ފުލުހުންގެ ޔުނީފޯމަކީ ރައްޔިތުންގެ ސަލާމަތާއި ރައްކާތެރި ކަމާއި އަދުލުވެރި ކަމުގެ ރަމްޒެއް: ސީޕީ

ފުލުހުންގެ ޔުނީފޯމަކީ ރައްޔިތުންގެ ސަލާމަތާއި ރައްކާތެރިކަމާއި އަދުލުވެރިކަމުގެ ރަމްޒެއް ކަމަށް ކޮމިޝަނަރ އޮފް ޕޮލިސް އިސްމާޢީލް ނަވީން ވިދާޅުވެއްޖެ އެވެ.

ފުލުހުންގެ 41 ވަނަ އަސާސީ ތަމްރީނު ކޯސް ނިންމުމުގެ ރަސްމިއްޔާތުގައި ވާހަކަ ދައްކަވަމުން ސީޕީ ވަނީ ފުލުހުންގެ ޔުނީފޯމަކީ ރައްޔިތުންގެ ސަލާމަތާއި ރައްކާތެރި ކަމާއި އަދުލުވެރި ކަމުގެ ރަމްޒެއް ކަމަށާއި މި ފަހުރުވެރި ޔުނީފޯމަށް ގަދަރު ކުޑަވާނެ ފަދަ އެއްވެސް ކަމެއް ނުކުރުމަށް އިލްތިމާސްކުރައްވާފަ އެވެ.

މި ރަސްމިއްޔާތުގައި ކޮމިޝަނަރ އޮފް ޕޮލިސް ދެއްކެވި ވާހަކައިގައި ވަނީ ފުލުހުންގެ ނޫކުލައިގެ ޔުނީފޯމުން ކޮންމެދުވަހަކުވެސް ފުލުހުން އަދާކުރަންޖެހޭ ވަޒީފާ ހަނދާން ކޮށްދޭނެ ކަމަށާއި ފުލުހުންގެ ހުވަޔާއި އަޒުމުން ފުލުހުންނާ ހަވާލުކުރެވިފައިވާ މަތިވެރި ޒިންމާ ހަނދާންކޮށްދޭނެ ކަމަށް ވިދާޅުވެފަ އެވެ.

އަދި ފުރިހަމަކުރި ތަމްރީނުން ބިނާކުރި ޝަހުސިއްޔަތުން އަދުލުވެރި ކަމާއި އިންސާފުވެރި ކަމާއެކު ރައްޔިތުންނަށް ހިދުމަތް ފޯރުކޮށްދިނުމަށް އެދިވަޑައިގެން ސީޕީ ވަނީ ފުލުހުންގެ ޔުނީފޯމަކީ ރައްޔިތުންގެ ސަލާމަތާއި ރައްކާތެރި ކަމާއި އަދުލުވެރިކަމުގެ ރަމްޒެއް ކަމަށާއި ފުލުހުންގެ ޔުނީފޯމަކީ ދިވެހި ފުލުހުންގެ އަމާނާތެއްކަން ފާހަގަކުރައްވާފަ އެވެ.

ފުލުހުންގެ ވާޖިބު އަދާކުރުމުގައި ވިސްނުމާއި އަޒުމް އިމްތިހާނުކުރެވޭ ހާލަތްތަކާއެކު ފުލުހުންގެ މަސައްކަތަކަކީ ގޮންޖެހުންތައް ގިނަ، ޕްރެޝަރުގައި މަސައްކަތްކުރަންޖެހޭ ވަގުތުތައް ގިނަ އަދި އުނދަގޫ ނިންމުންތައް ނިންމަންޖެހޭ ހާލަތްތައް ވެސް އަންނާނެ މަސައްކަތެއް. މިފަދަ ވަގުތުތަކުގައި އެއްވެސް ފުލުހަކު އެކަނިވެރި ނުވާނެ. ކޮންމެ ފުލުހަކީ ވެސް ދިގު ތާރީހެއް އޮތް ފަހުރުވެރި މުއައްސަސާއެއްގެ ބައެއްކަން ހަނދާނުގައި ބަހައްޓަންވާނެ. އަދި މަސައްކަތުގައި އެހީތެރިވާނެ ފުލުހުންނާއި ތަމްރީނު ދެއްވި އިންސްޓްރަކްޓަރުންގެ އިރުޝާދާއި މުޅި ގައުމުގެ އުންމީދުތައް ގުޅިފައިވަނީ ފުލުހުން ކުރާ މަސައްކަތުގެ މައްޗަށް.

ސީޕީ ނަވީން

މީގެއިތުރުން، ފުލުހުން ކުރިއަށް ދިއުމަށްޓަކައި އިހުތިޔާރުކުރި މަގަކީ ފަސޭހަ މަގެއް ނޫންކަމަށާއި، އިހުތިޔާރުކުރި މަގަކީ ބުރަ ބޮޑު އަދި ޒިންމާދާރު، ގުރުބާނީތަކެއް އެކުލެވޭ މަގެއްކަން ފާހަގަކުރައްވައި، ގައުމުގެ ސަލާމަތަށާއި ރައްޔިތުންނަށްޓަކައި އިހުތިޔާރުކުރި މަގަކީ ހަމައެކަނި ވަޒީފާއެއް ކަމުގައި ނުދެކުމަށް ގޮވާލެއްވި އެވެ.

އަދި ގައުމީ ގޮވާލުމަކަށް އިޖާބަދެވުނީކަމަށް ދެކި، ނުކުމެވުނު މަގަގީ ރައްޔިތުންގެ ސަލާމަތާއި ރައްކާތެރިކަމަށްޓަކައި ޝަރަފްވެރި ގައުމީ ހިދުމަތަކަށް ކަން ހަނދާނުގައި ބެހެއްޓުމަށްވެސް ގޮވާލެއްވި އެވެ.

ސީޕީ ވަނީ އުންމީދުތަކާއެކު މުޖުތަމައު ފުލުހުންނަށް ބަލާނެކަން ހަނދާންކޮށްދެއްވައި، މުޖުތަމައުގެ އުންމީދުތައް އިތުބާރަށް ބަދަލުކުރުމަށް ޝަރަފްވެރި ދަތުރެއް ދަސްވެނިވި ފުލުހުން ފަށާއިރު ނަޒާހަތްތެރިކަމާއެކު އަމަލުކުރުމަށާއި ފުލުހުންގެ މަސްއޫލިއްޔަތު އަދާކުރުމުގައި ހިތްވަރާއި ސާބިތުތަކާއެކު މަސައްކަތްކުރުމަށް އެދިވަޑައިގެންފަ އެވެ.