިއަދުގެ ޖަލްސާ ވެސް ކެންސަލް
މި ޖަލްސާ ކޯރަމް ހަމަ ނުވެގެން ކެންސަލް ވުމާ ގުޅިގެން ގަލޮޅު އުތުރު ދާއިރާގެ ކައުންސިލަރު ސައިފް ފާތިހު އެކްސްގައި ވިދާޅުވީ ބުދަ ދުވަހުގެ ޖަލްސާއަށް 18 ކައުންސިލަރުންގެ ތެރެއިން ހާޒިރުވީ އެންމެ 7 ކައުންސިލަރުން ކަަމަށް.
މާލޭ ސިޓީ ކައުންސިލްގެ ބައްދަލުވުމުގެ ތެރެއިން | މާލެ ސިޓީ ކައުންސިލް
ބުޅަލުގެ ނަޖިސް ނުނަގާ މައްސަލަ އާއި ބުޅާ ފެސިލިޓީގެ ޚިދުމަތް ނުދެވޭ މައްސަލަ އެޖެންޑާ ކޮށްފައިވަނިކޮށް މާލެ ސިޓީ ކައުންސިލްގެ ބުދަ ދުވަހުގެ ޖަލްސާ ވެސް ކޯރަމް ހަމަނުވެގެން ކެންސަލް ކުރަން ޖެހިއްޖެ އެވެ.
މާލެ ސިޓީ ކައުންސިލުގެ ބުދަ ދުވަހުގެ ޖަލްސާ ކެންސަލް ކުރީ އެ ޖަލްސާ ފަށަން އޮތް ވަގުތު ފާއިތުވެގެން ދިޔައިރު ވެސް ކައުންސިލުގެ ކޯރަމް ހަމަ ނުވުމުންނެވެ. މާލެ ސިޓީ ކައުންސިލުގައި މާލޭގެ 18 ދާއިރާގެ ކައުންސިލަރުންނާއި މޭޔަރު ހިމެނޭހެން 19 ބޭފުޅުން ތިއްބަވަ އެވެ. މާލެ ސިޓީ ކައުންސިލުގެ ކޯރަމް އަކީ 10 ބޭފުޅުންނެވެ.
މި ޖަލްސާ ކޯރަމް ހަމަ ނުވެގެން ކެންސަލް ވުމާ ގުޅިގެން ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު އެކްސްގައި ވިދާޅުވީ ބުދަ ދުވަހުގެ ޖަލްސާއަށް 18 ކައުންސިލަރުންގެ ތެރެއިން ހާޒިރުވީ އެންމެ 7 ކައުންސިލަރުން ކަަމަށެވެ.
ސައިފް ވިދާޅުވީ މިދިޔަ މަހުގެ 24 ވަނަ ދުވަހު، ގަވާއިދުން މަގު ކުނިކަހާ ކުނި ނަގާއިރު ބުޅަލުގެ ނަޖިސް ނުނަގާ ކަަމަށާއި، އެގްރިކަލްޗަރ އެންޑް އެނިމަލް ވެލްފެއާ މިނިސްޓްރީ އަށް ބުޅާ ފެސިލިޓީގެ ޚިދުމަތް ނުދެވޭ މައްސަލަ ސިޓީ ކައުންސިލްގެ ޖަލްސާގައި އެޖެންޑާ ކޮށްދޭން ހުށަހަޅާފައިވާ ކަމަށެވެ.
އޭގެއިތުރުން ނިއުޓަރިންގް ޕްރޮގްރާމް ނުފެށޭކަމާއި، ވެމްކޯގެ ޓްރަކުތަކުން ކުނީގެ ދިޔަ ލީކުވުމާއި 'މުޑުދާރު' ތަންތަން ގަވައިދުން ސާފު ނުކުރުމާއި ސައިޒުން ބޮޑެތި ކުނި ފުނި ޖެހެންދެން މަގުމަތީގައި ބަހައްޓާތާ މައްސަލައިގައި މަޝްވަރާ ކުރުމަށް ވެސް ވަނީ ހުށަހަޅާފަ އެވެ.
ސައިފް ވިދާޅުވީ އެ މައްސަލަތައް ހުށަހެޅި ފަހުން، މާލެ ސިޓީ ކައުންސިލް ޖަލްސާގެ ކޯރަމް ހަމަނުވާ ކަމަށެވެ.
ޕީއެންސީގެ މެޖޯރިޓީ އޮންނަ މާލެ ސިޓީ ކައުންސިލްގެ ޖަލްސާތައް ކޯރަމް ހަމަނުވެގެން ކެންސަލް ކުރަން ޖެހޭ މައްސަލަ ވަރަށް ބޮޑެވެ. އަދި ގިނަ މައްސަލަތަކެއް ނުބެލި ވަނީ މަޑު ޖެހިފަ އެވެ.
