ރައީސް މުއިއްޒުގެ ޚާރިޖީ ވަޒީރު ސަރުކާރާ ދެކޮޅު ހަޑި ހުތުރު ބަސްތަކެއް އެކްސް ގައި ޕްރޮމޯޓް ކޮށްފި
ޚާރިޖީ ވަޒީރު ޑރ އަބްދުﷲ ހަލީލް ސަރުކާރާ ދެކޮޅު ހަޑި ހުތުރު ބަސްތަކެއް ރީޓްވީޓް ކުރުމުން އާންމުންގެ ފާޑުކިޔުން އިންތިހާ އަށް އަމާޒުވި
ފޮރިން މިނިސްޓަރ ހަލީލު ކުރެއްވި ރީޓްވީޓްގެ ބައެއް ފެންނަ ސްކްރީންޝޮޓެއް
ރައީސް ޑރ.މުހައްމަދު މުއިއްޒުގެ ޚާރިޖީ ވަޒީރު ޑރ. އަބްދުﷲ ހަލީލް ސަރުކާރާ ދެކޮޅު ހަޑި ހުތުރު ބަސްތަކެއް ރީޓްވީޓް ކުރައްވައިފިއެވެ.
ހަލީލް އެފަދަ ރީޓްވީޓެއް ކުރެއްވުމާއި އެކު އާއްމުން ވަނީ އެ ރީޓްވީޓުގެ ސްކްރީން ޝޮޓެއް ނެގުމަށް ފަހު އެ ސްކްރީން ޝޮޓް މީސްމީޑިއާގައި ދައުރުކޮށްފައެވެ. އަދި ބައެއް އާއްމުން ވަނީ ވަޒީރަކަށް ހުންނަ ބޭފުޅެއްގެ ފަރާތުން މިފަދަ ކަންކަން ފެނުމަކީ އެ ބޭފުޅެއްގެ ޒިންމާދާރުކަން ކުޑަކަން ދައްކުގައިދޭ ކަމެއް ކަމަށް ބުނެ އެކަމަށް ފާޑުކިޔާފައެވެ. ހަމަ އެހެންމެ މިއީ ރަނގަޅަށް ކަންކަން ބަލާލުމެއް ނެތި، ރީޓްވީޓްތަކާއި ޓްވީޓްތައް ކުރައްވާތީ ވާ ކަމެއް ކަމަށް ވެސް އާއްމުން ވަނީ މީސްމީޑިއާގައި އެކަމާއި މެދު ޝުއޫރު ފާޅުކުރަމުން ބުނެފައެވެ. އަދި މިއީ އަހުލާގީ މިންވަރު ދަށް ޕޯސްޓެއް ކަމަށް ބުނި އާއްމުން ވެސް ތިއްބެވެ.
މިފަދަ ޓްވީޓަކާއި އެކު މިނިސްޓަރ ހަލީލް ހޫނުފެންނަށް ވެއްޓިވަޑައިގެންނެވި އިރު ހަލީލް ވަނީ އެ ރީޓްވީޓް މީސްމީޑިއާ އިން ޑިލީޓް ކުރައްވާފައެވެ. މިއީ މިފަދަ ކަމެއް ޑރ.ޚަލީލުގެ ފަރާތުން ފެނުނު ފުރަތަމަ ފަހަރު ނޫންކަން ފާހަގަ ކޮށްލެވެއެވެ.
އިދިކޮޅު އެމްޑީޕީގެ ފުރިހަމަ ނަމަކީ "މޯލްޑިވްސް ދޮގު ޕާޓީ" ކަމަށް ބުނެ އެމްޑީޕީގެ ލޯގޯ ބަދަލުކޮށްގެން އެޑިޓްކޮށްފައިވާ ޕޯސްޓެއް ހިއްސާކުރުމާއި ގުޅިގެން ވެސް މިފަދަ ގޮތަކަށް އާއްމުންގެ ފާޑުކިޔުމާއި ހަލީލަށް ކުރިމަތިލައްވަން ޖެހިވަޑައިގަތެވެ. އޭރު ހެލްތު މިނިސްޓަރަކަށް ހުންނެވި އިރު ހަލީލް އެކްސްގައި ހިއްސާ ކުރެއްވުމާ ގުޅިގެން އާންމުންގެ ފާޑުކިޔުން ވަނީ ވަރަށް ބޮޑަށް އަމާޒުވެފައެވެ. އެ ޕޯސްޓް މިހާރު ވެސް މީސްމީޑިއާގައި ފެންނަން އެބަ ހުއްޓެވެ.
އޭރު ކުރެއްވި ޕޯސްޓްގެ ހޭޝްޓެގުގެ ގޮތުގައި ވެސް މޯލްޑިވްސް ދޮގު ޕާޓީ އަދި އެމްޑީޕީ ނޫން ގޮތެއް ޖަހާފައިވުމުން އެކަމަށް އާއްމުން ވަރަށް ބޮޑަށް ފާޑު ކިޔާފައިވެއެވެ. ސަރުކާރުގެ ކެބިނެޓު މިނިސްޓަރަކު މި ފެންވަރަށް ވެއްޓުމުން ލަދު ގަންނަ ކަމަށް ބުނެ އާއްމުން ވަނީ މީސްމީޑީއާ ގައި ހަލީލާއި މެދު ވަރަށް ބޮޑަށް ނުރުހުން ފާޅުކޮށްފައެވެ.
އާއްމުން ވަނީ އޭރު ވެސް ޑރ.ހަލީލަކީ ސަރުކާރުގެ ޑިފެންސަށް ވަރަށް ބޮޑަށް މަސައްކަތް ކުރައްވާ ބޭފުޅެއް ކަމަށާއި މިފަދަ ރީޓްވީޓްތައް ކުރެވެނީ ވެސް އެފަދަ ކަންކަން އަވަސް އަރުވާލުމުގެ ތެރޭގައި ކަމަށް ބުނެފައެވެ. ހަމައެހެންމެ ސަރުކާރުގެ އިސް މަގާމުތަކުގައި ތިބޭ ވެރިންގެ އަޚުލާގީ ފެންވަރާއި މެދު ސުވާލު އުފައްދާ މިފަދަ ޕޯސްޓްތަކާއި މެދުގައި އާއްމުން ވާހަކަދެއްކި ކަން ފާހަގަކުރެވެއެވެ.
ގައުމުތަކުގެ ޚާރިޖީ ވަޒީރުންނަކީ އެންމެ އިސް ޑިޕްލޮމެޓިކް ގޮތުގައި ބެލޭ ފަރާތް ކަމަށް އާންމު ގޮތެއްގައި ދެކޭ އިރު، ހަލީލު ބޭރު ގައުމުތަކުގައި އިނގިރޭސި ބަހުން ދައްކަވާ ވާހަކަފުޅުތަކާއި އަދި އެންމެ ފަހުން އދ ގައި އިނގިރޭސި ބަހުން ދެއްކެވި ވާހަކަފުޅަށް ހަވާލާދީ ރާއްޖޭގެ ޚާރިޖީ ވަޒީރު ކަމުގައި ހުންނެވި ފަރާތަކީ އެފަދަ ކޮލިޓީ އެއް ނެތް ބޭފުޅެއް ކަމަށް ވެސް ބައެއް ފަރާތްތަކުން ބުނެ ފާޑު ކިޔައެވެ.
