ހަނގުރާމަ ހުއްޓާލަން ތައިލެންޑާއި ކެމްބޯޑިއާ އިން އެއްބަސްވެއްޖެ

ތައިލެންޑާއި ކެމްބޯޑިއާ އާ ދެމެދު ހިނގަމުން އައި ހަނގުރާމަ ހުއްޓާލަން ދެ ޤައުމުން ވެސް އެއްބަސްވެއްޖެ އެވެ.

ހޮނިހިރު ދުވަހު ދެ ޤައުމު ގުޅިގެން ނެރެފައިވާ ބަޔާނެއްގައި ބުނެފައި ވަނީ، ވަގުތުން ހަނގުރާމަ ހުއްޓާލުމަށް އެއްބަސްވެފައިވާ ކަމަށެވެ. އަދި އެތައް ދުވަސް ތަކަކަށް ދެމިގެން ދިޔަ ހަނގުރާމަ އާއި، ހަމަނުޖެހުން ހުއްޓާލުމަށް ވައުދުވެފައިވާ ކަމަށް ބުނެފައިވެ އެވެ. 

ރަސްމީ ތަފާސް ހިސާބުތައް ދައްކާ ގޮތުގައި، ހަނގުރާމައިގައި ޓޭންކަރުތަކާއި، ޑްރޯން އަދި ހަނގުރާމައިގެ އެހެން އާލާތްތައް ބޭނުން ކޮށްގެން ކުރިއަށް ގެންދިޔަ ހަނގުރާމައިގައި މަދުވެގެން 47 މީހަކު ވަނީ މަރުވެފަ އެވެ. އަދި ހަނގުރާމައިގެ ސަބަބުން ގެދޮރު ދޫކޮށް ދާން ޖެހުނު މީހުންގެ އަދަދު މިލިއަނުން މައްޗަށް ގޮސްފައިވާ ކަމަށް ވަނީ ހާމަ ކޮށްފަ އވެެ. 

އެމެރިކާގެ ރައީސް ޑޮނަލްޑް ޓްރަމްޕްގެ މެދުވެރިކަމާ އެކު މީގެ ކުރިން ވެސް ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައި ވީ ނަމަވެސް، އެ އެއްބަސްވުމާ ޚިލާފަށް ދެ ޤައުމުން ވެސް ވަނީ ހަމަލާ ދިނުން ކުރިއަށް ގެންގޮސްފަ އެވެ. 

ތައިލެންޑާއި ކެމްބޯޑިއާގެ ޑިފެންސް މިނިސްޓަރުން ސޮއި ކުރައްވައި ނެރުނު ބަޔާނެއްގައި ބުނެފައި ވަނީ، ބަޔާނުގައި ސޮއި ކޮށްފައިވާ ވަގުތުން ފެށިގެން ހަނގުރާމަ ހުއްޓާލުމަށް އެއްބަސްވާ ކަމަށެވެ. އެގޮތުން އެއީ 2025 ޑިސެމްބަރު 27 ވީ ހޮނިހިރު ދުވަހުގެ މެންދުރު 12:00 އިން ފެށިގެން ކަމަށް ބުނެފައިވެ އެވެ. 

ހަނގުރާމަ ހުއްޓާލުމުގެ އެއްބަސްވުން ގުޅޭނީ ހުރިހާ ވައްތަރެއްގެ ހަތިޔާރު ތަކާއި، އާންމުންނަށް ދިން ހަމަލާ ތަކާއި، އާންމުންގެ މުދާތަކަށް ލިބުނު ގެއްލުން ތަކާއި، އިންފްރާސްޓްރަކްޗާ އަށް ލިބުނު ގެއްލުންތަކާ ކަމަށް ބަޔާނުގައި ބުނެފައިވެ އެވެ. ދެ ޤައުމުން ވެސް އެއްބަސްވެފައި ވަނީ ސިފައިންގެ ހުރިހާ ހަރަކާތެއް ވެސް ފްރީޒް ކުރުމަށެވެ. 

މީގެ އިތުރުން ސަރަހައްދުގައި ދިރިއުޅޭ އާންމުންނަށް، ވީހާ ވެސް އަވަހަކަށް އެމީހުންގެ ގެތަކަށް އެނބުރި ދިޔުމުގެ ފުރުސަތު ދިނުމަށް އެއްބަސްވުމުގައި ހިމަނާފައިވެ އެވެ. އަދި މައިން ނައްތާލުމުގެ މަސައްކަތާާއި، ސައިބާ ކްރައިމްއާ ދެކޮޅަށް މަސައްކަތް ކުރުމަށް ވެސް ދެ ޤައުމުން ވަނީ އެއްބަސްވެފަ އެވެ.

ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައިވާއިރު، އޭގެ ކުރިން ތައިލެންޑާއި ކެމްބޯޑިއާ ވެސް ހިމެނޭ އާސިއާންގެ ފޮރިން މިނިސްޓަރުން ވަނީ ކުއްލި ބައްދަލުވުން ތަކެއް ބާއްވައި، ތިން ދުވަހުގެ މަޝްވަރާ ތަކެއް ކުރިއަށް ގެންގޮސްފަ އެވެ.

އެމެރިކާ އާއި، ޗައިނާ އަދި މެލޭޝިއާ އިން ވެސް ވަނީ، ހަނގުރާމަ ހުއްޓާލުމަށް މި ދެ ޤައުމަށް ގޮވާލައިފަ އެވެ.