އެމެރިކާގެ ރިތާވަ ގަނޑުވަރު، ވައިޓް ހައުސްގެ އީސްޓް ވިންގް ތަޅާލުމަށް ފަހު، އެ ތަނުގައި 250 މިލިއަން އެމެރިކާ ޑޮލަރުގެ ބޯލް ރޫމެއް، ނުވަތަ އިވެންޓް ހޯލެއް ތަރައްޤީ ކުރަން ފަށައިފި އެވެ.

މިއީ އެމެރިކާގެ ރައީސް ޑޮނަލްޑް ޓްރަމްޕްގެ އެންގެވުމަކަށް ތަރައްޤީ ކުރާ އިވެންޓް ހޯލެކެވެ. އެ ހޯލު ތަރައްޤީ ކުރުމަށްޓަަކައި، ވައިޓް ހައުސްގެ އީސްޓް ވިންގް ތަޅާލުމުގެ މަސައްކަތް ފަށާފައި ވަނީ ބުދަ ދުވަހު އެވެ. މިއީ ކުރިން ޓްރަމްޕް ވިދާޅުވެފައިވާ ގޮތަށް، މިހާރު ހުރި އިމާރާތަށް އަސަރު ކުރާނެ މަސައްކަތަކަށް ވެގެން ދާނެ ކަމަށް ބެލެވެ އެވެ.

ވޮޝިންޓަން ޕޯސްޓުގައި ހިއްސާ ކޮށްފައިވާ ފޮޓޯ ތަކާއި، އެ މަންޒަރު ދުށް ފަރާތްތަކުން ހާމަ ކޮށްފައިވާ ގޮތުގައި އިމާރާތް ތަޅާލުމަށްޓަކައި ބެކްހޯ (ހައިމާކު) ބޭނުން ކުރަމުންދާ މަންޒަރު ފެނެ އެވެ. މި މަސައްކަތް ކުރިއަށްދާއިރު، ޓްރެޒަރީ ޑިޕާޓްމަންޓްގެ ސިޑި ތަކުގައި ސީކްރެޓް ސާވިސްގެ މެމްބަރުންނާއި، އެހެނިހެން ފަރާތްތަކުން ތިބިކަން ފާހަގަ ކުރެވިފައިވާ ކަމަށް ވެސް ބުނެފައިވެ އެވެ.

އެ މަޝްރޫއާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، 150 އަހަރަށް ވުރެ ގިނަ ދުވަސް ވެފައިވާއިރު، ކޮންމެ ރައީސަކު ވެސް ވައިޓް ހައުސްގައި ބޯލް ރޯމެއް (އިވެންޓް ހޯލެއް) ހުރުމަށް އެދިވަޑައިގެންފައިވާ ކަމަށެވެ. ޓްރަމްޕް މިހެން ވިދާޅުވެފައި ވީ ނަމަވެސް، އިދިކޮޅު ޑިމޮކްރަޓިކް ޕާޓީގެ ގިނަ މެމްބަރުން ވަނީ އެ މަޝްރޫއު އަށް ފާޑު ކިޔައިފަ އެވެ.

90،000 އަކަ ފޫޓުގެ މި އިމާރާތަކީ މިހާރުގެ މައި އިމާރާތާއު، އީސްޓް އަދި ވެސްޓް ވިންގްގެ ޖުމުލަ ބޮޑު މިނުގެ ދެގުނަށް އަށް ވުރެ ބޮޑު އިމާރާތެކެވެ. ޓްރަމްޕް ވިދާޅުވެފައި ވަނީ، މިހާރު ތަރައްޤީ ކުރަމުން އަންނަ ބޯލް ރޫމުގައި 650 މީހުންނަށް އިށީނދެވޭނެ ޖާގަ ހުންނާނެ ކަމަށެވެ. މިއީ މިހާރުގެ އީސްޓް ވިންގްގެ ޖާގަ އަށް ވުރެ ތިން ގުނަ ބޮޑު ޖާގައެއް ކަމަށް ބުނެފައިވެ އެވެ.

މީގެ އިތުރުން ޓްރަމްޕް ވިދާޅުވެފައި ވަނީ އެ މަޝްރޫއު ފައިނޭންސް ކުރުމަށް، އެޕަލް، އެމެޒޯން، ލޮކްހީޑް މާޓިން އަދި ކޮއިންބޭސް ފަދަ ބޮޑެތި ކުންފުނި ތަކުން 25 މިލިއަން އެމެރިކާ ޑޮލަރާ ހަމައަށް ހަދިޔާ ކޮށްފައިވާ ކަމަށެވެ. މީގެ ކުރިން އެ މަޝްރޫއުގެ އަގު 200 މިިލިއަން އެމެރިކާ ޑޮލަރުގައި ހުންނާނެ ކަމަށް ލަފާ ކުރެވުނު ނަމަވެސް، މިހާރު އެ އަދަދު ވަނީ 250 މިލިއަން އެމެރިކާާ ޑޮލަރަށް އިތުރުވެފަ އެވެ.

ނެޝަނަލް ޕާކް ސާވިސް އިން އީސްޓް ވިންގް ތަޅާލެވޭނެ މިންވަރާ ގުޅޭ ގޮތުން އެއްވެސް މައުލޫމާތެއް ހިއްސާ ކޮށްފައި ނުވެ އެވެ. އެހެން ނަމަވެސް، 2014 ވަނަ އަހަރު އެ އިދާރާ އިން ނެރުނު ލިޔުމެއްގައި ބަޔާން ކޮށްފައި ވަނީ، ދުނިޔޭގެ އެންމެ މަޝްހޫރު ގެތަކުގެ ތެރެއިން އެއް ގޭ ބޭނުން ކުރުމާާއި، ރައްކާތެރި ކުރުމަށް އެހެން އިދާރާތަކާ އެކު މަސައްކަތް ކުރާނެ ކަމަށެވެ.

މި މަޝްރޫއު ކުރިއަށް ގެންދަމުން އަންނައިރު، އިދިކޮޅު ޑިމޮކްރަޓިކް ޕާޓީ އަށް ނިސްބަތްވެ ވަޑައިގަންނަވާ، ކެލިފޯނިއާގެ ގަވަރުނަރު ގެވިން ނިއުސަން ވަނީ އެކަމަށް ވަރަށް ބޮޑަށް ފާޑު ވިދާޅުވެފަ އެވެ. ޚާއްސަކޮށް އޭނާ ވަނީ ޓްރަމްޕް އަށް ފާޑު ވިދާޅުވެ ވާހަކަ ދައްކަވައިފަ އެވެ.

ނިއުސަަމް އޭނާގެ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، ޓްރަމްޕް އެންމެ އިސްކަމެއް ދެއްވާ ކަމަކަށް އޮތީ ވައިޓް ހައުސް ތަޅާލުން ކަމަށެވެ. އަދި އެމެރިކާގެ ސަރުކާރަށް ކުރިމަތިވެފައިވާ ހުއްޓުމަކަށް އެއްވެސް ސަމާލު ކަމެއް ނުދެއްވާ ކަމަށް އޭނާ ވަނީ ވިދާޅުވެފަ އެވެ.

ނިއުސަމް މިހެން ވިދާޅުވެފައިވާއިރު، އެމެރިކާގެ ސަރުކާރު ހުއްޓުމަކަަށް އައިސްފައި އޮންނަތާ އެތައް ދުވަހެއް ވެފައިވާއިރު، އެކަމަށް ޓްރަމްޕް މަސައްކަތް ނުކުރައްވައި، 250 މިލިއަން އެމެރިކާ ޑޮލަރުގެ ބޯލް ރޫމެއް ތަރައްޤީ ކުރުމަކީ ލަދުވެތި ކަމެއް ކަމަށް އެމެރިކާގެ ބައެއް ރައްޔިތުން ވެސް އަންނަނީ ބުނަމުންނެވެ.