ކުންފުނިތަކުގެ ވެރިންގެ މުސާރަ 90،000އަށް ދައްކުރަން އަންގަައިފި
އިނާޔަތްތަކުގެ ގޮތުގައި 90،000އަށްވުރެ އިތުރަށް ލިބޭ ޑިރެކްޓަރުންގެ މުސާރައާއި އިނާޔަތްތައް 90،000އަށްވުރެ އިތުރު ނުވާނޭހެން މުސާރައާއި އިނާޔަތްތައް ދިނުމަށް ވަނީ އަންގާފަ
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު
ބޭންކުތައް ފިޔަވައި ސަރުކާރު ހިއްސާވާ ކުންފުނިތަކުގެ އެންމެ އިސް ވެރިންގެ މުސާރަ 90،000އަށް ކުޑަކުރަން ޕްރައިވެޓައިޒޭޝަން އެންޑް ކޯޕްރޮޓައިޒޭޝަން ބޯޑު (ޕީސީބީ) އިން ކުންފުނިތަކަށް ބުރާސްފަތި ދުވަހު އަންގައިފިއެވެ.
ޕީސީބީން މިގޮތައް އަންގާފައި ވަނީ ސަރުކާރު ހިއްސާވާ ކުންފުނިތަކުގެ މުސާރައާއި އިނާޔަތްތަކާ ގުޅޭގޮތުން ނެރުނު ސާކިއުލާއެއްގައެވެ.
މި ސާކިއުލަރ ގައި ވާގޮތުން މިއީ ސަރުކާރުގެ އިގުތިސާދީ އަދި އިސްލާހީ އެޖެންޑާގެ ދަށުން ދައުލަތުގެ ޚަރަދުތައް ކުޑަކުރުމުގެ މަގުސަދުގައި މުސާރައާ ގުޅޭ ގޮތުން ކުރިއަށް އޮތް ދެ އަހަަރު ދުވަހަށް އެޅުމަށް ރައީސް ނިންމަވާފައިވާ ފިޔަވަޅުތަކެކެވެ.
އެގޮތުން މުސާރައާއި އިނާޔަތްތަކުގެ ގޮތުގައި 90،000 އަށްވުރެ އިތުރަށް ލިބޭ ޑިރެކްޓަރުންގެ މުސާރައާއި އިނާޔަތްތައް 90،000އަށްވުރެ އިތުރު ނުވާނޭހެން މުސާރައާއި އިނާޔަތްތައް ދިނުމަށް ވަނީ އަންގާފައެވެ. ނަމަވެސް، މި ފިޔަވަޅުތަކުން ރާއްޖެއިން ބޭރުގެ ޑިރެކްޓަރުން އިސްތިސްނާވެއެވެ.
ޓެކްނިކަލް މުވައްޒަފުން ފިޔަވައި އެހެން މުވައްޒަފުންގެ މުސާރަ 90،000 އަށްވުރެ އިތުރުވާނަމަ، އިތުރުވާބައި ޑިޑަކްޝަންގެ ގޮތުގައި އުނިކުރުމަށްފަހު 90،000 ރުފިޔާއަށްވުރެ އިތުރުނުވާނޭހެން މުސާރައާއި އިނާޔަތްތައް ދިނުމަށާއި އެކަމާ ގުޅިގެން ގާނޫނީ ގޮތުން މުވައްޒަފުންނާ އެކު ހަދާފައިވާ އެއްބަސްވުންތަކަށް ގެންނަންޖެހޭ ބަދަލުތައް ގެނައުމަށް ވެސް ވަނީ އަންގާފައެވެ.
އެހެންކަމުން މިހިނގާ ޖަނަވަރީ މަހުން ފެށިގެން ކުރިއަށް އޮތް ދެ އަހަރު ދުވަހުގެ މުއްދަތަށް ބޭންކުތައް ފިޔަވައި ސަރުކާރުގެ މެޖޯރިޓީ ހިއްސާވާ ކުންފުނިތަކުން މިގޮތަށް އަމަލުކުރުމަށް ޕީސީބީއިން ވަނީ އެދިފައެވެ.
ޕީސީބީން މިއަދު މިފަދައިން ކުންފުނިތަކަށް އަންގާފައި ވާއިރު، ރައީސް ވަނީ އެމަނިކުފާނުގެ މުސާރައިގެ 50 ޕަސެންޓު ވެސް ނުނަގާ ގޮތަށް ހަމަޖެއްސުމަށް އަންގަވާފައި ކަމަށް ވެސް ވިދާޅުވެފަ އެވެ. މިކަން ކުރަން ޖެހޭނީ ރައްޔިތުންގެ މަޖިލީހަށް ހުށަހަޅައިގެންނެވެ. މައުލޫމާތް ލިބިފައިވާގޮތުގައި އެފަދަ ހުށައެޅުމެއް އަދި މަޖިލިހަކަށް ހުށައަޅުއްވާފައެއް ނުވެއެވެ.
