ޕޮލިސް ކޮމިޝަނަރު އިސްމާއިލް ނަވީން ހިމެނޭ ގޮތަށް، ފުލުހުންގެ އިސް އޮފިސަރުންތަކެއް ސަސްޕެންޑުކުރަން ލަފާދޭން ރައްޔިތުންގެ މަޖިލީހުގެ މާލިއްޔަތު ކޮމިޓީން ބުދަ ދުވަހު ފާސްކޮށްފި އެވެ.

މާލިއްޔަތު ކޮމިޓީގެ ބުދަ ދުވަހުގެ ބައްދަލުވުން ކުރިއަށް ގެންގޮސްފައިވަނީ ސިއްރުކޮށްގެންނެވެ. މި ބައްދަލުވުން ބޭއްވީ، ފުލުހުންގެ ހައުސިންގ ޕްރޮޖެކްޓް ކަމަށްވާ ބްލޫސް ހައުސިންގ ޕްރޮޖެކްޓްގެ ޚާއްޞަ އޮޑިޓް ރިޕޯޓު މާލިއްޔަތު ކޮމިޓީގެ ސަބް-ކޮމިޓީން ދިރާސާކޮށް ނިންމިގޮތުގެ ރިޕޯޓާ ގުޅޭ ގޮތުން މަޝްވަރާކުރުމަށެވެ.

މި ބައްދަލުވުން ސިއްރުކުރީ، ގައުމީ ރައްކާތެރިކަމާ ގުޅިފައިވާ މައްސަލަތަކެއް ހިމެނޭ ކަމަށް ބުނެއެވެ. އެގޮތުން ބައްދަލުވުން ސިއްރުކުރަން ހުށަހެޅުއްވީ ފުނަދޫ ދާއިރާގެ ޕީއެންސީ މެންބަރު މުޙައްމަދު މަމްދޫޙެވެ. އެ ހުށަހެޅުމަށް ގުރައިދޫ ދާއިރާގެ ޕީއެންސީ މެންބަރު ހަނާން މުޙައްމަދު ރަޝީދު ތާއީދުކުރެއްވިއެވެ. އެއަށްފަހު، ކޮމިޓީ ސިއްރުކުރަން، ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާގުން ފާސްކުރި އެވެ.

މައުލޫމާތު ލިބިފައިވާ ގޮތުގައި، މި ބައްދަލުވުމުގައި ވަނީ، ޕޮލިސް ކޮމިޝަނަރު ނަވީން ހިމެނޭ ގޮތަށް އިސް އޮފިސަރުންތަކެއް ސަސްޕެންޑުކުރަން މަޖިލީހަށް ލަފާދޭން ފާސްކޮށްފަ އެވެ. އެނގިފައިވާ ގޮތުގައި، އެ އޮފިސަރުން ސަސްޕެންޑުކުރަން ލަފާދެނީ، ފުލުހުންގެ ޕްރޮފެޝަނަލް ސްޓެންޑަރޑް އާއި ޚިލާފަށް އެ ބޭފުޅުން އަމަލުކުރެއްވި ކަމަށް ތުހުމަތު ކޮށެވެ.

ސަސްޕެންޑުކުރަން ލަފާދޭން ފާސްކުރި ހަތް އޮފިސަރުންނަކީ ޕޮލިސް ކޮމިޝަނަރު އިސްމާއީލް ނަވީން، އެސިސްޓެންޓް ކޮމިޝަނަރު މޫސާ އަލީ، އެސިސްޓެންޓް ކޮމިޝަނަރު އަހުމަދު އަބްދުއްރަހްމާން، އެސިސްޓެންޓް ކޮމިޝަނަރު މުހައްމަދު ރަޝީދު، އެސިސްޓެންޓް ކޮމިޝަނަރު މުހައްމަދު ބަޝީރު، އެސިސްޓެންޓް ކޮމިޝަނަރު މުހައްމަދު ދާއޫދު އަދި ސުޕްރިޓެންޑެންޓް އިސްމާއީލް ޝަމީމް އާދަމް އެވެ.

މި އޮފިސަރުންގެ ތެރެއިން އެސިސްޓެންޓް ކޮމިޝަނަރު ދާއޫދުގެ މައްޗަށް މީގެ ކުރިން ކޮމިޓީގައި ތުހުމަތުކޮށްފައިވެ އެވެ. އެ ތުހުމަތު ކުރެއްވީ، ފުލުހުންގެ ބޯހިޔާވަހިކަމުގެ މަޝްރޫއުގެ އޮޑިޓް ރިޕޯޓުތައް ދިރާސާކުރަން އުފެއްދި ޚާއްސަ ސަބް ކޮމިޓީގައި، މަޖިލީހުގެ ނައިބު ރައީސް އަހުމަދު ނާޒިމެވެ.

މިދިޔަ މަހުގެ 14ގައި އޮތް ކޮމިޓީ ބައްދަލުވުމުގައި ނާޒިމް ވިދާޅުވީ 2023 ވަނަ އަހަރާއި 2024 ވަނަ އަހަރާ ދެމެދު އޭސީޕީ ދާއޫދުގެ އެކައުންޓަށް ގޮތް ނޭނގޭ ގިނަ އަދަދެއްގެ ފައިސާ ވަދެފައިވާ ކަމަށާއި އެ ފައިސާއިން 14.6 މިލިއަން ރުފިޔާގެ އެސެޓް އުފައްދާފައިވާ ކަމަށެވެ.

ނަމަވެސް ދާއޫދު ވަނީ އެ ތުހުމަތުތައް ދޮގުކުރައްވައިފައެވެ. އަދި އޭނާ ފްރޭމް ކުރަން އުޅޭ ކަމަށް ތުހުމަތު ކުރައްވައި، އެ މައްސަލަ ބަލައިދިނުމަށް އެދި ޕްރޮފެޝަނަލް ސްޓޭންޑަރޑް ކޮމާންޑަށް އަމިއްލައަށް ވަނީ ހުށަހަޅުއްވައިފަ އެވެ.

މައްސަލަ ފެންމަތިވިއިރު ދާއޫދު ހުންނެވީ ހުޅުމާލޭ ޕޮލިސްގައި އިސްކޮށް ނަމަވެސް، މި މަހުގެ އެއް ވަނަ ދުވަހު އޭނާ ވަނީ އެ މަގާމުން ދުރުކޮށްފައެވެ.