ޕީއެންސީގެ ގިނަ ކައުންސިލަރުން ހާޒިރުނުވުމުގެ ސަބަބުން މަސްމާރުކޭޓުގެ މައްސަލަ ނުބެލި ދިގުލައިގެންދަނީ
މަސްމާރުކޭޓު ތަރައްގީކުރުމުގެ މަޝްރޫޢުގައި 6.1 މިލިއަން ޑޮލަރުގެ އެއްބަސްވުން ބާތިލުކޮށް 9.5 މިލިއަން ޑޮލަރުގެ އައު އެއްބަސްވުމެއްގައި ސޮއިކޮށްފި
ކޯރަމް ހަމަނުވެގެން ކެންސަލް ކުރި މާލެ ސިޓީ ކައުންސިލްގެ 4 ވަނަ ދައުރުގެ 213 ވަނަ ރަސްމީ އާއްމު ޖަލްސާ
މާލޭ ސިޓީ ކައުންސިލުގެ ސަރުކާރު ހިންގާ ޕީއެންސީއަށް ނިސްބަތްވާ ގިނަ ކައުންސިލަރުން ޖަލްސާއަށް ހާޒިރުނުވުމުގެ ސަބަބުން، ރައީސް ޑރ. މުހައްމަދު މުއިއްޒު މޭޔަރުކަމުގައި ހުންނެވި އިރު ހެއްދެވި މަސްމާރުކޭޓުގެ އެއްބަސްވުމާ ގުޅޭ މުހިންމު މައްސަލައެއް ނުބެލި ބުރާސްފަތި ދުވަހުގެ ކައުންސިލްގެ ބައްދަލުވުން ވެސް ކެންސަލްކޮށްފި އެވެ.
މާލޭ މަސްމާރުކޭޓު ތަރައްގީކުރުމުގެ މަޝްރޫޢުއާ ގުޅިގެން ދައުލަތުގެ މާލިއްޔަތު ގާނޫނާ ހިލާފަށް ދެ އެއްބަސްވުމެއް ހަދާފައިވާ މައްސަލަ ބެލުމަށް، ކައުންސިލުގެ ލީގަލް ސެކްޝަންގެ ވެރިޔާ އަލީ ނަސީރު ގާސިމް ޖަލްސާއަށް ހާޒިރުކުރަން އެދި ހުށަހެޅި ތިން ޖަލްސާވެސް ވަނީ ކޯރަމް ހަމަނުވެގެން ކެންސަލްވެފައެވެ.
ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ބުރާސްފަތި ދުވަހުގެ ޖަލްސާއަށް ހުށަހެޅުއްވި މައްސަލައިގައި، ރޯމަސް މާރުކޭޓު ތަރައްގީ ކުރުމުގެ އެއްބަސްވުމަށް ގެނެވުނު ބަދަލުތަކާ ގުޅޭގޮތުން އަލީ ނަސީރާ ސުވާލުކުރުމަށާއި، މައްސަލަ ބަލައި ނިމެންދެން އޭނާ ސަސްޕެންޑް ކުރުމަށް ވަނީ ހުށަހަޅާފައެވެ.
މި މަޝްރޫޢުއާ ގުޅިގެން ރައީސް މުއިއްޒުގެ މޭޔަރު ކަމުގެ ދައުރުގައި 6.1 މިލިއަން ޑޮލަރުގެ އެއްބަސްވުމެއް ހަދާފައިވާއިރު، އެ އެއްބަސްވުން ބާތިލުކޮށް، 9.5 މިލިއަން ޑޮލަރުގެ އައު އެއްބަސްވުމެއްގައި އަލީ ނަސީރު ވަނީ ސޮއިކޮށްފައެވެ. އެއީ މުއިއްޒު ރައީސްކަމަށް އިންތިހާބުވެ، މޭޔަރު ކަމަށް އާދަމް އާޒިމް އިންތިހާބުވުމުގެ ކުރިން އެ އެއްބަސްވުން ބާތިލުކޮށް އެހެން ބަޔަކާ މަސްމާރުކޭޓު އޮތީ ހަވާލު ކޮށްފަ އެވެ.
މި މައްސަލައިގައި ފާހަގަކުރެވިފައިވާ ގާނޫނީ މައްސަލަތަކާ ގުޅިގެން މަސްމާރުކޭޓުގެ މަސައްކަތް މިހާރު ވަނީ ވަގުތީގޮތުން މަޑުޖައްސާލާފައެވެ. އަދި މި މައްސަލަ އިތުރަށް ބެލުމަށް ކުރިޔަށް އޮތް ދުވަސްތަކުގައި އިތުރު ޖަލްސާތައް ބޭއްވުމަށް ވަނީ ހަމަޖެހިފައެވެ.
މާލެ ސިޓީ ކައުންސިލުގައި މާލޭގެ 18 ދާއިރާގެ ކައުންސިލަރުންނާއި މޭޔަރު ހިމެނޭހެން 19 ބޭފުޅުން ތިއްބަވަ އެވެ. މާލެ ސިޓީ ކައުންސިލުގެ ކޯރަމް އަކީ 10 ކައުންސިލަރުންނެވެ.
މި މައްސަލައާއި ގުޅޭގޮތުން މޭޔަރު އާދަމް އާޒިމް ވިދާޅުވީ، 9.6 މިލިއަން ޑޮލަރަށް މަސް މާރުކޭޓު މަޝްރޫއު ހަވާލުކުރިއިރު އެ ފައިސާއަކީ ސިޓީ ކައުންސިލަށް ދެއްކެން އޮތް ފައިސާއެއް ވެސް ނޫން ކަމަށާއި، އާ އެއްބަސްވުމެއް ހަދަން ނިންމީ ކާކުތޯ ވެސް ސުވާލު އުފެދޭ ކަމަށެވެ.
އާޒިމް ވިދާޅުވީ ފަހުން ހެދި އެއްބަސްވުން ހަދާފައި ވަނީ މި ފައިސާ ނުދެއްކިއްޖެ ނަމަ މުޅި އިމާރާތް އެ އެއްބަސްވުން ހެދި ފަރާތަށް ލިބޭ ގޮތަށް ކަމަށާއި މިއީ ވަރަށް ދެރަކޮށް ވެފައި އޮތް ކަމެއް ކަމަށެވެ.
އާޒިމް ވިދާޅުވީ، ދެ އެއްބަސްވުމުގައި އޮތީ ވެސް އެއް ނަންބަރެއް ކަމަށާއި ދެވަނަ އެއްބަސްވުން ހެދީ ކިހިނެއްކަން ވެސް ލިޔެކިޔުންތަކުން ވެސް ފެންނަން ނެތް ކަމަށެވެ. އަދި މިގޮތަށް ކަންތައް ކޮށްފައި އޮތުމުން މީގެން އޮޅުބޮޅުން އަރާކަމަށާއި މަސް މާރުކޭޓު މަޝްރޫއު ލަސްވަނީ އެހެންވެގެން ކަމަށް އާޒިމް ވިދާޅުވި އެވެ.
އާޒިމް ވިދާޅުވީ މަސް މާރުކޭޓު އަޅާއިރު އެ ތަނުގައި ހުރި ގޮޅިތައް ވަގުތީ ގޮތުން ބަދަލުކުރަން ބޭނުންވާ ގޮޅިތައް ހަދަން ވެސް އެއްބަސްވުމުގެ ތެރޭގައި ހިމަނާފައިނުވާ ކަމަށާއި އެ ކަމަށް 200 އެއްހާ ގޮޅި ހަދަން ޖެހޭއިރު އެކަން ކުރަން ވެސް އޮތީ ވަކިން 2.1 މިލިއަން ރުފިޔާއަށް ހަވާލުކޮށްފައި ކަމަށެވެ.
މި މައްސަލައާއި ގުޅިގެން ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވަނީ މާލޭ ސިޓީ ކައުންސިލުން ހަދާފައިވާ ހުރިހާ އެއްބަސްވުމެއް ހާމަކުރަން ގޮވާލައްވާފައެވެ.
މިހާރުގެ ރައީސް ޑރ. މުހައްމަދު މުއިއްޒުގެ މޭޔަރުކަމުގައި، ބިޑް ކޮމިޓީން 130،000 ރުފިޔާއަށް މަސް މާރުކޭޓު ކުއްޔަށް ދޭން ނިންމާފައި ވަނިކޮށް، އޭރު ކައުންސިލުން އެތަން 70،000 ރުފިޔާއަށް ކުއްޔަން ދިން މައްސަލައެއް ވަނީ ދާދި ފަހުން ފެންމަތިވެފަ އެވެ. އެހެން ނަމަވެސް މި ސަރުކާރުން ވަނީ އެކަން ދޮގުކޮށްފަ އެވެ.
