ރައީސް މުއިއްޒުގެ ލެގަސީއަކީ ރަށްރަށުގައި އޭޓީއެމް ބެހެއްޓުން: އައިކް
ކުރިއަށް އޮތް އަހަރުތަކާއެކު، މިސަރުކާރަށް ހިންގޭ އެންމެ ބޮޑު މަޝްރޫއަކީ އޭޓީއެމް ބެހެއްޓުން
އަރިއަތޮޅު އުތުރުބުރީ މާޅޮހުގައި އޭޓީއެމްގެ ޚިދުމަތް ރައީސް ޑރ. މުހައްމަދު މުއިއްޒު ފަށްޓަވައިދަވަނީ - ފައިލް ފޮޓޯ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލަގަސީއަކީ ރަށްރަށުގައި އޭޓީއެމް ބެހެއްޓުން ކަމަށް އެމްޑީޕީގެ ގާނޫނީ ޓީމުގައި ހިމެނިވަޑައިގަންނަވާ އައިކް އަހުމަދު އީސަ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އައިކް ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ އިގްތިސާދު ހަމައަކަށް އަޅުވައި، ރައްޔިތުންނަށް ފުދުންތެރި ދިރިއުޅުމެއް ހޯދައިދޭނެ ކަމުގެ ވައުދާއެކު ކަމަށެވެ. ނަމަވެސް މިވެރިކަމުގައި ރައްޔިތުންނަށް ދަތިވެ، ރައްޔިތުންގެ އަތުގައި ފައިސާ ނެތް ކަމަށް އައިކް ވިދާޅުވިއެވެ.
މި ސަރުކާރުގައި ހިންގާ މަޝްރޫއުތަކަށް އިޝާރާތް ކުރައްވައި އައިކް ވިދާޅުވީ ހަމައެކަނި ކުރިއަށް ދަނީ އޭޓީއެމް ބެހެއްޓުމުގެ މަޝްރޫއުތައް ކަމަށެވެ. އަދި ކުރިއަށް އޮތް އަހަރުތަކާއެކު، މިސަރުކާރަށް ހިންގޭ އެންމެ ބޮޑު މަޝްރޫއަކީ އޭޓީއެމް ބެހެއްޓުން ކަމަށްވާތީ، ރައީސް މުއިއްޒުގެ ލެގަސީއަކީ ރަށްރަށުގައި އޭޓީއެމް ބެހެއްޓުން ކަމަށް އައިކް ވިދާޅުވިއެވެ.
މީގެ އިތުރުން އައިކް ވިދާޅުވީ ރައީސް މުއިއްޒަށް ނިސްބަތް ކުރައްވައި، އޭޓީއެމް ދޮންބެ ކިއުން އެއީ އުފާ ކުރަންޖެހޭ ކަމެއް ނޫން ކަމަށެވެ. އަދި ރައްޔިތުން މިއަދު ބޭނުންވަނީ އޭޓީއެމް ނޫން ކަމަށާއި، ފައިސާ ކަމަށް އޭނާ ވިދާޅުވިއެވެ.
އަޅުގަނޑަށް އޭޓީއެމް ދޮންބެ ކިޔާނަމަ އަޅުގަނޑު ލަދުގަންނާނެ. އެއީ މީހަކު ފޮނިވާވަރުގެ ކަމެއް ނޫން. އެއީ ހަމަ ލަދުވެތި ކަމެއް. އެ ޑރ.މުއިއްޒަށް އަމިއްލައަށް ގަބޫލުފުޅު ކުރެއްވެނީ އެބޭފުޅާގެ 5 އަހަރުގެ ތެރޭގައި އެބޭފުޅާއަށް ކުރެއްވޭނެ އެންމެ މޮޅު ކަންތައް މި ކުރަނީއޭ. އެބޭފުޅާގެ ލެގަސީއަކީ ރަށްރަށުގައި އޭޓީއެމް ބެހެއްޓުން. އަޅުގަނޑުމެން ކޮމްޕެއަރ އަސްލުކޮށްގެން ނުވާނެ އެކި ރައީސުން. އެއީ އެކިއެކި ހާލަތްތަކުގައި ވެރިކަން ކުރައްވާފައި ހުރީ އެކި ބޭފުޅުން. އެކަމަކު ވެސް ދިވެހިރާއްޖޭގެ މިހާރު މިއޮތް އަނދަވަޅުން މާލީ އަނދަވަޅުން އިގްތިސާދީ އަނދަވަޅުން ނަންގަވާނެ ކަމަށް ވައުދުވެވަޑައިގެންނެވި ބޭފުޅެއް އިގްތިސާދު މިދަނީ ހަމަ އިތުރަށް ދަށަށް. އެހެންވީމަ އޭޓީއެމް ބެހެއްޓިކަމަށްވީ ނަމަވެސް ޑރ.މުއިއްޒު ހަނދާންފުޅު ނެތޭ ކަމަކީ ރައްޔިތުންގެ އަތުގައި އޭޓީއެމުން ނަގާނެ ފައިސާއެއް ނެތްކަން. ރައްޔިތުން ބޭނުންވަނީ ފައިސާ. އޭޓީއެމްއެއް ނޫން. ފައީސާ ހުރެގެން އޭޓީއެމްގެ ބޭނުން ހިފޭނީ.އެމްޑީޕީގެ ގާނޫނީ ޓީމުގައި ހިމެނިވަޑައިގަންނަވާ އައިކް އަހުމަދު އީސަ
މީގެ އިތުރުން ރައީސް މުއިއްޒު ވެރިކަމަށް ވަޑައިގެންނެވި ފަހުން ރާއްޖެއިން ބޭރަށާއި، އަތޮޅުތެރޭގެ ރަށްރަށަށް ކުރައްވާ ދަތުރުފުޅަށް ވެސް އައިކް ވަނީ ފާޑު ވިދާޅުވެފައެވެ.
އައިކް ވިދާޅުވީ ކޮންމެ މަހަކު އެމަނިކުފާނާއެކު، އަރިހުގައި ބޮޑު ވަފުދެއް ވެސް ރަށްރަށަށް ވަޑައިގަންނަވާ ކަމަށާއި، އެއީ ވަރަށް ބޭކާރު ހަރަދު ކަމަށެވެ.
