ފޯކައިދޫ ގައި އިސްލާމީ މަރުކަޒެއް މުއިއްޒު އަޅައިދޭތީ ބޮޑު މިސްކިތް ތަޅާލައި، ސްކޫލުގައި ހުކުރު ކުރާ ގޮތައް ހަމަޖައްސާ، އެންމެ ފަހުން އެޅި ބިންގާ ވެސް ގެއްލިއްޖެ!
ފޯކައިދޫ ގައި އިސްލާމީ މަރުކަޒެއް ގާއިމްކުރުމަށް ރަށުގެ ބޮޑު މިސްކިތް ރައީސްގެ ދަތުރުފުޅާ ދިމާކޮށް ތަޅާލައި ދެ މަސް ދުވަސް ވަންދެން ސްކޫލު ހޯލުގައި ހުކުރު ކުރަން ޖެހުނު އިރު، ތަޅާލި މިސްކިތް ހުރި ބިމުގައި އެއްވެސް މަސައްކަތެއް ނުކުރާތާ 2 މަސް ދުވަސް ވެއްޖެ.
ރައީސް މުއިއްޒު ށ. ފޯކައިދޫ އަށް ވަޑައިގަންވާތީ އެރަށުގައި ތަރައްގީ ކުރާ އިސްލާމީ މަރުކަޒު އަޅަން ވެގެން ބޭނުން ކުރަމުން ދިޔަ މިސްކިތް ތަޅާލާފައި
ރައީސް ޑރ. މުހައްމަދު މުއިއްޒުގެ ދަތުރުފުޅާ ގުޅިގެން ށ. ފޯކައިދޫ ބޮޑު މިސްކިތް ތަޅާލީ އެރަށުގައި އިސްލާމީ މަރުކަޒެއް އަޅުއްވައިދެއްވުމުގެ މަސައްކަތް ހުއްޓާ ނުލާ ކުރިއަށް ގެންދާނެ ކަމަށް ވިދާޅުވުމުން ކަމަށާއި، ނަމަވެސް އެޅި ބިންގަލަށް ވީ ގޮތެއް ވެސް ނޭނގޭ ކަމަށް ފޯކައިދޫ ކައުންސިލްގެ ރައީސް އަހުމަދު އާސިފް ވިދާޅުވެއްޖެ އެވެ.
ރާއްޖެ އެމްވީ އަށް މައުލޫމާތު ދެއްވަމުން ފޯކައިދޫ ކައުންސިލް ގެ ރައީސް އަހުމަދު އާސިފް ވިދާޅުވީ ރައީސް ޑރ. މުހައްމަދު މުއިއްޒު އެންމެ ފަހުން ފޯކައިދޫ އަށް ކުރެއްވި ދަތުރުފުޅާއި ގުޅިގެން، ވަޑައިގެންނެވުމުގެ 1 ދުވަސް ކުރިން އެރަށުގެ ބޮޑު މިސްކިތް ތަޅާލި ކަމަށެވެ. އަދި ރައީސް ގެ ދަތުރުފުޅުގައި އެރަށުގައި އިސްލާމިކް ސެންޓަރެއްގެ ބިންގާ އެޅުމަށް ހަމަޖެހިފައިވާތީ މިސްކިތް ތަޅާލި ކަމަށެވެ.
އާސިފް ވިދާޅުވީ ކުރިން ހުރި މިސްކިތް ތަޅާލީ ސަރުކާރުން އެރަށުގައި އިސްލާމިކް ސެންޓަރެއް ގާއިމް ކުރުމަށް ކަމަށާއި، ތަޅާލި މިސްކިތަކީ ބާވެގެން ތަޅާލި ތަނެއް ނޫން ކަމަށެވެ.
ވަރަށް އާކޮށް ހުރި މިސްކިތެއް. ދެން މި ރަށު ގެ ރައްޔިތުން ވެސް ބޭނުންވީ ބޮޑު މިސްކިތެއް އަޅާ ކަމުގައިވާނަމަ މިތަނުގައި އަޅަން. ކައުންސިލުން އަޅުގަނޑުމެން ވަރަށް ބޮޑަށް އެދުނިން މިތަނުގައި އެންމެ ކުޑަމިނުން މިސްކިތުގައި ހުރި ބޭނުންކުރެވޭނެ ސާމާނު ނެގޭނެ ވަރުގެ މުއްދަތެއް ދޭން. ނަމަވެސް ވަރަށް އަވަސް އަރުވާލައިގެން މިސްކިތް ތަޅާލީ. މިތަނުގެ މަތިވަޑާންގަނޑު ވެސް ނަގާލާނެ ފުރުސަތު ނުލިބުނު. ވަރަށް އަވަސް އަވަސް ކޮށްލާފައި ދެ ދުވަސް ތިން ދުވަސް ތެރޭގައި މިސްކިތް ތަޅާލާ ބިން ސާފުކޮށްފައި އޮތީ.ފޯކައިދޫ ކައުންސިލް ގެ ރައީސް އަހުމަދު އާސިފް
ކައުންސިލް ރައީސް ވިދާޅުވީ މިސްކިތް ތަޅާލިތާ ޑިސެމްބަރު މަހުގެ 14 ވަނަ ދުވަހަށް ދެ މަސް ދުވަސް ވެއްޖެ ކަމަށެވެ. އަދި އޭގެ ފަހުން ހުކުރު ކުރަމުން ދަނީ ސްކޫލު ހޯލުގައި ކަމަށް ވެސް އޭނާ ވިދާޅުވި އެވެ.
އާސިފް ވިދާޅުވީ ނަސީބު ކަންދިމާކުރިގޮތުން ރަށުގައި އަމިއްލަ ހެޔޮ އެދޭ ފަރާތަކުން އެހެން މިސްކިތެއް ހުޅުވުމާއެކު މިހާރު ސްކޫލު ހޯލުގައި ހުކުރު ނަމާދު ކުރާކަށް ނުޖެހޭ ކަމަށް އޭނާ ވިދާޅުވި އެވެ.
ނަމަވެސް ދެ މަސް ދުވަސް ވަންދެން ސްކޫލު ހޯލުގައި ތަރުފާލު އަޅައިގެން އެތަނުގައި ހުކުރު ކުރަމުން ދިޔައީ. އަޅުގަނޑުމެން ތަކުރާރުކޮށް އެދުނިން ކުރިން ފެށިގެން ޝެޑިއުލްކޮށްފައި އިނީ ޑިސެމްބަރު 12 ގައި މިސްކިތް ހުޅުވާ ގޮތަށް. އެހެންވީމާ އެހާ ހިސާބަށް މިސްކިތް ތަޅާނުލާ މަޑުކުރަން އަޅުގަނޑުމެން އެދުނިން. ނަމަވެސް މިނިސްޓްރީ އިން ވަޑައިގެންނެވި ބޭފުޅުން ވިދާޅުވީ ކޮންޓިނިއުކޮށް މަސައްކަތް ކުރިއަށް ގެންދާ ގޮތަށް ތަޅާލީ.ފޯކައިދޫ ކައުންސިލް ގެ ރައީސް އަހުމަދު އާސިފް
ކައުންސިލް ރައީސް ވިދާޅުވީ އިސްލާމީ މަރުކަޒުގެ މަސައްކަތް ހަވާލުކުރިތާ 9 މަސް ދުވަސް ވެއްޖެ ކަމަށެވެ. ފުރަތަމަ ހަވާލުކުރީ ފެނަކަ ކޯޕަރޭޝަން އާ މާޗް މަހުގެ 15 ވަނަ ދުވަހު ކަމަށެވެ. އަދި އެއިރު މަސައްކަތް ހަވާލުކުރީ 365 ދުވަހުގެ ތެރޭގައި މަސައްކަތް ނިންމާ ގޮތަށް ކަމަށާއި، އެހެންނަމަވެސް 9 މަސް ދުވަސް ފާއިތުވެގެން ދިޔަ އިރު ބާކީ މިހާރު އޮތީ މަސައްކަތް ނިންމަން 3 މަސް ދުވަސް ކަމަށް އޭނާ ވިދާޅުވި އެވެ.
އާސިފް ވިދާޅުވީ އެއްވެސް މަސައްކަތެއް މިހާތަނަށް ކޮށްފައި ނުވާ އިރު، ފެނަކަ އާ ހަވާލުކުރި މަސައްކަތް ފަހުން އޮކްޓޯބަރު 10 ވަނަ ދުވަހު އެމްޓީސީސީ އާއި ހަވާލުކުރީ ރައީސްގެ ދަތުރުފުޅާ ދިމާކޮށް ކަމަށެވެ.
