މިއަދު ރައްޔިތުން ނުނިކުމެއްޖެނަމަ ރައީސް މުއިއްޒު ކުރިއަށް އޮތް 30 އަހަރަށް ހުދުމުހުތާރު ވެރިކަމެއް ގާއިމްކުރާނެ: ފައްޔާޒު
އިދިކޮޅުގެ މަސައްކަތްތައް ހުއްޓުވާލާ ދުވަހަކީ ވަޒީފާތަކުން ވެސް މީހުން ވަކިކުރާނެ ދުވަސް
ރައީސް ޑރ.މުހައްމަދު މުއިއްޒު އާއި ނޫސްވެރިން ސުވާލުކުރަނީ - 28.08.2025
މިއަދު ރައްޔިތުން ނުނިކުމެއްޖެނަމަ ރައީސް ޑރ.މުހައްމަދު މުއިއްޒު ކުރިއަށް އޮތް 30 އަހަރަށް ހުދުމުހުތާރު ވެރިކަމެއް މިގައުމުގައި ގާއިމްކުރާނެ ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.
ހުކުރު ދުވަހުގެ ފަށާއިރު ޕްރޮގްރާމްގައި ފައްޔާޒު ވިދާޅުވީ ލޫޓުވައިފި މުޒާހަރާ ހުއްޓުވުމަށް ސަރުކާރު ވަރަށް މަސައްކަތް ކުރާ ކަމަށާއި، އެކި ގޮތްގޮތުން ބިރު ދައްކަމުންދާ ކަމަށެވެ.
ހުދުމުހުތާރު ވެރިކަމާ ދެކޮޅަށް ރައްޔިތުން ނުކުންނަންޖެހޭކަން ފާހަގަކުރައްވައި ފައްޔާޒު ވިދާޅުވީ މިއަދު ރައްޔިތުން ނުނިކުމެއްޖެނަމަ 30 އަހަރަށް ނުވަތަ 40 އަހަރަށް ރައީސް މުއިއްޒު މިގައުމުގައި ހުދުމުހުތާރު ވެރިކަމެއް ގާއިމްކުރާނެ ކަމަށެވެ.
ފައްޔާޒު ވިދާޅުވީ ލޫޓުވައިފި މުޒާހަރާއަކީ ފެށުމެއް ކަމަށާއި، ކުރިއަށް އޮތްތަނުގައި ވެސް އެމްޑީޕީން ސަރުކާރު ޖަވާބުދާރީ ކުރުވުމަށް ބާއްވާ ހަރަކާތްތަކުގައި ރައްޔިތުން ބައިވެރިވާންޖެހޭ ކަމަށެވެ. ވަޒީފާގެ ބިރުވެރިކަން އޮތް ނަމަވެސް މިއީ ކުރަންޖެހޭ މަސައްކަތެއް ކަމަށާއި، އިދިކޮޅުގެ މަސައްކަތްތައް ހުއްޓުވާލާ ދުވަހަކީ ވަޒީފާތަކުން ވެސް މީހުން ވަކިކުރާނެ ދުވަސް ކަމަށް އޭނާ ވިދާޅުވިއެވެ.
އަޅުގަނޑު ދަންނަވާނީ އަޑު އުފުލަން ވަޑައިގަންނަވާށޭ. އަޅުގަނޑުމެން އެތަނަށް އެއްވާނަމޭ. އަޅުގަނޑުމެން ދައްކަންޖެހޭ ވާހަކަ ދައްކާނަމޭ. ސަރުކާރަށް އަޅުގަނޑުމެން ގޮވާލަންޖެހޭ ގޮވާލުންތައް ގޮވާލާނަމޭ. އަޅުގަނޑުމެންގެ އިހުތިޖާޖު ކުރިއަށްދާނެ. އެތަނުގައި. އެއްވެސް ވަރަކަށް ކަންބޮޑުވެއްލައްވާނެ ކަމެއް ނެތް. މިއަދު އަޅުގަނޑުމެން އެމްޑީޕީއޭ ކިޔައިގެން ސަރުކާރުން ދައްކާ ވާހަކަތައް ބާއްވާށޭ. އެމްޑީޕީ ނޫން ބަޔަކު ނެތް މިއަދުގެ ސަރުކާރު ޖަވާބުދާރީ ކޮށް، ރައްޔިތުންގެ ބާރުވެރިކަން އަނބުރާ ހޯދޭނެ ބައެއް އަދި އެއް ނެތް ދިވެހިރާއްޖޭގައި. އެހެންވީމަ މިއަދު އަޅުގަނޑުމެން އެންމެން ހުރި ހިތްހަމަނުޖެހުން އެއްކިބާކޮށްފައި މިކަން ނުކޮށްފި ކަމަށްވަންޏާ މިސަރުކާރު ޑރ.މުއިއްޒު މިދާ ގޮތުންވެއްޖެއްޔާ 30،40 އަހަރުގެ ވެރިކަން ހުދުމުހުތާރު ވެރިކަމަކަށް މިގައުމު ބަދަލުކޮށްލާނެ. އެހެންވީމަ ވަޑައިގަންނަވާށޭ.އެމްޑީޕީގެ ޗެއަރޕާސަން ފައްޔާޒު އިސްމާއީލް
ފައްޔާޒު ވަނީ ލޫޓުވައިފި އެއްވުމަށް ވީހާ ވެސް ގިނަ ރައްޔިތުން ނުކުމެ ހައްގު ބަސް ބުނުމަށް ގޮވާލާފައެވެ.
