ބާޒާރުން ލިބެން ހުންނަ އަގަށް ވުރެ ބޮޑުކޮށް އާސަންދައިން ބޭސް ދޫކޮށްފައިވޭ: އޮޑިޓް
އާސަންދަ ސްކީމުގެ އޮޑިޓް ރިޕޯޓުގައި ބުނެފައިވަނީ އާންމުކޮށް ބޭނުންކުރާ 26 ބޭހުގެ ތެރެއިން 17 ބޭހެއްގެ އަގު ބާޒާރުން ލިބޭ އަގަށްވުރެ ބޮޑުކޮށް ސްކީމުން ދޫކުރާކަމަށް. ބައެއް ބޭސްތައް 63 އިންސައްތަ އާހަމަޔަށް ވެސް އިތުރުކޮށް ދޫކުރާކަމަށާއި ބޭހުގެ އަގު ކަނޑައެޅުމުގައި ގަވާއިދުގައިވާ މިންގަނޑަށް އަމަލުނުކުރާކަން ފާހަގަކޮށްފައިވޭ. މި 17 ބޭހަށް 3 އަހަރުތެރޭ އިސްރާފަށް މަގުފަހިވާގޮތަށް 45 މިލިއަން ރުފިޔާ އިތުރަށް ހަރަދުވާނެކަމަށް އޮޑިޓުގައި ބުނެފައިވޭ.
އެސްޓީއޯ ފާމަސީ | އެސްޓީއޯ
ބާޒާރުން ލިބެން ހުންނަ އަގަށް ވުރެ ބޮޑުކޮށް އާސަންދައިން ބޭސް ދޫކޮށްފައިވާ ކަމަށް އާސަންދައިގެ އޮޑިޓް ރިޕޯޓުގައި ބުނެފި އެވެ.
އިޖުތިމާއީ ސިއްހީ އިންޝުއަރަންސް ސްކީމުގެ ޕާރފޯމަންސް އޮޑިޓް ރިޕޯޓުގައި ބުނެފައިވަނީ ރާއްޖޭގައި ބޭސް ލިބެން ހުންނަ އަގު ބޮޑުކަމަށް ފާހަގަކުރެވިފައި ވާއިރު، ރާއްޖެއަށް އެތެރެކުރާ އަދި އާންމުކޮށް ބޭނުންކުރެވޭ ބައެއް ބޭސްތައް ބާޒާރުން ލިބެން ހުރި އަގަށްވުރެ ބޮޑުކޮށް އާސަންދަ ސްކީމުން ހަރަދުކުރާކަމަށް އޮޑިޓްގައި ބުނެފައިވެ އެވެ. އެގޮތުން، އާންމުކޮށް ބޭނުންކޮށް އުޅޭ 26 ބޭހެއް ބޭސް ފިހާރަތަކުން ދޫކުރާ އެންމެ ކުޑަައަގާއި އާސަންދައިން އެ ބޭސް ދޫކުރާ އަގާ އަޅާބެލި އިރު، 17 ބޭހެއްގެ އަގު، ބާޒާރުން ވިއްކާ ވަރަށް ވުރެ ބޮޑުކޮށް ސްކީމުން ދޫކުރާކަން ފާހަގަކޮށްފައިވެ އެވެ.
މިގޮތުން، މީގެ ތެރެއިން ބައެއް ބޭސް ފިހާރަތަކުން، ބޭސް ވިއްކާ އެންމެ ކުޑަ އަގަށްވުރެ، ސްކީމް މެދުވެރިކޮށް ބޭސް ވިއްކާ އަގު 63 އިންސައްތަ އާ ހަމައަށް ވެސް އިތުރު ކޮށްފައިވާކަމަށް އޮޑިޓުގައި ފާހަގަކޮށްފައިވެ އެވެ. އެހެންކަމުން، ސްކީމުގެ އަގުތައް ތިރިކުރުމުގެ ފުރުސަތު އޮތްކަމާއި އަގުތައް ރިވިއުކުރަން ޖެހިފައިވާ ކަމަށް އޮޑިޓުގައި ބުނެފައިވެ އެވެ.
މީގެ އިތުރުން ރާއްޖޭގެ ބާޒާރު ބައްޓަން ވެފައިވަނީ މޮނޮޕޮލިސްޓިކް ކޮމްޕެޓިޝަން މޮޑެލްއަށް ކަމުން، ގިނަ އަދަދެއްގެ އިމްޕޯޓަރުން ކުދިކުދި އަދަދުތަކުން ބޭސް އެތެރެ ކުރުމުގެ ސަބަބުން، ވޮލިއުމް ޑިސްކައުންޓް ނުލިބި ރާއްޖެއަށް ބޭސް ލިބޭ އަގު ބޮޑުވާ ކަމަށް އޮޑިޓުގައި ފާހަގަކޮށްފައިވެ އެވެ. އެގޮތުން، މި ސަރަހައްދުގެ އެހެން ގައުމުތަކާ އަޅައިބަލާ އިރު، ރާއްޖޭގައި ބޭސް ލިބެން ހުންނަ އަގު ބޮޑުވުމަކީ ވެސް ބޭހަށް ކުރާ ހަރަދު އިތުރުވުމުގެ ސަބަބުތަކުގެ ތެރޭގައި ހިމެނޭ ކަމެއް ކަމަށް ބުނެފައިވެ އެވެ. ބަލްކް ޕްރޮކިއުމަންޓްގެ ދަށުން 2024 ވަނަ އަހަރު 10 ބޭހެއް އަދި 2025 ވަނަ އަހަރު 7 ބޭހެއް އެތެރެކޮށް އާސަންދައިން ދޫކުރަން ފަށާފައި ވީނަމަވެސް، މި 17 ބޭހުގެ ތެރެއިން 3 ބޭހެއް ފިޔަވައި، އެހެން ހުރިހައި ބޭހެއްގެ އަގުތައް ކޮންޓްރޯލްކުރެވިފައިވާ ކަމަށް އޮޑިޓްގައި ފާހަގަކޮށްފައިވެ އެވެ.
އޮޑިޓުގައި ބުނެފައިވަނީ އާސަންދައިން ބޭސް ވިއްކާ އަގު ކަނޑައެޅުމުގައި ބޭހާ ބެހޭ ގަވާއިދުގައިވާ މިންގަނޑަށް ޢަމަލުކުރަމުން ނުދާކަން ފާހަގަކުރެވުނެވެ. އެގޮތުން، ބޭހުގެ އަގު ކަނޑައެޅުމުގައި އެކި ފަހަރު އެކި ކަންކަމަށް ރިއާޔަތް ކޮށްފައިވާކަމާއި ބައެއް ބޭހުގެ އަގު ކަނޑައެޅުމުގައި ހިދުމަތް ފޯރުކޮށްދޭ ފަރާތުން ހުށަހަޅާ އަގު ހަމަޖައްސައިފައިވާއިރު، ބައެއް ފަހަރު އެފަރާތުން ބަޔާންކުރާ ހޯލްސޭލް އަގަށް ބިނާކޮށް ނުވަތަ ބޭސް ވިއްކާ ފަރާތުން އަގު ހޯދުމަށްފަހު ބޭހުގެ އަގު ކަނޑައަޅައިފައިވާކަން ވެސް ފާހަގަކުރެވުނު ކަމަށް އޮޑިޓްގައި ބުނެފައިވެ އެވެ.
އަދި ކުންފުނިން ބޭހުގެ އަގު ހެދުމުގައި އެކިފަހަރު އެކި ގޮތަށް އަމަލުކޮށްފައިވަނީ އެމްއާރުޕީ ކަނޑައަޅައިފައި ނެތުމުންނާއި، ފާމަސީތަކުންނާއި މޯލްޑިވްސް ކަސްޓަމްސް ސަރވިސްއިން ހުށަހަޅާ އިންވޮއިސްތައް ދިމާނުވުމުން ކުރިމަތިވާ ގޮންޖެހުންތަކުގެ ސަބަބުންނާއި، ފާމަސީތަކުން އިންވޮއިސް އަދި ސީއައިއެފް އަގު ހުށަހެޅުމަށް އުޒުރުވެރިވުމާއި ބޭސް އެތެރެކުރާ ފަރާތްތަކުގެ ތަފާސްހިސާބުތަކުގައި ބޮޑެތި ފަރަގުތައް ހުރުމުން އަގު ކަނޑައެޅުމަށް ދިމާވާ ގޮންޖެހުންތަކުގެ ސަބަބުން އެނޫން ގޮތަކަށް އެކަން ކުރެވެން ނޯންނާތީކަމަށް އާސަންދަ ކުންފުނިން މައުލޫމާތު ދީފައިވާ ކަމަށް އޮޑިޓުގައި ބުނެފައިވެ އެވެ.
އަދި ބޭހާބެހޭ ގަވާއިދުގައި ބަޔާންކޮށްފައިވާ މިންގަނޑަށް ވުރެ ބޮޑުކޮށް އާސަންދައިން ބޭހުގެ އަގު ކަނޑައަޅައިފައިވުމުގެ ސަބަބުން، އޮޑިޓުގައި ބެލި 17 ބޭހަށް އެކަނިވެސް އިސްރާފަށް މަގުފަހިވާގޮތަށް 45 މިލިއަން ރުފިޔާ 3 އަހަރު ތެރޭގައި އިތުރަށް ހަރަދުވާނެކަމަށް އަންދާޒާކުރެވޭ ކަމަށް ބުނެފައިވެ އެވެ.
