އީރާނުގެ ޑިޕްލޮމެޓުންނާއި މަންދޫބުން ޔޫރަޕިއަން ޕާލަމެންޓުގެ އިދާރާތަކަށް ވަނުން މަނާކޮށްފި
12 ޖެނުއަރީ 2026 | ހޯމަ 18:11ޔޫރަޕިއަން ޕާލިމެންޓުގެ އެއްވެސް އެހީތެރިކަމެއް އީރާނަށް ނުދިނުމަށް ނިންމާފައިވާ ކަމަށް ވެސް ވަނީ ބުނެފައި.
ޔޫރަޕިއަން ޕާލަމެންޓްގެ ރައީސް ރޮބާޓާ މެޓްސޮލާ | ގެޓީ އިމޭޖަސް
އީރާނުގައި ކުރިއަށްދާ މުޒާހަރާތަކާ ދެކޮޅަށް އެޤައުމުގެ ސަރުކާރުން ހިންގަމުންދާ އަނިޔާވެރި އަމަލުތަކާ ގުޅިގެން، އީރާނުގެ ހުރިހާ ޑިޕްލޮމޭޓުންނާއި މަންދޫބުން ޔޫރަޕިއަން ޕާލަމެންޓުގެ އިދާރާތަކަށް ވަނުން މަނާކޮށްފިކަމަށް އެ އިދާރާގެ ރައީސް ރޮބާޓާ މެޓްސޮލާ ހޯމަ ދުވަހު އިޢުލާން ކުރައްވައިފި އެވެ.
މެޓްސޮލާ 'އެކްސް' މެދުވެރިކޮށް ކުރެއްވި ޕޯސްޓެއްގައި ވިދާޅުވީ، ކަންތައްތައް ކުރިއެކޭ އެއްގޮތަށް ދެން ކުރިއަށް ނުގެންދެވޭނެ ކަމަށެވެ. އަދި އީރާނުގެ ހިތްވަރުގަދަ ރައްޔިތުން އެމީހުންގެ ހައްގުތަކާއި މިނިވަންކަމަށްޓަކައި ސާބިތުކަމާއެކު ވަކާލާތު ކުރަމުންދާއިރު، އީރާނުގެ އިސްލާމީ ޖުމްހޫރިއްޔާގެ އެއްވެސް ޑިޕްލޮމެޓިކް މުވައްޒަފަކަށް ނުވަތަ މަންދޫބަކަށް ޔޫރަޕިއަން ޕާލަމެންޓުގެ އެއްވެސް އިދާރާއަކަށް ނުވަދެވޭ ގޮތަށް ހޯމަ ދުވަހު ނިންމަވާފައިވާ ކަމަށް އޭނާ ވިދާޅުވި އެވެ.
މީގެ އިތުރުން، އަނިޔާވެރިކަމާއި، ފިއްތުންތަކާއި އަދި މީހުން މެރުމުގެ މައްޗަށް ބިނާވެ، ދެމިއޮތް ސަރުކާރަކަށް، ސަރުކާރެއްގެ ސިފަ ޖެއްސުމަށް (ލެޖިޓިމައިޒް ކުރުމަށް) އެ މަޖިލީހުން އެއްވެސް އެހީތެރިކަމެއް ނުދޭނެ ކަމަށްވެސް އޭނާ އިތުރަށް ވިދާޅުވި އެވެ.
