އިލެކްޝަންސް ކޮމިޝަނުން ސިޔާސީ ޕާޓީތަކަށް ރަޖިސްޓްރީވުމާއި ޕާޓީން ވަކިވުމުގެ ކަންތައް ލުއިފަސޭހަކުރުމަށް އުސޫލުތަކަށް ބަދަލުތަކެއް ގެނެސްފައިވާއިރު ބުރާސްފަތި ދުވަހުން ފެށިގެން އަމަލުކުރަން ވަނީ ފަށާފައި. ޕާޓީއަކަށް ރަޖިސްޓްރީވާން ހުށަހެޅި ރިކުއެސްޓަށް ޕާޓީން ޖަވާބު ނުދިނަސް 30 ދުވަސް ފަހުން އޮޓޯމެޓިކުން ރަޖިސްޓަރީވާނެ. ޕާޓީން ވަކިވާން ހުށަހަޅާ ރިކުއެސްޓް ވަގުތުން ޕްރޮސެސްކުރެވޭނެ އުސޫލަށް ވަނީ ބަދަލުގެނެވިފައި.
އިލެކްޝަންސް ކޮމިޝަން
ސިޔާސީ ޕާޓީއަކަށް އަމިއްލަށް ވަދެ އަދި ބޭނުންވެއްޖެ ނަމަ އަމިއްލައަށް ވަކިވާ ގޮތަށް އިލެކްޝަންސް ކޮމިޝަނުން ޕޯޓަލް އެއް ހަދައިފި އެވެ.
އިލެކްޝަންސް ކޮމިޝަނުން ބުނީ ސިޔާސީ ޕާޓީތަކަށް ރަޖިސްޓަރީވުމަށާއި ޕާޓީން ވަކިވުމުގެ އެންމެހައި ކަންކަން އިތުރަށް ލުއިފަސޭހަކޮށް، އަވަސް ކުރުމުގެ ގޮތުން ބަދަލުތަކެއް ގެނެސް، ބުރާސްފަތި ދުވަހުން ފެށިގެން ޢަމަލު ކުރުމަށް ނިންމާފައިވާ ކަމަށެވެ.
ސިޔާސީ ޕާޓީގެ މެންބަރުންގެ ގޮތުގައި ދަފުތަރުކުރުމަށް މައި ޕޯޓަލް މެދުވެރިކޮށް ހުށަހަޅާ ރިކުއެސްޓް ޕާޓީން ޕްރޮސެސްކުރުމަށް ސިޔާސީ ޕާޓީތަކަށް 30 ދުވަހުގެ މުއްދަތެއް ދިނުން އަދި މި މުއްދަތު ހަމަވާއިރު، ރިކުއެސްޓް ޕާޓީއިން ޕްރޮސެސްކޮށްފައި ނުވާނަމަ، އެފަރާތެއް ޕާޓީގައި ރަޖިސްޓަރީ ވާނެ ކަމަށް އިލެކްޝަންސް ކޮމިޝަނުން ބުނެ އެވެ.
އަދި ސިޔާސީ ޕާޓީގެ ދަފުތަރުން ވަކިވުމަށް މައި ޕޯޓަލް މެދުވެރިކޮށް ހުށަހަޅާ ފަރާތްތަކުގެ ރިކުއެސްޓް، ވަގުތުން ވަކިވާނޭހެން ވަނީ ބަދަލުގެނެވިފަ އެވެ. އެހެންނަމަވެސް އެ ކޮމިޝަނުގައި ދަފްތަރުކުރެވިފައިވާ ސިޔާސީ ޕާޓީތަކުގެ އިސްމަޤާމުތަކުގައި ތިއްބަވާ މެންބަރުން ޕާޓީއިން ވަކިވާނަމަ ނުވަތަ އެހެން ޕާޓީއަކަށް ރަޖިސްޓަރީކުރާނަމަ، އެ ކޮމިޝަނުގައި ދަފުތަރުކުރެވިފައިވާ ސިޔާސީ ޕާޓީގެ އިސްމަޤާމުން ވަކިވުމަށް ހުށަހަޅަންވާނެ ކަމަށް އިލެކްޝަންސް ކޮމިޝަނުން ބުނެ އެވެ.
ސިޔާސީ ޕާޓީއަކުން، އެ ޕާޓީގެ މެންބަރަކު، ޕާޓީގެ ދަފްތަރުން އުނިކުރުމަށް ބޭނުންވެއްޖެ ހާލަތެއްގައި، ސިޔާސީ ޕާޓީއަށް ދެވިފައިވާ ސިމެދަ ޕޯޓަލްގެ ލޮގިން މެދުވެރިކޮށް ޕާޓީން ވަކިކުރުމަށް ރިކުއެސްޓުކުރުމުން ޕާޓީން ވަކިވާނެ އެވެ.
