"ލޫޓުވައިފި، ލޫޓުވައިފި" ބޮޑު އެއްވުމަށް ވަގުތު ކުޑަތަންވެފައިވަނިކޮށް ފުލުހުންގެ ރަޔަޓު ގިޔަރުގައި މަގުމައްޗަށް
ފުލުހުން ހަރަކާތްތެރިވެފައިވަނީ ސަލްމާން މިސްކިތް ސަރަހައްދާއި، ރާޅުގަނޑު ސަރަހައްދާއި، އާޓިފިޝަލް ބީޗް ސަރަހައްދުގައި
ފުލުހުން މާލޭގެ މަގުމަތީގައި ހަރަކާތްތެރިވަނީ-
"ލޫޓުވައިފި، ލޫޓުވައިފި" ބޮޑު އެއްވުމަށް ވަގުތު ކުޑަތަންވެފައިވަނިކޮށް ފުލުހުންގެ ރަޔަޓު ގިޔަރުގައި މާލެސިޓީ މަގުތަކައް ނުކުމެއްޖެއެވެ.
ރައީސް ޑރ.މުހައްމަދު މުއިއްޒުގެ ސަރުކާރާ ދެކޮޅު އެންމެ ބޮޑު ސިޔާސީ ޕާޓީ، އެމްޑީޕީން އިސްވެ އޮކްޓޯބަރު މަހުގެ 3 ވަނަ ދުވަހު ބޮޑު އެއްވުމެއް ސަރުކާރާ ދެކޮޅަށް ބޭއްވުމަށް ދަނީ ތައްޔާރުވަމުންނެވެ. މި އެއްވުމުގައި ގިނަ އާއްމު ރައްޔިތުން ބައިވެރިވާނެ ކަމަށް ބެލެވޭއިރު، އެއްވުމާ ދިމާކޮށް ފުލުހުންގެ ހަރަކާތްތައް ވަނީ އިތުރުކޮށްފައެވެ.
އަންގާރަ ދުވަހުގެ ރޭ ގިނަ އަދަދެއްގެ ފުލުހުން ވަނީ މާލޭގެ މަގުތައް މަތީ ހަރަކާތްތެރިވެފަ އެވެ. ރަޔަޓު ގިޔަރުގައި ފުލުހުން ހަރަކާތްތެރިވެފައިވަނީ ސަލްމާން މިސްކިތް ސަރަހައްދާއި، ރާޅުގަނޑު ސަރަހައްދާއި، އާޓިފިޝަލް ބީޗް ސަރަހައްދު ގައެވެ. އަދި މަޖީދީ މަގު ހިމެނޭހެން ބޮޑުތަކުރުފާނު މަގުގައި ވަށައި ވެހިކަލް ދުއްވާފައިވެއެވެ.
މީގެ އިތުރުން މުޒާހަރާތައް ރޫޅާލުމަށް ބޭނުންކުރާ ޝީލްޑު ފަދަ އާލާތްތަކާއެކު ސަފުތަކަށް އެތުރި، އަމަލުކުރާނެ ގޮތްގޮތަށް ހަރަކާތްތެރިވާ މަންޒަރު އާންމުވެފައިވާ ވީޑިއޯ އަދި ފޮޓޯތަކުން ފެނެއެވެ. އަދި ސެޕްޓެންބަރު މަހުގެ ތެރޭގައި ވެސް ހުޅުމާލެ-ފޭސް3 ގައި ވެސް ފުލުހުންގެ ތައްޔާރީ ހާލަތު ދެނެގަތުމަށް ޚާއްސަ ތަމްރީނެއް ކުރިއަށް ގެންގޮސްފައިވެއެވެ.
މި އެއްވުމާއި ގުޅިގެން ފުލުހުން ތައްޔާރީ ހާލަތަށް އައިސްފައިވާއިރު، މިފަހުން އެމްއެންޑީއެފްގެ ވެހިކަލްތަކާއި، އެމްއެންޑީއެފުގެ ދެ ޓޭންކަރާއެކު ސިނަމާލެ ބްރިޖު ހިމެނޭ ގޮތަށް މާލޭގައި ދުއްވާފައިވެއެވެ.
މިއެއްވުމާއި ގުޅިގެން ފުލުހުންގެ ޚިދުމަތުގެ އިތުރުން އެމްއެންޑީއެފް ވަނީ 30 ސެޕްޓެންބަރު 2025 ގައި އެލާޓަށް ގެނެސްފައެވެ. އަދި ހުކުރު ދުވަހު އެލާޓް ލެވަލް މަތިކުރާނެ ކަމަށް މައުލޫމާތު ލިބެއެވެ.
އެމްޑީޕީން އިސްވެ އޮވެ ބާއްވާ މި އެއްވުމުގައި ގިނަ ރައްޔިތުން ބައިވެރިވާނެ ކަމަށް ބެލެވެއެވެ. އެއާއެކު މިސަރުކާރުގައި ރައްޔިތުންނަށް ދަތިކޮށްފަައިވާ ގިނަ ކަންކަމަށް ހައްލު ހޯދައިނުމުގެ މަސައްކަތްތައް ދަނީ ކުރަމުންނެވެ. އެގޮތުން ގެދޮރުވެރިޔާ ފްލެޓުގެ ތަޅުދަނޑި ހަވާލު ކުރުމުގެ މަސައްކަތް ފާހަގަކޮށްލެވެއެވެ.
ގައުމުގެ ހާލަތު ވަރަށް ގޯސްވެފައިވާއިރު، ކޮރަޕްޝަނާ ދެކޮޅު ހުރިހާ ރައްޔިތުން އެއްވުމުގައި ބައިވެރިވުމަށް ކުރީގެ ރައީސުންގެ އިތުރުން ސިޔާސީ އިސްބޭފުޅުން ދަނީ ގޮވާލަމުންނެވެ.
