މިއަދު ގައުމު މިއޮތް ނުރައްކާތެރި ހާލަތު ބަދަލު ކުރެވޭނީ ހުރިހާ ރައްޔިތުން މަގުމައްޗަށް ނުކުމެ މުޒާހަރާކޮށް، އަޑުއުފުލައިގެން: ޝައުނާ
ކަންމަތީ ފިހާރަތަކުން ވެސް ގައުމުގެ މިހާރުގެ ހާލަތު ވަރަށް ރަނގަޅަށް އެނގިގެންދޭ
ކުރީގެ އެންވާރަމެންޓް މިނިސްޓަރ އާމިނަތު ޝައުނާ: ވިދާޅުވީ ގައުމު މި އޮތް ހާލަތަުން ސަލާމަތް ކުރެވޭނީ މުޒާހަރާކޮށް އަޑުއުފުލައިގެން ކަމަށް
ގޭދޮށު ކަންމަތީ ފިހާރައަކަށް ވަދެލިޔަސް މިއަދު މި ގައުމުގެ ހާލަތު ވަރަށް ރަނގަޅަށް އެނގިގެން ދާ ކަމަށާއި ގައުމު މިހާރު މި އޮތް ހާލަތުން ސަލާމަތް ކުރެވޭނޭ ހަމަ އެކަނި ގޮތަކީ މަގުމައްޗަށް ނުކުމެ މުޒާހަރާކޮށް އަޑު އުފުލައިގެން ކަމަށް ކުރީގެ އެންވާރަމެންޓް މިނިސްޓަރ އާމިނަތު ޝައުނާ ވިދާޅުވެއްޖެ އެެވެ.
އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އިންތިޒާމު ކޮށްގެން ހުކުރު ދުވަހުގެރޭ ބާއްވާ ބޮޑު އެއްވުމަށް ތައްޔާރުވުމުގެ ގޮތުން ކުރިޔަށް ގެންދާ ޚާއްސަ ކަވަރެޖުގައި ވާހަކަ ދައްކަވަމުން ޝައުނާ ވިދާޅުވީ ގައުމު ހަމަމަގަށް އެޅުވުމަށް ހުކުރު ދުވަހުގެ ރޭގެ ބޮޑު އެއްވުމަށް ރައްޔިތުން ނުކުތުމަކީ ވަރަށް ވެސް މުހިންމު ކަމެއް ކަމަށެވެ.
އަދި ހުކުރު ދުވަހުގެ ރޭ އޮންނަ ބޮޑު އެއްވުމަށް ރައްޔިތުން ނުކުމެ އަޑުއުފުލުން މުހިންމުވާ ސަބަބު ވެސް ޝައުނާ ވަނީ ވިދާޅުވެދެއްވާފަ އެވެ.
އެގޮތުން ރައީސް މުއިއްޒުގެ ސަރުކާރު އިންތިޚާބުވުމަށް ފަހު އެންމެ ފުރަތަމަ ވެސް ކުރި ކަމަކީ ރާއްޖޭގެ ގާނޫނު އަސާސީ އަށް ނުރަނގަޅު ބޮޑެތި ބަދަލުތަކެއް ގެނެސްގެން އެންމެ އަށް ގަޑިއިރުގެ ތެރޭގައި ރައްޔިތުންގެ މަޖިލީސް މުށުތެރެއަށް ލުން ކަމަށް ޝައުނާ ވިދާޅުވި އެވެ.
ބައްލަވާ ގާނޫނު އަސާސީއަށް ބަދަލުި ގެނެސްގެން އެންމެ އަށް ގަޑިއިރުގެ ތެރޭގައި މަޖިލިސް ތަޅުއެޅުވީ. އެއާއި އެކު ރައްޔިތުންގެ މަޖިލިސް މެމްބަރުންނަކަށް އެ މެމްބަރުންގެ ފުރިހަމަ ގާނޫނީ ޒިންމާ އަދާކުރާނޭ ފުރުސަތެއް މިހާރު ނެތް.ކުރީގެ އެންވާރަމެންޓް މިނިސްޓަރ އާމިނަތު ޝައުނާ
މީގެ އިތުރުން ސަރުކާރު ޖަވާބުދާރީ ކުރުމަށް އޮތް ދެވަނަ މަރުހަލާ ކަމުގައިވާ ކޯޓުތައް ރައީސް މުއިއްޒުގެ މުށުތެރެއަށް ލުމާއި ޚިޔާލުފާޅު ނުކުރެވޭ ގޮތަށް މީޑިއާތައް ތަޅު އެޅުވުމަކީ މުޒާހަރާއަށް ނުކުންނަ ޖެހޭ ސަބަބުތައް ކަމުގައި އޭނާ ފާހަހަގަކުރެއްވި އެވެ.
ޝައުނާ ވިދާޅުވީ މިއީ ޑީއާރުޕީ، ޕީޕީއެމް އަދި ޕީއެންސީގެ ވެރިކަމެއް މި ގައުމަށް އަންނަ ހަމަ ކޮންމެ ފަހަރަކު ފެންނަ މަންޒަރު ކަމަށެވެ، އަދި މިއީ އާކަމެއް ނޫން ކަމަށާއި މިއީ މާކުރިން ވެސް ފެނިފައިވާ މަންޒަރުތަކެއް ކަމަށް ޝައުނާ ވިދާޅުވި އެވެ.
ޝައުނާ ވިދާޅުވީ މިއަދު ގައުމުގެ ހުރިހާ ރައްޔިތުންނަށް ވެސް ގައުމުގައި ވަމުން މިދާ ކަންކަން ވަރަށް ރަނގަޅަށް އެނގޭކަމަށެވެ. އެގޮތުން އެންމެ ކުޑަމިނުން ގެއަށް އެއްޗެއް ގަންނަން ނުކުމެ ކަންމަތީ ފިހާރައަކަށް ވަދެލި ނަމަވެސް ގައުމު މި އޮތް ނާޒުކު ހާލަތު އެނގިގެންދާ ކަމަށް ޝައުނާ ވިދާ ވިދާޅުވިއެވެ.
އަޅުގަނޑަށް ގަބޫލެއް ނުކުރެވޭ ސަރުކާރު އޮފީސްތައް ނުވަތަ ކުންފުނިތަކުގެ މުވައްޒަފުން ވެސް ދެން މިދައްކާ ދޮގު ވާހަތައް ވެސް ގަބޫލުކުރާނެ ހެނެއް. ދެން އަޅުގަނޑުމްނެ ތަސައްރަފް ފުދިފައި ތިބި މީހުންނަށް އެބަ ވިސްނޭ މިކަންކަން ވަމުން މިދަނީ ކޮން މަގަކުންކަން. އޮފީސް ނިންމާފަ ގެއަށް ގޮސްފަ ކާންހަދަން އެއްޗިސް ގަންނަ ފިހާރައަށް ވަނީ މަ އެނބަ އެބައެގޭ ގައުމުގެ މިހާރުގެ ހާލަތު ހުރީ ކިހާ ހިސާބެއްގައި ކަން، އާފަލެއްގެ އަގު 10 ނޫނީ 12 ރުފިޔާއަށް އަރައިގެން ދިޔާމަ އެބައެނގޭ މި ވާނުވާގޮތް. ޑޮލަރެއްގެ އަގު 20 ރުފިޔާއަށް ވުރެ މައްޗަށް ދިޔާމަ އެބަ އެނގޭ މި ވާނުވާ.ކުރީގެ އެންވާރަމެންޓް މިނިސްޓަރ އާމިނަތު ޝައުނާ
މީގެ އިތުރުން ޝައުނާ ވިދާޅުވީ ރައީސް މުއިއްޒު ޑޮޮލަރުގެ މައްސަލަ ހައްލުކުރައްވާނެ ކަމަށް ވިދާލުވެ ކުރެއްވި ކަންތައްތަކުގެ ސަބަބުން މިއަދު މުޅި ގައުމުގެ ހާލަތަު މިވަނީ އިންތިހާއަށް ދަށުދަރަޖައަކަށް ވެއްޓިފައި ކަމަށެވެ.
ޝައުނާ ވިދާޅުވީ މިއަދު މި ސަރުކާރު އައިފަހުން ދެވެހިން ރީތި ރަނގަޅު ދިރިއުޅުމެއް ލިބޭނޭފަދަ ރަނގަޅު ޚިދުމަތްތަކެއް ނުލިބޭކަމަށާއި އެކަމުގެ ސަބަބުން ރައްޔިތުން މިއަދު ތިބީ ވަރަށް ނިކަމެތި ހާލަތެއްގައި ކަމަށެވެ.
ޝައުނާ ވިދާޅުވީ ރައީސް މުއިއްޒުގެ ހީލަތްތެރި ވިސްނުމުގެ ދަށުން ރޭވުންތެރިކަމާއި އެކު މުޅި ގައުމުގެ ހުރިހާ ބާރުތަކެއް މުށުތެރެއަށް ލައިގެން ހިތު ހުރިގޮތަކަށް ކަންކަން ކުރަން މިއަދު ރައްޔިތުން ފުރުސަތު ނުދޭނޭ ކަމަށެވެ.
ގައުމު މިހާރު މި އޮތް ހާލަތުން ސަލާމަތް ކުރުމަށް ވީހާވެސް ގިނަ ބަޔަކު މުޒާހަރާއަށް ނުކުތުމަށް ޝައުނާ ވަނީ ގޮވާލައްވާފަ އެވެ.
