ސްޓެލްކޯގެ އެމްޑީ ކަމުން ވަކި ކުރި ޝަމާހު ގެ އޯޑިއޯ އެއް ލީކު ވެއްޖެ، ބުނަނީ ސްޓެލްކޯ ގައި މިކުރާ ކަންތައް އެމީހުންނަށް އެނގޭ ނަމަ ނޯށުން ރޯނެ ކަމަށް!

ސަރުކާރުގެ ކަރަންޓު ކުންފުނި ސްޓެލްކޯގެ މެނޭޖިންގ ޑިރެކްޓަރު ގެ މަގާމުން ވަކި ކުރި އަހުމަދު ޝަމާހު ހިންގާ ޚިޔާނާތުގެ ވާހަކަ ބަޔަކާ ހިއްސާ ކުރާ އޯޑިއޯ އެއް ލީކުކޮށްލައިފި އެވެ.

އެ އޯޑިއޯ ގައި އޭނާ ވާހަކަ ދައްކަމުން ގެންދިޔަ އިތުރު ބަޔަކަށް ކިޔައިދެމުން ގެންދިޔައީ ސްޓެލްކޯ ގައި އޭނާ ވަރަށް މޮޅަށް ހިންގަމުންދާ ވައްކަމާ ޚިޔާނަތުގެ ވާހަކަ ތަކެވެ.

ޝަމާހު ބުނާ އަޑު އިވެނީ އޭނާ ކުރާ ކަންތައްތައް އެތަނުގެ މީހުންނަކަށް ނޭނގޭނެ ކަމަށާއި އެންމެ ކައިރީގައި ހުންނަ މީހާ އަށް ވެސް އޮޅުވާލާފައި ވާނެ ކަމަށެވެ.

އެއްވެސް މީހަކަށް ދޮންކަޅު ވެސް ނޭނގޭނެ ދޯ އޭ އެހެން މީހަކު ބުނުމުން ޝަމާހު ބުނަނީ އަޒްހަދަށް އެނގޭނެ ކަމަށެވެ.

"މަ ބޭނުން މިކުރަނީ އޭނާތާ" ޝަމާހު ބުންޏެވެ.

އޯޑިއޯ ގައި ޝަމާހު ބުނީ އޭނާ ސްޓެލްކޯ ގައި ހިންގާ ޚިޔާނާތް އެނގޭނެ ތިބޭނީ ދެ މީހުން ކަމަށެވެ.

"ސްޓެލްކޯ އިން މަގޭ މިކުޅޭ ކުޅިވަރު އެނގޭނެ ތިބޭނީ ދެ މީހުން އެއީ އަޒްހަދު އާއި ސާއިދު އާ،" ޝަމާހު ބުންޏެވެ.

އޯޑިއޯ ގައި ޝަމާހު ބުނަނީ، މުޒޫ އަށް ގުޅާފައި ފިހާރަ އެއް ހުޅުވަން ހިނގާށޭ ބުނުމުން "މަ ޑްރީމް ކުރާ ވަރަކީ އެވަރު" ކަމަށް އޭނާ އަށް ހީވި ކަމަށެވެ.

އޭނާ އެމްޑީ ފިހާރަ އެއް ހުޅުވަނީހޭ އެހުމުން "ހިނގާށޭ ސްޓެލްކޯ ކާލަން" ޝަމާހު ބުނި ކަމަށް އޭނާ އޯޑިއޯ ގައި ބުނެ އެވެ.

އޭނާ "އެމްޑީ އަކަށް ނުވާނޭ" ބުނި ކަމަށް ޝަމާހު ބުންޏެވެ.

ޝަމާހު ބުނީ އެމީހުން އޭނާ "ރޭޓް ކޮށްފައި ވަނީ" ވަރަށް ދަށުން ކަމަށެވެ.

މުޒޫ ގޮސް އަސްމާ ކައިރީގައި އެވާހަކަ ބުނުމުން އެކަން އެމްޑީ އަކަށް ނުވާނެ ކަމަށް އަސްމާ ވެސް ބުނި ކަމަށް ޝަމާހު އޯޑިއޯ ގައި ބުނެ އެވެ.

"އަންހެން ކުދިން ފަހާ ދުވުން ހުއްޓާލައިގެން ނޫންހޯ އެމްޑީ އަށް ކަމެއްވާނި،" އަސްމާ ބުނި ކަމަށް ޝަމާހް އޯޑިއޯ ގައި ބުނެ އެވެ.

ސްޓެލްކޯ ގައި މިއުޅޭ ޓޮޕް ލެވެލް ގައި އެމީހުން ނިންމާފައި އިންނަނީ ޝަމާހު އަކީ އަންހެނުންނާ ހެދި މޮޔަވެފައި ހުންނަ މީހެއްގެ ގޮތުގައި ކަމަށް ޝަމާހު ބުންޏެވެ.

ލާރި އަކީ އެއްވެސް ވަރަކަށް އޭނާ ވިސްނާ އެއްޗެއް ނޫން ކަމަށް އެމީހުންނަށް ވިސްނިފައި އޮންނަ ކަމަށް ޝަމާހު ބުނެ އެވެ.

"އެކަމު މި މީހުން ނޯށުން ރޯނެ މި ހުރިހާ އެއްޗެއް އިނގޭ ނަމަ." ޝަމާހު ބުންޏެވެ.

އޭނާ އޯޑިއޯ ގައި ބުނަނީ ސްޓެލްކޯގެ އިސް މީހުންނަށް އޭނާ އަކީ ވައްކަމާ ޚިޔާނާތުގެ ރޮނގުން ޕީއެޗްޑީ ހަދައިގެން ހުރި މީހެއް ކަމެއް ނޭނގޭ ކަމަށެވެ. 

އޯޑިއޯ އާ ބެހޭ ގޮތުން ޝަމާހު ގެ ބަހެއް ހޯދުމަށް މި ނޫހުން ކުރި މަސައްކަތް ކާމިޔާބުވެފަ އެއް ނުވެ އެވެ.

ޝަމާހު ސްޓެލްކޯގެ އެމްޑީ ކަމަށް އައްޔަން ކުރީ މިދިޔަ އަހަރުގެ ސެޕްޓެމްބަރު މަހުގައެވެ. މަގާމުން އޭނާ ވަކި ކުރީ އާދިއްތަ ދުވަހު އެވެ.

ޝަމާހު ވަނީ މީގެ ކުރިން މިފްކޯގެ މެނޭޖިން ޑިރެކްޓަރުގެ މަގާމު ވެސް ފުރުއްވައިފަ އެވެ. އޭރު އޭނާ އެ މަގާމުން ވަކި ކުރީ ބޮޑެތި ތުހުމަތެއްކޮށް، އެއްމަސް ވަންދެން ސަސްޕެންޝަނުގައި ބެހެެއްޓުމަށް ފަހުގަ އެވެ.

ސްޓެލްކޯގެ ވެރިކަން އޭނާ އަށް ރައީސް މުއިއްޒު ދެއްވުމުގެ ކުރިން ހުރީ ފިޝަރީޒް މިނިސްޓްރީގެ ސްޓޭޓް މިނިސްޓަރު ގެ މަގާމުގަ އެވެ.