ސޯޝަލް މީޑިއާ ގައި ޖެހި ޕޯސްޓަކާ ގުޅިގެން އެމްޑީޕީ ގެ ޒާޔާ ފުލުހަށް ހާޒިރު ކޮށްފި
އެމްޑީޕީގެ ގައުމީ މަޖިލީހުގެ މެމްބަރު ފާތުމަތު ޒާޔާ އަންގާރަ ދުވަހުގެ ރޭ ފުލުހަށް ހާޒިރު ކުރި
ފާތިމަތު ޒާޔާ (ވ) ޕާޓީގެ ހަރަކާތެއްގައި
އެމްޑީޕީގެ ގައުމީ މަޖިލީހުގެ މެމްބަރު ފާތިމަތު ޒާޔާ އަންގާރަ ދުވަހުގެ ރޭ ފުލުހަށް ހާޒިރު ކޮށްފިއެވެ.
ކޯޓު އަމުރެއްގެ ދަށުން ޒާޔާގެ ފޯނު އަންގާރަ ދުވަހުގެ ހަވީރު ފުލުހުން އަތުލާފައި ވާއިރު އިރު އޮއްސުނު ފަހުން ގަލޮޅު ފުލުހަށް ހާޒިރު ކޮށް އިތުރު ކޯޓު އަމުރެއްގެ ދަށުން ފޯނުގެ ޕާސްވޯޑް ވަނީ އަތުލާފައެވެ.
ޒާޔާ ބުނި ގޮތުގައި އޭނާގެ ފޯނު ފުލުހުން އަތުލީ އަންގާރަ ދުވަހުގެ ހަވީރު ދަރިފުޅު ޑޮކްޓަރަށް ދައްކަން މާލޭގައި ހުންނަ ކްލިނިކަކަށް ދަނިކޮށް އެތާ ކައިރިން ކަމުގައެވެ.
ފަނަރަ ވަރަކަށް ފުލުހުންގެ ފައުޖަކުން އައިސް ޒާޔާ ގާތު ވަރަށް ހަރުކަށި ކޮށް ސައިކަލުން ފައިބަން އެންގި ކަމާށާއި އަދި ބަލާ ފާސް ކުރަން ބޭނުންވާ ކަމަށް ބުނި ކަމަށެވެ.
ޒާޔާ ހުއްޓުވި ސަރަހައްދަކީ އަހުމަދިއްޔާ ސްކޫލް އާއި ދޮންދީނި ޕްރީ ސްކޫލް ސަރަހައްދު ކަމަށް ވުމާއެކު އެ ވަގުތު ގިނަ އަދަދެއްގެ ސްކޫލު ކުދިންނާއި ބެލެނިވެރިން ވެސް އެތަނުގައި އެވަގުތު ތިބި ކަމަށް ޒާޔާ ބުންޏެވެ.
އަންގި ލައްވައިގެން ތިބި ފުލުހުން ޒާޔާ މަޑު ކުރުމަށްފަހު ހަށިގަނޑާއި، ދަބަހާއި، ސައިކަލު ގެ މަޑިދަށަށް ދަންދެން ބަލާ ފާސް ކުރި ކަމަށް ޒާޔާ ބުންޏެވެ.
ޒާޔާ ފާހަގަ ކުރި ގޮތުގައި ފުލުހުން ކަންތައް ކުރި ގޮތުން ކައިރީގައި ހުރި ދަރިފުޅަށް ނަފްސާނީ ގޮތުން އަސަރު ކުރާނެ ކަމަށް ގަބޫލު ކުރާ ކަމަށެވެ.
މީގެ ކުރިން ދަންވަރުގެ ގަޑިއެއްގައި ފުލުހުން އައިސް ޒާޔާ އުޅޭ އެޕާޓްމަންޓު ބަލާ ފާސްކުރުމުގެ ތެރޭގައި ވެސް ދަރިފުޅަށް ނަފްސާނީ އަސަރު ކޮށްފައިވާ ކަން ޒާޔާ ފާހަގަ ކުރިއެވެ.
"މިފަހަރު މިކަން މި ދިމާވީ، ބޮޑު ދަރިފުޅަށް، ކުރިން ފަހަރު ކުޑަ ދަރިފުޅަށް، އެކުންދިނަށް ވަރަށް އަސަރުކުރޭ މިގޮތައް ކަންކަން ކުރީމަ،" ޒާޔާ ބުންޏެވެ.
އެމްޑީޕީގެ ހުޅުމާލެ އުތުރު ދާއިރާގެ ރައީސް ޒާޔާގެ ފޯނު އަތުލީ ކުރިމިނަލް ކޯޓުން ކުރި އަމުރެއްގެ ދަށުން ސޯޝަލް މީޑިއާ ގައި ފުލުހުންނަށް ނިސްބަތްވާ ގޮތައް އެއްޗެއް ލިޔެގެން ކަމަށް ބުނެއެވެ.
ޒާޔާގެ ފޭސްބުކް ޕޯސްޓެއްގައި އެންމެ ފަހުން ލިޔެފައިވަނީ "17 ނޮވެމްބަރަށް ތައްޔާރު ވުމަށް ކަނޑޫދޫ މިރުހުން ސްޕްރޭ ތައްޔާރު ކުރަން ފަށައިފިން، ހަމަ ޖެހީ، ޖެހީ،" ކަމަށެވެ.
މިދިޔަ ހުކުރު ދުވަހުގެ ރޭ އެމްޑީޕީ އިން ބޭއްވި ބޮޑު މުޒާހަރާގައި ޒާޔާގެ މޫނަށް ފުލުހުން ތިން ފަހަރެއްގެ މަތިން ޕެޕަރ ސްޕްރޭ ޖެހިކަން ފާހަގަ ކުރެވެއެވެ.
ޒާޔާ ބުނި ގޮތުގައި އަދިވެސް ލޮލުގެ ހާލަތު މުޅިން ރަނގަޅެއް ނުވެއެވެ.
ފުލުހުން ޒާޔާ އަށް ހަވާލު ކުރި މީހުން ބަލައި ފާސްކުރި ކަމުގެ ލިޔުމުގައި ބުނެފައިވަނީ، ބަލައި ފާސްކުރަނީ، 2025 އޮކްޓޯބަރު 4 ވަނަ ދުވަހުގެ ރޭ ފޭސްބުކް ގައި ޒާޔާގެ ނަމުގައި ހިންގަމުންދާ އެކައުންޓަކުން ދިވެހި ފުލުހުންނަށް އިންޒާރުދީފައިވާ މައްސަލަ އާ ގުޅިގެން ކުރިމިނަލް ކޯޓުގެ އަމުރުގެ ދަށުން ބަލާ ފާސް ކޮށް މައްސަލަ އާއި ގުޅޭ ހެއްކާ ގަރީނާ ހޯދުމަށް ކަމުގައެވެ.
