މުއިއްޒުގެ މޭޔަރު ކަމުގައި އެއްބަސްވުމެއް ނެތި މަސް މާރުކޭޓުގެ ފިހާރަތަކެއް ދޫކުރި މައްސަލައެއް ފެންމަތިވެއްޖެ
މާލޭ ރޯމަސް މާރުކޭޓުގެ މަތިން ހަދާފައިވާ ހަތަރު ފިހާރައެއް އެއްވެސް އެއްބަސްވުމަކާ ނުލައި ދޫކޮށްލާފައިވާ މައްސަލައެއް ވަނީ ފެންމަތިވެފަ
ޑރ. މުހައްމަދު މުއިއްޒު މާލެ ސިޓީގެ މޭޔަރުކަން ކުރެއްވި ދުވަސްވަރު: އެ ދުވަސްވަރު އެއްބަސްވުމެއްނެތި މަސް މާރުކޭޓު މަތިން ފިހާރަތަކެއް ދޫކޮށްފައި ހުރިކަން ވަނީ ހާމަވެފަ
މިހާރުގެ ރައީސް ޑރ މުހައްމަދު މުއިއްޒު މާލެ ސިޓީ މޭޔަރުކަމުގައި ހުންނެވި ދުވަސްވަރު، މާލޭ ރޯމަސް މާރުކޭޓު މަތިން އެއްވެސް އެއްބަސްވުމަކާއި ނުލައި ތިން ފިހާރަ އަކާއި ލޭބާ ކުއާޓާއެއް ދޫކުރިކަން އެނގިއްޖެ އެވެ.
މިކަން ހާމަވީ، މަސް މާރުކޭޓު އިމާރާތުގެ ފުރަތަމަ ފަންގިފިލާ އަދި ދެވަނަ ފަންގިފިލާގައި ހުންނަ ހުސް ޖާގަތައް ކުއްޔަށް ދީފައި ހުރި ގޮތް ބެލުމަށް ސިޓީ ކައުންސިލްގެ ހާބާ އެންޑް މާކެޓު މެނޭޖްމަންޓު ސެކްޝަނުން ހިންގި އިންސްޕެކްޝަނަކުންނެވެ.
މިކަން ހާމަވެފައިވަނީ ސިޓީ ކައުންސިލްގެ ހާބާ އެންޑް މާކެޓު މެނޭޖްމަންޓު ސެކްޝަނުން ހިންގި އިންސްޕެކްޝަނަކުންނެވެ. މި އިންސްޕެކްޝަނުގައި މާރުކޭޓު އިމާރާތުގެ ފުރަތަމަ ފަންގިފިލާ އަދި ދެވަނަ ފަންގިފިލާގައި ހުންނަ ހުސް ޖާގަތައް ކުއްޔަށް ދޫކޮށްފައިވާ ގޮތާއި، ކުލި ދައްކަމުންދޭތޯ ބަލާފައިވެއެވެ.
އިންސްޕެކްޝަނުން ހާމަވެފައިވާ ގޮތުގައި ފުރަތަމަ ފަންގިފިލާގެ ތިން ފިހާރައަކާއި ދެވަނަ ފަންގިފިލާގެ އެއް ފިހާރަ ހިންގަމުން ގެންދަނީ އެއްވެސް އެއްބަސްވުމަކާ ނުލައެވެ. އަދި މި ތަންތަނުން ކުލި ވެސް ދައްކަމުން ނުދާކަން މާރުކޭޓު ސެކްޝަނުން ކައުންސިލް ބިއުރޯއަށް ފޮނުވި މެމޯއިން ހާމަވެފައި ވެއެވެ.
މި ތަންތަނުގެ ތެރޭގައި ހިމެނެނީ ފުރަތަމަ ފަންގިފިލާގެ ހަތަރު ނަންބަރު ފިހާރަ (އަބްދުލް ލަތީފު ގާސިމް)، ފަސް ނަންބަރު ފިހާރައާއި ދެވަނަ ފަންގިފިލާގެ ލޭބާ ކުއާޓާ (ހަސަން ފަޔާޒް)، އަދި ޓިނު ގުދަން ފިހާރަ (މުހައްމަދު ރަޝާދު އާދަމް) އެވެ.
މީގެ އިތުރުން، މުއިއްޒުގެ މޭޔަރުކަމުގައި މަސް މާރުކޭޓު ތަރައްގީ ކުރުމާ ގުޅޭ އިތުރު މައްސަލައެއް ވެސް ވަނީ ފާޅުވެފައެވެ. މިއީ ދައުލަތުގެ މާލިއްޔަތު ގާނޫނާ ޚިލާފަށް ދެ ފަރާތަކާއެކު ވެފައިވާ އެއްބަސްވުންތަކަކާ ގުޅޭ މައްސަލައެކެވެ.
ސިޓީ ކައުންސިލްގެ ގަލޮޅު އުތުރު ދާއިރާގެ މެންބަރު ސައިފް ފާތިހް ވަނީ މި މައްސަލަ އެންޓި ކޮރަޕްޝަން ކޮމިޝަނަށް ހުށަހަޅުއްވާފައެވެ. އެ މައްސަލައިގައި ފާހަގަކޮށްފައިވާ ގޮތުގައި، 6.1 މިލިއަން ޑޮލަރަށް ހަވާލުކޮށްފައިވާ މަޝްރޫއު، މުއިއްޒުގެ މޭޔަރުކަން ނިމުމާ ގުޅިގެން 9.5 މިލިއަން ޑޮލަރަށް އަގު ބޮޑުކޮށް، އެހެން ފަރާތަކާ ހަވާލުކޮށްފައިވެއެވެ.
ސައިފް ވިދާޅުވީ ކައުންސިލްގެ ފަރާތުން މަސްމާރުކޭޓުގެ އައު އެއްބަސްވުމުގައި ސޮއިކުރީ ލީގަލް ސެކްޝަންގެ ވެރިޔާ އަލީ ނަސީރު ގާސިމް ކަމަށާއި، އެ އެއްބަސްވުމުގައި ސޮއިކުރާން ޖެހުނު ސަބަބާއި، އަގަށް 3.5 މިލިޔަން ޑޮލަރު އިތުރުވީ ގޮތް އޭނާ ސާފުކޮށްދީފައި ނުވާ ކަމަށެވެ.
މި މައްސަލަ ބެލުމަށް ސިޓީ ކައުންސިލުން ތާވަލުކުރި ތިން ބައްދަލުވުން ވެސް ކޯރަމް ހަމަނުވުމުގެ ސަބަބުން ވަނީ ކެންސަލް ކޮށްފަ އެވެ.
މާލެ ސިޓީ ކައުންސިލުގައި މާލޭގެ 18 ދާއިރާގެ ކައުންސިލަރުންނާއި މޭޔަރު ހިމެނޭހެން 19 ބޭފުޅުން ތިއްބަވަ އެވެ. މާލެ ސިޓީ ކައުންސިލުގެ ކޯރަމް އަކީ 10 ބޭފުޅުންނެވެ.
