ކ.ތުލުސްދޫ ގެސްޓް ހައުސް އަކުން ބަނގުރާ ކަމަށް ބެލެވޭ ތަކެއްޗާއެކު ހައްޔަރު ބައެއްގެ ތެރޭގައި ފުލުހެއް ހިމެނޭތީ، އޭނާ ވަޒީފާއިން ވަކި ކުރުމަށް ލަފާ ދީފި އެވެ.

އާދިއްތަ ދުވަހު ފުލުހުން ބުނީ، ގަވާއިދާ ހިލާފަށް ބަނގުރާ ގެންގުޅެ ބޭނުންކޮށް އެތަކެތީގެ ވިޔަފާރި ކުރާ ކަމަށް ލިބުނު މައުލޫމާތަކާ ގުޅިގެން 17 އޮކްޓޫބަރު 2025 ވަނަ ދުވަހު ހިންގި އޮޕަރޭޝަނެއްގައި ތުލުސްދޫ ގެސްޓްހައުސްއެއް ބަލާ ފާސްކޮށް 7 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައި ވަނީ 23 އަހަރުގެ 3 ފިރިހެނުންނާއި، 27 އަހަރުގެ ފިރިހެނެއް، 23 އަހަރުގެ އަންހެނެއް، 26 އަހަރުގެ އަންހެނެއްގެ އިތުރުން 20 އަހަރުގެ އަންހެނެއް ކަމަށް ފުލުހުން ބުނެ އެވެ.

މި އެންމެންނަކީ ދިވެހިންނެވެ.

އެ މީހުން ފުލުހުންގެ ބެލުމުގެ ދަށަށް ގެނެސްފައިވަނީ ގެސްޓް ހައުސް ބަލައި ފާސް ކުރިއިރު، އެމީހުން ތިބި ތަނުން ބަނގުރާ ކަމަށް ބެލެވޭ އެއްޗެއް އަޅާފައި ހުރި 500 އެމްއެލްގެ 2 ފުޅި އާއި ތައްޓެއް ފެނުނު މައްސަލާގައި ކަމަށެވެ. އަދި އެ މީހުން ކޯޓަށް ހާޒިރު ނުކޮށް ދޫކޮށްލާފައިވާ ކަމަށް ފުލުހުން ބުނެ އެވެ.

މީގެ އިތުރުން ފުލުހުން ބުނީ، އެ މީހުންގެ ކުޑަކަމުދާތަކެތި ތަހުލީލު ކުރިއިރު މަސްތުވާތަކެއްޗަށް ނެގެޓިވް ވެފައިވާ ކަމަށެވެ.

މި މައްސަލަ ފުލުހުން އިތުރަށް ތަހުގީގު ކުރަމުންދާއިރު، މި މައްސަލާގައި ފުލުހުންގެ ބެލުމުގެ ދަށަށް ގެނައި މީހުންގެ ތެރޭގައި ކޮންސްޓަބަލް އައިމިނަތު މާޔާ ހުސެއިން ބަޝީރު ހިމެނޭތީ އޭނާ ސަސްޕެންޑް ކުރި ކަމަށް ފުލުހުން ބުނެ އެވެ.

މި މައްސަލަ ޕްރޮފެޝަނަލް ސްޓެންޑާޑްސް ކޮމާންޑުން ބެލުމަށް ފަހު ޑިސިޕްލިނަރީ ބޯޑަށް ހުށަހެޅި ކަމަށާއި، އެ މައްސަލަ ބޯޑަށް ހުށަހެޅުމުން އޭނާ ވަޒީފާއިން ވަކިކުރުމަށް ލަފާ ދީފައިވާ ކަމަށް ފުލުހުން ބުންޏެވެ.

ފުލުހުންގެ ވަޒީފާ ގައި ހުރި އަންހެން މީހާގެ ވަނަވަރު އާއްމު ކުރި ނަމަވެސް ދެން މި މައްސަލާގައި ހައްޔަރު ކުރި އެއްވެސް މީހެއްގެ ވަނަވަރު އާއްމު ކޮށްފައި ނުވެ އެވެ. އަދި އެމީހުން ހައްޔަރު ކުރުމަށްފަހު ކޯޓަށް ހާޒިރު ނުކޮށް ދޫ ކޮށްލި ސަބަބެއް ވެސް ހާމަ ކޮށްފައި ނުވެ އެވެ.