ކޮލަމާފުއްޓަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި އެރަށުގެ 4 ޒުވާނުން ހައްޔަރުކޮށް ބަންދުގެ މުއްދަތު ޖަހައިފި

ގއ. ކޮލަމާފުއްޓަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި އެރަށުގެ 4 ޒުވާނުން ހައްޔަރުކޮށް ބަންދުގެ މުއްދަތު ޖަހައިފި އެވެ.

ހުކުރު ދުވަހުގެ ރޭ ފުލުހުން ބުނީ، ކޮލަމާފުއްޓަށް މަސްތުވާތަކެތި އެތެރެކުރާ ކަމަށް ލިބުނު މައުލޫމާތަކާ ގުޅިގެން 23 އޮކްޓޫބަރު 2025 ވަނަ ދުވަހު ހިންގި ޚާއްސަ އޮޕަރޭޝަނެއް ގައި ލޯންޗެއް ބަލާ ފާސްކޮށް މަސްތުވާތަކެތި ކަމަށް ބެލެވޭ އެއްޗެހިތަކެއް ފެނުނު މައްސަލައެއް ގައި 4 މީހަކު ހައްޔަރު ކޮށްފައިވާ ކަމަށެވެ.

މި މައްސަލައާ ގުޅިގެން ފުލުހުން ހައްޔަރުކޮށްފައިވަނީ ކައުސަަރު އުމުރުން 26 އަހަރުގެ ހަސަން ރައްޔާން ރާޝިދު، 22 އަހަރުގެ ސޯސަންގެ އިސްމާއިލް ހައިޒަމް ހަބީބް، ޝަބްނަމްގެ 25 އަހަރުގެ އަލީ ޖަނާހް ޖައުފަރު އަދި ލީނާމަންޒިލް 19 އަހަރުގެ އިބްރާހީމް އަޒާން މުހައްމަދެވެ.

މި 4 ޒުވާނުންނަކީ ވެސް ގއ. ކޮލަމާފުއްޓަށް ނިސްބަތްވާ މީހުންނެވެ.

އެ މީހުން އެރަށަށް އައި ލޯންޗު ބަލައި ފާސްކުރިއިރު ގިނަ އަދަދެއްގެ މަސްތުވާތަކެތި ކަމަށް ބެލެވޭ އެއްޗެހި ފެނިފައިވާކަން ފާހަގަކޮށް ފުލުހުން ބުނީ، މަސްތުވާތަކެތި ކަމަށް ބެލެވޭ އެއްޗެއް ހުރި 30 ރަބަރު ޕެކެޓާއި ފިލްމު ހުސްކުރި ދެ ދަޅު ފެނުނު ކަމަށާއި، އެކެއްގެ ހަށިގަނޑު ބަލާ ފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް ހުރި 7 ސެލޯފިން ކޮޅު ފެނިފައިވާ ކަމަށެވެ. އަދި މިތަކެތީގެ ބަރުދަނުގައި 44.83 ގްރާމް ހުރި ކަމަށް ފުލުހުން ބުނެ އެވެ.

މީގެ އިތުރުން ފުލުހުން ބުނީ، މި މައްސަލާ ގައި ހައްޔަރުކޮށްފައިވާ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 22 އަހަރު ހައިޒަމް 12 ދުވަހަށް އަދި އެހެން އެންމެން 7 ދުވަހަށް ބަންދު ކުރުމަށް އަމުރު ކޮށްފައިވާ ކަމަށެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.