ޝަންގްރިއްލާގެ ހުޅުވަނީ 20 ކޮޓަރި ކަމަށް އަޑު ފެތުރިފައިވޭ، އެކަން ކުރަނީ ސިޔާސީ ޕްރެޝަރގެ ސަބަބުން : މޭޔަރ ނިޒާރު
ފާއިތުވި އެމްޑީޕީގެ ވެރިކަން ބަދަލުވި އިރު ޝަންގްރިއްލާ އޮތީ ހުޅުވަންޖެހޭ ހުރިހާ ކަމެއް ފުރިހަމަކޮށް ގާނޫނީ ގޮތުން އެތަން އަލުން އޮޕަރޭޝަނަށް ގެނެވޭ ވަރަށް އިސްލާހުތައް ގެނެސްފަ
އައްޑޫ ސިޓީގެ މޭޔަރު އަލީ ނިޒާރު
ޝަންގްރިއްލާ ހުޅުވުމުގައި އިތުބާރު ވަރަށް ބޮޑަށް ގެއްލިފައިވާ ކަމަށާއި، އެކަން ކުރަނީ ސިޔާސީ ޕްރެޝަރގެ ސަބަބުން ކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެ އެމްވީ އަށް ދެއްވި ބަސްތީގަތުމެއްގައެވެ.
އޮކްޓޯބަރު 3 ގައި ސަރުކާރުގެ ގޯސް ކަންތަކާއި ދެކޮޅަށް އަޑު އުފުލުމަށް ބޭއްވުމަށް ހަމަޖެހިފައިވާ ބޮޑު އެއްވުމުގެ ކުރިން، އައްޑޫ ސިޓީގެ ޝަންގްރިއްލާ ރިސޯޓު މިއަހަރުގެ ނިޔަލަށް އަލުން ހުޅުވަން ނިންމާފައިވާ ކަމަށް ސަރުކާރުން ވަނީ ބުނެފައެވެ.
ޝަންގްރިއްލާ ހުޅުވުމަކީ ލިބޭ އުފަލެއް ކަމަށާއި އެކަމުން އައްޑޫގެ ކުރިމަގަށް ވެސް ރަނގަޅު ކުރިއެރުންތަކެއް ލިބޭނެ ކަމަށް އޭނާ ވަނީ ވިދާޅުވެފައެވެ. ވާހަކަތައް ދެކެވޭ ގޮތުން ކަމަށް ވާނަމަ 20 ވަރަކަށް ކޮޓަރި އާއި އެކު ޝަންގްރިއްލާ ހުޅުވާކަމަށް އަޑު ފެތުރިފައިވާ ކަމަށާއި އެހެން ކަމަށް ވާނަމަ އެއީ ނަމެއްގައި ރިސޯޓް ހުޅުވުން ކަމަށް އޭނާ ވަނީ ސިފަކުރައްވާފައެވެ.
"ހުޅުވުނީމަ ނޫނީ ހުޅުވާނެއޭ ބުނަން ނޭނގޭހާ ބޮޑަށް އިތުބާރު ގެއްލިފައި އޮތީ. މިދިޔަ ސަރުކާރުން ޤާނޫނަށް ބޮޑެތި ބަދަލުތައް ގެނެސް ޝަންގްރިއްލާ އިން ބޭނުންހާ ދޫތަކެއް ދީފައި އޮތީ ރިސޯޓް ހުޅުވުމަށްޓަކާ. ހަގީގަތަކީ އޭގެ ފަހުން ލިބުނު ބަދަލެއް ނެތް. ސަރުކާރުން ލިބުނު ލުއިތަކުގެ ބަދަލުގައި އެކަން ނުކޮށް ތިބެފައި އެކަން ޑިސެމްބަރުގައި ކުރާނެ ކަމަށް އެ ބުނަނީ." ނިޒާރު ވިދާޅުވިއެވެ.
ފާއިތުވި އެމްޑީޕީގެ ވެރިކަން ބަދަލުވި އިރު ޝަންގްރިއްލާ އޮތީ ހުޅުވަންޖެހޭ ހުރިހާ ކަމެއް ފުރިހަމަކޮށް ގާނޫނީ ގޮތުން އެތަން އަލުން އޮޕަރޭޝަނަށް ގެނެވޭ ވަރަށް އިސްލާހުތައް ގެނެސްފަ އެވެ. ސަރުކާރުން ބުނީ ކޮވިޑް-19 އާ ގުޅިގެން 2020 ވަނަ އަހަރު ވަގުތީ ގޮތުން ބަންދުކުރި އައްޑޫ ސިޓީގެ ޝަންގްރިއްލާ ވިލިނގިލީ ރިސޯޓް އެންޑް ސްޕާ މިއަހަރުގެ ޑިސެންބަރު 31 ގެ ކުރިން އަލުން ހުޅުވުމަށް ނިންމާފައިވާ ކަމަށެވެ.
