ރައީސް މުއިއްޒު އަށް މި އަހަރުގެ ޖުލައި މަސް ނާންނާތީ ހުޅުދެލީގެ ބިން ހިއްކުމުގެ މަސައްކަތް އަދިވެސް ނުފެށޭ!
30 ސެޕްޓެމްބަރު 2025 | އަންގާރަ 08:22ފެބްރުއަރީ މަހުގައި ރައީސް މުޢިއްޒު ވިދާޅުވީ ލަސްވެގެން ޖުލައި މަހުގައި ބިން ހިއްކަން ފެށޭނެ ކަމަށް
ޖުލައި މަހުގައި ދ. ހުޅެދެލީގައި ބިން ހިއްކާނެ ކަމަށް ރައީސް މުއިއްޒު ވިދާޅުވި ސަރަހައްދު
ލަސްވެގެން މިއަހަރުގެ ޖުލައި މަހު، ދ. ހުޅުދެލީ ފަޅުތެރެއިން ހިއްކެން އޮތް އެންމެ ބޮޑު މިނެއްގައި ބިންހިއްކުމުގެ ޢަމަލީ މަސައްކަތް ފައްޓަވާނޭކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް، އެއީ ކޮން އަހަރެއްގެ ޖުލައި މަސްކަމެއް އެނގިވަޑައިނުގަންނަވާ ކަމަށާއި، އެފަދަ ނިޝާނެއް ފެންނަން ނެތް ކަމަށް ހުޅުދެލި ކައުންސިލްގެ ރައީސް އަހުމަދު ނާޒިމް ވިދާޅުވެއްޖެ އެވެ.
ލަސްވެގެން މިއަހަރުގެ ޖުލައި މަހު، ދ. ހުޅުދެލީ ފަޅުތެރެއިން ހިއްކެން އޮތް އެންމެ ބޮޑު މިނެއްގައި ބިންހިއްކުމުގެ ޢަމަލީ މަސައްކަތް ފައްޓަވާނޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވީ އެ މަނިކުފާނު ނިލަންދެއަތޮޅު ދެކުނުބުރީގެ ރަށްތަކަށް މި އަހަރުގެ ފެބްރުއަރީ މަހު ކުރެއްވި ދަތުރުފުޅުގައި 25 ފެބްރުއަރީގައި އެއަތޮޅު ހުޅުދެއްޔަށް ވަޑައިގެން އެރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ ބިމުގެ ދަތިކަމަކީ، ހުޅުދެލީގެ ރައްޔިތުންނަށް ޙަޤީޤަތުގައިވެސް އެންމެ ބޮޑުވެފައި އޮތް މައްސަލަ ކަމަށެވެ. އަދި އެ ރަށުގެ ފަޅުތެރެއިން ބިން ހިއްކެން އޮތް އެންމެ ބޮޑުމިނެއްގައި ބިންހިއްކައި، އެ ބިން ހިމާޔަތްކޮށްދިނުމަކީ، އެ ރަށުގައި ކުރިއަށް ގެންދަން، މި ސަރުކާރުން ކަނޑައަޅާފައި އޮތް އެންމެ މުހިންމު މަޝްރޫޢުކަމަށް ވިދާޅުވިއެވެ.
އިރާދަކުރެއްވިއްޔާ، ކުރިއަށް މިއޮތް ހަފްތާތަކުގައި، މިކަމާ ބެހޭގޮތުން، ފައިނަލައިޒް ކުރަންޖެހޭ ކަންތައްތައް، އަޅުގަނޑުމެން ކުރިއަށް ގެންގޮސް ނިންމާނަން. އެމް.ޓީ.ސީ.ސީ.އާއި ކޮންސްޓްރަކްޝަން މިނިސްޓްރީއާ އެކީގައި އެގްރިމަންޓަކާ ހަމައަށް ދިޔުމަށްޓަކައި ނިންމަންހުރި ބައެއް ކަންކަން އެބަހުރި. އެކަންކަން ނިންމައި، އިރާދަކުރެއްވިއްޔާ މި ފަޅުތެރެއިން ހިއްކޭނެ އެންމެ ބޮޑު ޖާގައެއް، އެންވަޔަރަންމެންޓަލް އިމްޕެކްޓް އެސެސްމަންޓްގެ އޮންނަ މިންގަނޑުތަކަށް ފިޓްވާގޮތަށް، ހިއްކޭނެ އެންމެ ބޮޑުމިނަކަށް، އިރާދަކުރެއްވިއްޔާ ހިއްކައިދިނުމުގެ ޢަމަލީ މަސައްކަތް، މި އަހަރުގެ ތެރޭގައި އެންމެ ލަސްވެގެން، ޖުލައި މަހުގެ ތެރޭގައި އަޅުގަނޑު ފަށައިދޭނަން. ފަށައި، ހުއްޓާލާނީ އިރާދަކުރެއްވިއްޔާ ބާރު ސްޕީޑްގައި ގެންގޮސް ނިންމުމަށްފަހު. އެއްގޮތަކަށްވެސް އެކަމުގައި ދެން ތިޔަބޭފުޅުން އިންތިޒާރު ކުރައްވާކަށް ޖެހިވަޑައެއްނުގަންނަވާނެ. އެހެންވީމާ، ޖުލައި މަހުގެ ތެރޭގައި، ނޫނީ އެއަށްވުރެވެސް އަވަހަށް ފެށޭ ކަމުގައިވަންޏާ ފަށައިދޭނަން. މި އަހަރުގެ މެދުތެރޭގައި ފެށިގެންގޮސް، ދާދި އަވަހަށް އެ މަޝްރޫޢު ނިންމޭނެ އެންމެ އަވަހަށް، ބާރު ސްޕީޑްގައި ގެންގޮސް ނިންމައިދީ، ހިމާޔަތްކޮށްދިނުމުގެ މަސައްކަތާ އެކީގައި ނިންމައިދޭނަން. އާދެ، އެއީ، އަޅުގަނޑު ރިޔާސީ އިންތިޚާބުގައިވެސް ތިޔަބޭފުޅުންނަށް ވީ އެންމެ މުހިންމު، އެންމެ ބޮޑު ވަޢުދަކީ.ރައީސް ޑރ. މުހައްމަދު މުއިއްޒު - 25 ފެބްރުއަރީ 2025
ނަމަވެސް މިހާތަނަށް އައި އިރު ހުޅުދެލީގައި ބިން ހިއްކުމުގެ މަސައްކަތުގެ އެއްވެސް މަސައްކަތެއް ފަށާފައި ނުވެއެވެ.
މިކަމާއި ގުޅޭގޮތުން ހުޅުދެލި ކައުންސިލްގެ ރައީސް އަހުމަދު ނާޒިމް ވިދާޅުވީ ރައީސް އެރަށަށް ވަޑައިގެން ވިދާޅުވީ ހުޅުދެލި ފަޅުތެރެރިން ހިއްކެން އޮތް މިންވަރަކަށް ބިން ހިއްކައިދެއްވާނެ ކަމަށެވެ. ރައީސް ވިދާޅުވީ ޖުލައި މަހުގެ ނިޔަލަށް އަމަލީ މަސައްކަތް ފައްޓަވައި ދެއްވާނެ ކަމަށާއި، ނަމަވެސް ކޮން އަހަރެއްގެ ޖުލައި މަހެއްގައި ކަމެއް ރައީސް ވިދާޅު ނުވާ ކަމަށެވެ. އަދި ޖުލައި މަސް މީގެ 50 އަހަރު ފަހުންވެސް އަންނާނެ ކަމަށާއި، ރައްޔިތުންނަށް އެ ސާފެއް ނޫން ކަމަށެވެ.
ކައުންސިލްގެ ރައީސް ވިދާޅުވީ ބިން ހިއްކުމާއި ގުޅޭ އެއްވެސް މަސައްކަތެއް މިހާތަނަށް ފަށާފައި ނުވާ ކަމަށެވެ. އަދި މިހާތަނަށް އައި އިރު ވެސް އެއްވެސް ބަޔަކާއި މަސައްކަތް ހަވާލުކުރި ކަމެއް، ނުވަތަ ސޮއިކުރިކަމުގެ މައުލޫމާތެއް ކައުންސިލަށް ލިބިފައި ނުވާ ކަމަށެވެ. 18.4 ހެކްޓަރުގެ ބިން ހިއްކާނެ ކަމަށް ރައީސް އެރަށަށް ވަޑައިގަތުމުގެ 15 ދުވަސް ކުރިން ކައުންސިލަށް އެންގި ކަމަށާއި، ރައީސް ވަޑައިގެން ޖުލައި މަހުގެ ކުރިއަށް އެކަން ކޮށްދެއްވާނެ ކަމަށް ވިދާޅުވި ވިދާޅުވުން ފިޔަވައި އިތުރު އެއްވެސް ކަމެއް ނުހިނގާ ކަމަށް ނާޒިމް ވިދާޅުވިއެވެ.
