ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލެ ސިޓީގެ މޭޔަރުކަމުގައި ހުންނެވި ދުވަސްވަރު ހަތަރު ފޮރޮޅުލީ އުޅަނދުތައް ޕާކު ކުރަން މާލޭގެ މަގުތަކުން ދޫކުރި ޖާގަތައް މާލެ ސިޓީ ކައުންސިލުން އުވާލި ނަމަވެސް އެމީހުންގެ އަތުން ނެގި ފައިސާ އަނބުރާ ދޭންޖެހޭ ކަމަށް އެމްޑީޕީގެ ލީގަލް ޑިރަކްޓަރ އަހުމަދު މައުރޫފް ވިދާޅުވެއްޖެ އެވެ.

މިމައްސަލައާ ގުޅިގެން ކަންބޮޑުވުންފާޅުކޮށް މައުރޫފް ވިދާޅުވީ އުޅަނދުތައް ޕާކު ކުރަން މާލޭގެ މަގުތަކުން ދޫކުރި ޖާގަތައް މާލެ ސިޓީ ކައުންސިލުން އުވާލި ނަމަވެސް އެމީހުންގެ އަތުން ނެގި ފައިސާ އަނބުރާ ދޭންޖެހޭ ކަމަށެވެ. އަދި ރައީސް މުއިއްޒުގެ ޖީބަށް ކަޓް ފައިސާ ލެއްވި ކަމަށް ތުހުމަތުކޮށް، އެއަނބުރާ ދިނުމަށް ގޮވާލެއްވި އެވެ.

ބުދަ ދުވަހު މާލެސިޓީ ކައުންސިލުން ބުނީ، މާލޭގެ މަގުތަކުން ހަތަރު ފޮރޮޅުލީ ވެހިކަލް ޕާކިންގއަށް ދޫކޮށްފައިވާ ސަރަހައްދުތައް ކުއްޔަށް ދިނުމަކީ ގާނޫނީ ގޮތުން ކުރެވޭނެކަމެއް ނޫން ކަމަށް އެޓަރނީ ޖެނެރަލްގެ އޮފީހުން ލަފާދީފައިވާކަމަށް ބުނެ، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކައުންސިލަށް އަންގާފައިވާ ކަމަށެވެ.

އެހެންކަމުން، މާލޭގެ މަގުތަކަށް ދިމާވެފައިވާ ހާސްކަން ފިލުވުމަށް އަޅާ މުހިންމު ފިޔަވަޅެއްގެ ގޮތުން، 01 އޮކްޓޫބަރު 2025 ވަނަ ދުވަހުން ފެށިގެން، މާލޭގެ މަގުތަކުގައި، ވަކި ކަމަކަށް ބޭނުންކުރާކަން އަންގައިދިނުމުގެ ގޮތުން، ބޯޑަކުން ފާހަގަކޮށްފައިވާ ތަންތަން ފިޔަވައި، މަގުމަތީގައި، ޕާކުކުރެވޭނެކަން އަންގައިދޭ ނިޝާންތަކުން ފާހަގަކޮށްފައިވާ ކޮންމެތަނެއްގައި، ކޮންމެ އާންމު ރައްޔިތަކަށްވެސް ޕާރކް ކުރެވޭނެ ކަމަށް ކައުންސިލުން ބުނެއެވެ.

މާލޭ މަގުމަތިން ޕާކިން ސްލޮޓްތައް ކުއްޔަށް ދޫކުރަން ފެށީ މިހާރުގެ ރައީސް މުއިއްޒު މާލޭ މޭޔަރަކަށް ހުންނެވި ދުވަސްވަރު، 2022ގަ އެވެ.

މައުލޫމާތު ލިބޭގޮތުގައި މިދިޔަ އަހަރު މެއި މަހުގެ ނިޔަލަށް މާލޭގެ ފަސް ސަރަހައްދަކުން ޕާކު ކުރުމަށް 1120 ސްލޮޓް ދޫކޮށްފައިވެއެވެ. އޭގެތެރެއިން 941 ސްލޮޓު ދޫކޮށްފައިވަނީ މަގުމަތިންނެވެ. މަގުމަތިން ދޫކުރި ސްލޮޓުތައް ދެ މީހަކަށް ދޫކުރުމުގެ މައްސަލަތައް ފެންމަތިވެފައިވާއިރު، މިތަންތަން ދޫކޮށްފައިވަނީ ކައުންސިލްގެ ބައެއް މެންބަރުންނާއި، މަސައްކަތް ކުރަމުންދިޔަ ސިޔާސީ ބައެއް މުވައްޒަފުންނަށް ބޮޑެތި އަދަދުތަކުން ފައިސާ ދީގެންކަމަށް ތުހުމަތުކޮށްފައިވެއެވެ.