ރިޔާސީ އިންތިޚާބު ކާމިޔާބު ނުވީ އެކަށީގެންވާ ވަގުތު ނުލިބުމުން: ކަމަލާ ހެރިސް

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ވާދަކުރެއްވި ނަމަވެސް، އެ އިންތިޚާބު ކާމިޔާބު ނުކުރެވުނީ އެކަށީގެންވާ ވަގުތު ނުލިބުމުން ކަމަށް، ކުރީގެ ނައިބު ރައީސް ކަމަލާ ހެރިސް ވިދާޅުވެއްޖެ އެވެ.

ކަމަލާ މިހެން ވިދާޅުވީ، އިންތިޚާބުގެ ތަޖުރިބާތައް ހިއްސާ ކުރައްވައި ލިޔުއްވާފައިވާ "107 ދުވަސް" ފޮތާ ގުޅޭ ގޮތުން ދަ ވިއު ޕްރޮގްރާމްގައި ވާހަކަ ދައްކަވަމުންނެވެ. އެ ފޮތުގައި ކަމަލާ ވަނީ އިންތިޚާބާ ގުޅޭ ގިނަ ކަންތައްތަކެއް ހިއްސާ ކުރައްވައިފަ އެވެ.

އެގޮތުން ކަމަލާ ވިދާޅުވީ، އިންތިޚާބުގައި ޑިމޮކްރަޓިކް ޕާޓީގެ ފަރާތުން ވާދަ ކުރައްވައި، ރިޕަބްލިކަން ޕާޓީގެ ޑޮނަލްޑް ޓްރަމްޕްގެ މައްޗަށް ކުރި ނުހޯދުނީ، އެކަށީގެންވާ ވަގުތު ނެތުމުން ކަމަށެވެ. ކަަމަލާ ވިދާޅުވީ، އިންތިޚާބުގެ ނަތީޖާ އެގޮތަށް އައުމުގައި ގިނަ ކަންތައްތަކެއް މެދުވެރިވި ނަމަވެސް، އެންމެ ބޮޑު އެއް ސަބަބަކީ ކެމްޕެއިން އަށް އެކަށީގެންވާ ވަގުތު ނެތުން ކަމަށެވެ.

ކަމަލާ ވިދާޅުވީ އިންތިޚާބުގައި ވާދަ ނުކުރައްވަން ކުރީގެ ރައީސް ޖޯ ބައިޑަން ނިންމެވުމާ އެކު، އޭނާ އަށް ފުރުސަތު ލިބިވަޑައިގެންނެވި ކަމަށާއި، ނަމަވެސް އިންތިޚާބަށް 107 ދުވަސް އޮއްވައި ކުރަން ޖެހުނީ ވަރަށް އުނދަގޫ މަސައްކަތެއް ކަމަށެވެ. އަދި ކުރިމަތިލާން ޖެހުނީ ވަރަށް އުނދަގޫ ޙާލަތަކާ ކަމަށް ވެސް ކަމަލާ ވަނީ ވިދާޅުވެފަ އެވެ.

އިންތިޚާބުގެ ކެމްޕެއިން އަށް ކަމަލާ އަށް ލިބިވަޑައިގެންނެވި 15 ހަފުތާގެ ތެރޭގައި، އޭނާގެ ކެމްޕެއިން އިން ވަނީ ގާތް ގަނޑަކަށް 1.5 ބިލިއަން އެމެރިކާ ޑޮލަރު ހޭދަ ކޮށްފަ އެވެ. ނަމަވެސް، އިންތިޚާބުގެ ޕޮޕިއުލާ ވޯޓުގެ އިތުރުން، އިލެކްޓޯރަލް އަދި ހުރިގާ ސްވިންގް ސްޓޭޓު ތަކެއްގައި ވެސް ވަނީ ޓްރަމްޕްއާ ވާދަ ކުރައްވައި ބަލިވެފަ އެވެ.

ކަމަލާގެ ފޮތުގައި ބުނެފައިވާ ގޮތުގައި، އޭނާ އަކީ ބައިޑަންއެއް ނޫނެވެ. އަދި ހަމަ ޔަޤީނުން އޭނާ އަކީ ޓްރަމްޕް ވެސް ނޫން ކަމަށް ބުނެފައިވެ އެވެ. ކަމަލާ ވިދާޅުވެފައި ވަނީ، އޭނާގެ މުޅި ސިޔާސީ ކެރިއަރުގައި ވެސް ޑިމޮކްރަޓިކް ޕާޓީގެ ފަރާތްތަކާއި، ރިޕަބްލިކަން ޕާޓީގެ ފަރާތްތަކާ އެކު ވެސް މަސައްކަތް ކޮށްފައި ވާނެ ކަމަށެވެ.

އެކަން ފާހަގަ ކުރައްވައި ކަމަލާ ވިދާޅުވެފައި ވަނީ، އެންމެ ރަނގަޅު ޚިޔާލު އަދި ކަންކަމުގައި އެންމެ ރަނގަޅު ނިންމުން އަންނަނީ އެންމެން އެކުވެގެނެނެވެ. އަދި އޭނާ އަކީ އެމެރިކާގެ ރައީސަށް ވެއްޖެ ނަމަ، އޭނާގެ ކެބިނެޓުގައި ރިޕަބްލިކަން ޕާޓީގެ މީހަކު ވެސް ހިމެނުމަކީ އޭނާ ކުރައްވަފާނެ ކަމެއް ކަމުގައި ކަމަލާ ވިދާޅުވެފައިވެ އެވެ.

އެމެރިކާގެ ކުރީގެ ރައީސް ޓްރަމްޕްއާ ވާދަ ކުރައްވައި ކަމަލާ އަށް ނާކާމިޔާބާ ކުރިމަތިލާާން ޖެހުނު ނަމަވެސް، އޭނާ ވިދާޅުވެފައިވާ ގޮތުގައި އެ އިންތިޚާބަކީ 21 ވަނަ ޤަރުނުގައި މިހާތަނަށް ކުރިއަށް ދިޔަ އެންމެ ވާދަވެރި، އަދި އެންމެ ފޯރި ގަދަ އިންތިޚާބެވެ.

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ޑިމޮކްރަޓިކް ޕާޓީގެ ފަރާތުން އެންމެ ފުރަތަމަ ވާދަ ކުރައްވަން ނިންމެވީ، އޭރުގެ ރައީސް ބައިޑަން އެވެ. ނަމަވެސް، އިންތިޚާބުގެ ކެމްޕެއިން އާއި، ރިޔާސީ ބަހުސްގައި ވެސް ބައިޑަން އަށް ވަނީ ގިނަ ފާޑު ކިޔުންތަކެއް އަމާޒުވެފަ އެވެ. އަދި ބައިޑަންގެ ޞިއްޙީ ޙާލު ކޮޅާ ގުޅޭ ގޮތުން ވެސް އެތައް ފާޑު ކިޔުން ތަކެއް އަމާޒުވި އެވެ.

ޚާއްސަކޮށް ރިޔާސީ ބަހުސްގައި ޓްރަމްޕްއާ ވާދަކުރައްވައި ބައިޑަންގެ ފަރާތުން ފެނުނު ދަށް ޕާފޮމެންސްއާ ގުޅިގެން ޑިމޮކްރަޓިކް ޕާޓީގެ ތެރޭގައި ވެސް ޚިޔާލު ތަފާތުވުން އުފެދިފައި ވަނިކޮށް، ބައިޑަން ވަނީ ރިޔާސީ ރޭހުން ވަކިވެ ވަޑައިގަންނަވަން ނިންމަވައިފަ އެވެ. އަދި އޭނާގެ ބަދަލުގައި ޑިމޮކްރަޓިކް ޕާޓީގެ ފަރާތުން ވާދަ ކުރައްވާނީ އޭރުގެ ނައިބު ރައީސް އަދި ބައިޑަންގެ ރަނިންމޭޓް ކަމަލާ ކަމަށް ހަމަޖެއްސެވި އެވެ.