ކުރިއަށް އޮތް ރިޔާސީ އިންތިޚާބުގައި އަޅުގަނޑުމެންގެ ތެރެއިން ކޮންމެ ބޭފުޅަކު ނުކުންނެވި ނަމަވެސް ރައީސް ޑރ.މުހައްމަދު މުއިއްޒު ބަލިކުރައްވާނެ ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.

ހުކުރު ދުވަހުގެ ފަށާއިރު ޕްރޮގްރާމްގައި ފައްޔާޒު ވިދާޅުވީ ލޫޓުވަައިފި ނަމުގައި ސަރުކާރާ ދެކޮޅަށް މަސައްކަތް ފެށުމާއެކު، މިސަރުކާރު ވަރަށް އެކްޓިވްވެފައިވާ ކަމަށާއި، ފާއިތުވި ދެތިން ދުވަހުގެ ތެރޭގައި ބައިވަރު ރިޕޯޓުތައް ވެސް އާއްމު ކޮށްފައިވާ ކަަމަށެވެ.

ފައްޔާޒު ވިދާޅުވީ މަގުސަދަކީ ސަރުކާރު ޖަވާބުދާރީ ކުރުވުން ކަމަށާއި، ލޫޓުވައިފި އެއްވުމުގެ ނަތީޖާ ވަރަށް ރަނގަޅު ކަމަށެވެ.

ކޮރަޕްޝަނާއި ވައްކަމަށް އިޝާރާތް ކުރައްވައި ފައްޔާޒު ވިދާޅުވީ ރައްޔިތުން ނުކުމެ ރައީސް މުއިއްޒަށް ވޯޓު ދީ ވެރިކަން ހަވާލުކޮށްފައިވަނީ ކުރީ ސަރުކާރުތަކުން ވައްކަން ކުރިކަމުގެ ތުހުމަތުކުރުމަށްފަހު، އެއަށްވުރެ ބޮޑެތި ވައްކަންތައްތައް ކުރަން ނޫން ކަމަށެވެ. ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ރޭވިގެން ކޮރަޕްޝަންގެ އަމަލުތަކެއް ހިންގާފައި ނޯންނާނެ ކަމަށާއި، އެކަމަށް 100 ޕަސެންޓް ޔަގީންކަން ދޭ ކަމަށް ފައްޔާޒު ވިދާޅުވިއެވެ.

މީގެ އިތުރުން ފައްޔާޒު ވިދާޅުވީ ގިނަ ތުހުމަތުތަކެއް ކޮށް، ނާއިންސާފުން ޝަރީއަތް ހިންގައި ޖަލަށް ލެވިދާނެ ކަމަށާއި، 2028 ވަނަ އަހަރު ބާއްވާ ރިޔާސީ އިންތިޚާބުގައި އެމްޑީޕީގެ ފަރާތުން ވާދަ ކުރައްވާނެ ކަމަށް ބެލެވޭ ހުރިހާ ބޭފުޅުން ޖަލަށް ވެސް ލެވިދާނެ ކަމަށެވެ.

ނަމަވެސް އިންތިޚާބުގައި ވޯޓެއް ލާ ކަމަށްވާނަމަ އެމްޑީޕީގެ ފަރާތުން ކޮންމެ ބޭފުޅަކު ނުކުންނެވި ނަމަވެސް ރައީސް މުއިއްޒު ބަލި ކުރައްވާނެ ކަމަށާއި، އެމްޑީޕީން ކާމިޔާބު ހޯދާނެ ކަމަށް އޭނާ ވިދާޅުވިއެވެ.

ފައްޔާޒު ވިދާޅުވީ މި ސަރުކާރަށް ރައްޔިތުންގެ ތާއީދު ނެތް ކަމަށާއި، މިސަރުކާރުގެ ބޭފުޅުންނަށް ވެސް އެކަން އެނގޭ ކަމަށެވެ.