ފަލަސްޠީނުގެ މިނިވަން ދައުލަތަށް ތާއީދު ކުރާ ޤައުމު ތަކަށް ނަތަންޔާހޫގެ ނުރުހުން

ދެ ދައުލަތުގެ ޙައްލު ހޯދުމަށް ބާރު އެޅުމުގެ ގޮތުން، ފަލަސްޠީނުގެ މިނިވަން ދައުލަތް ޤަބޫލު ކުރަން ނިންމާފައިވާ ޤައުމު ތަަކަށް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ފާޑު ވިދާޅުވެއްޖެ އެވެ.

އޭނާ މިފަަދައިން ވާހަކަ ދައްކާފައި ވަނީ އދ ގެ ޖެނަރަލް އެސެމްބްލީގަ އެވެ. އެގޮތުން ފަލަސްޠީނުގެ މިނިވަން ދައުލަތް ޤަބޫލު ކުރުމަށް ނިންމައި، އެކަމަށް ބާރު އަޅާ ހުޅަނގުގެ ޤައުމުތަކާ ދެކޮޅަށް ނަތަންޔާހޫ ވަނީ ވާހަކަ ދައްކަވައިފަ އެވެ.

އެގޮތުން ނަތަންޔާހޫ ވިދާޅުވެފައި ވަނީ، ގިނަ ޤައުމު ތަކުގެ ލީޑަރުން ވަނީ އެކި އެކި ނުފޫޒުތަކަށް ބޯލަނބާފައި ކަމަށެވެ. ޚާއްސަކޮށް މީޑިއާގެ ތައައްސުބީ ވިސްނުމާއި، ހަރުކަށި އިސްލާމީ ފިކުރުގެ ބައެއްގެ ނުފޫޒާއި، ޔަހޫދީންނާ ދެކޮޅު ބައެއްގެ ނުފޫޒުގައި އެ ލީޑަރުން ޖެހިފައިވާ ކަމަށް ނަތަންޔާހޫ ވިދާޅުވި އެވެ.

އޭނާ މިފަދައިން ވިދާޅުވެފައިވާއިރު، އިސްރާއީލް އާއެކު ގާތް ގުޅުން ބާއްވަމުން އައި ޤައުމު ތަކުން ވެސް ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައިފަ އެވެ. އެގޮތުން އިނގިރޭސިވިލާތް، ފްރާންސް، ކެނެޑާ އަދި އޮސްޓްރޭލިއާ ފަދަ ޤައުމު ތަކުން ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައި، އެކަން ރަސްމީކޮށް އިއުލާން ކޮށްފަ އެވެ.

އެ ބައްދަލުވުމުގައި ނަތަންޔާހޫ ވިދާޅުވެފައި ވަނީ، އެ ޤައުމު ތަކުގެ ލީޑަރުންނާ ސިއްރުން ބައްދަލުވާ ކަމަށެވެ. އަދި އެ ސިއްރު ބައްދަލުވުން ތަކުގައި އެ ލީޑަރުން އިސްރާއީލް އަށް ޝުކުރު އަދާ ކުރާ ކަމަށް ވެސް އޭނާ ވިދާޅުވި އެވެ. ޚާއްސަކޮށް އެ ޤައުމު ތަކުގެ ވެރި ރަށް ތަކުގައި ޓެރަރިސްޓު ހަމަލާތައް ހުއްޓުވުމުގައި އިސްރާއީލްގެ އިންޓެލިޖެންސް ޚިދުމަތްތަކުގެ އަގު ވަޒަން ކުރާ ކަމަށް ވެސް އޭނާ ވިދާޅުވި އެވެ.

ނަތަންޔާހޫ ވިދާޅުވެފައި ވަނީ، ހަމާސް ޖަމާއަތް މުޅިން ބަލިކޮށް، އެ ޖަމާއަތް އެއްކޮށް ނައްތާލެވެން ދެން ހަނގުރާމަ ކުރިއަށް ގެންދަން ޖެހޭ ކަމަށެވެ. އޭނާ މިހެން ވިދާޅުވެފައި ވީ ނަަމަވެސް، ޣައްޒާ ހަނގުރާމައިގައި އޭނާ އަށް ބޮޑު ޕްރެޝަރެއް ކުރިމަތިވެފައިވެ އެވެ. ޚާއްސަކޮށް ރަހީނު ކޮށްފައިވާ މީހުންގެ އާއިލާ ތަކުގެ ފަރާތުން ނަތަންޔާހޫ އަށާއި، އޭނާގެ ސަރުކާރަށް އަންނަނީ ޕްރެޝަރު ބޮޑު ވަމުންނެވެ.

އދ ގެ ބައްދަލުވުމުގައި ވާހަކަ ދައްކަވަމުން ނަތަންޔާހޫ މިހެން ވިދާޅުވެފައި ވީ ނަމަވެސް، ފަލަސްޠީނުގެ މިނިވަން ދައުލަތް ބަލައި ގަންނަން ނިންމާފައިވާ ޤައުމު ތަކުން އަންނަނީ އިސްރާއީލްގެ އަމަލުތަކާ ދެކޮޅަށް ފާޅުގައި ވާހަކަ ދައްކަމުންނެވެ. އަދި އިސްރާއީލް އިން ހިންގަމުން އަންނަ ލާއިންސާނީ އަމަލުތައް ވަގުތުން ހުއްޓާލުމަށް ވެސް ވަނީ ގޮވާލައިފަ އެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި މިހާތަނަށް 65،000 އަށް ވުރެ ގިނަ ރައްޔިތުން ޣައްޒާ އިން ޝަހީދުވެފައިވާއިރު، މުޅި ބައިނަލްއަޤުވާމީ މުޖުތަމައުގެ ނުރުހުން އިސްރާއީލް އަަށް އަމާޒުވެފައިވެ އެވެ. ފަލަސްޠީނުގެ މިނިވަން ދައުލަތް ބަލައި ގަންނަން ނިންމާފައިވާ ޤައުމުތަކާ ދެކޮޅަށް ނަތަންޔާހޫ ވާހަކަ ދައްކަވާފައިވާއިރު، އދ ގައި ތަޤުރީރު ކުރެއްވުމަށް އޭނާ ވަޑައިގެންނެެވުމާ އެކު ހޯލުގައި ތިބި ގިނަ މީހުން ވަނީ ހޯލު ދޫކޮށް ނިކުމެފަ އެވެ.